Dinyeel 15

Unimbɔti būsì ki pōoǹ Abram dipoondi

1 Míǹ jítì boonee, ní ti-Dindaan lēē u-ba ki dàkā Abram ki bí-u yii: «Abram, taa fàŋkì tiba, man di wúń a-pu. Tiŋan tin m làá ŋá-see làá nīn wīikí tikpil.» 2 Ní Abram kíí yii: «Ti-Dindaan Unimbɔti, ba ní a làá tīī-mi ní? Man dee, maa cáá kibiki, ní Eeliyeeseer udamaasja di làá dāá jī m-fakal.» 3 Ní Abram gíti bí yii: «Man dee, aa tīī-mi kibiki, ní uyumbu un bi màl̄ m-cindinee di làá jī m-fakal.» 4 Niinee ní ti-Dindaan bí-u yii: «An kaa sá Eeliyeeseer di làá jī a-fakal, sisi a-ba poon biki di làá jī a-fakal.» 5 Ti-Dindaan lī-u mimmee ní ki nyántì-u mmɔŋki, ní ki bí-u yii: «Wáaǹ kí kpèè yilpu a yaa ŋūǹ kí kàaǹ iŋmalbijaa nee.» Ní ki kútì-u yii: «Míǹ ní a-biyaamu làá dāá nīn wīikí^a.»

6 Niinee ní Abram fōō ti-Dindaan nín lī puee ki kíí. Míǹ pu ní ti-Dindaan yíiń-u deedeedaan^b. 7 Ní ti-Dindaan bí-u yii: «Man di sá a-Dindaan un nyántìń-si Uur, Kaaldee tiŋkin kí dū kitiŋ kin poon a bí nee kí tīī-si á nīn kíǹ ki yèe.» 8 Ní Abram bí yii: «Ti-Dindaan Unimbɔti, m làá ŋá mana kí béé yii man di làá nīn lafun yì kitiŋ gbanti?» 9 Ní ti-Dindaan bí-u yii: «Cúú unasal un cáá abin atee nì uŋɔsal un cáá abin atee, nì upìja un cáá abin atee, nì kinanjilii nì dibeenanjipɔmbil kí cáań.» 10 Ní Abram nyàabìń an waŋkutee ní ki cúú-tì ki gífì ki nābitì mili mili, ní ki dū aginee ki bíl̀ ki túĺ tɔb. See kinanjilii nì dibeenanjipɔmbil ní waa gífì ki nābitì mili. 11 Ní ikaabu kpákatìń kí jī an nanti ní Abram jìn̄-i.

12 Ŋwìiń cá kí jēetée ní ŋgeem miba dɔ́miń ki cúú Abram. Niinee ní tifaandi kɔ́-u ní dibɔmbɔŋkpaandi diba jéetì u-pu^c. 13 Ní ti-Dindaan bí Abram yii: «Á nīn nyí tiŋan yii a-naantiibi làá dāá nīn kóò kitincaŋ kiba poon ní. Bi làá dāá dū-bi kí kpántí iyumbu kí sàaǹ-bi áli abin alaataa anaa^d. 14 Ama m làá dāá dáaĺ ditimbundi din làá dāá cúú a-naantiibi kuyuŋuee tafal, ní boonee bí dāá nyā kitiŋ gbantin nì tigaajakpaandi^e. 15 Siiyee, a làá bà a-naanjab nì nsɔŋfi poon ní. A làá púĺ kí bà titikpiti laŋki nì dipɔɔsɔŋkil ní bí nín síb́-si. 16 A-naantitɔntɔkɔŋ dinanaatiil di làá dāá fàtīí gítiń doo, di sá yii kí dāá sāā ŋyunti gbanti ní Amɔɔr yab kpitii làá wíiǹ kí bà i-nyɔkɔm.»

17 Ŋwìiń jéetì kunyeeu mɔ́ee ní ŋfan ŋubɔ nì ŋŋminyiim nì ŋŋminaapool^f dɔ́miń ki jítì tinan tin Abram gífì ki bíl̀ee kansikin. 18 Ŋwiin gbanti dal ní ti-Dindaan pūtì ki pōoǹ Abram ki bí-u yii:

«A-naantiibi ní m làá dū kitiŋ nee kí tīī^g,

kí yòon̄ Eejipiti mɔɔl kí tin cáá sāā Eefiraati mɔɔkpaandi.

19 An dàkà yii kitiŋ kin pu Keeni yab nì Keeniisi yab nì Kadimoon yab 20 nì Eeti yab nì Peeriisi yab nì Reefa yab 21 nì Amɔɔr yab nì Kanaan yab nì Giirgaasi yab nì Jeebusi yab kóòyee.»