Dinyeel 14

Abram jáń ki fīī Looti

1 Ŋyunti gbantee Amiirafeel nìn sá Siinaar bɔtiu, ní Ariyɔɔki sá Eelasaar bɔtiu, ní Keedoolawoomeer sá Eelam bɔtiu, ní Tiidaal sá Gooyiim bɔtiu. 2 Bibɔtiibi gbanti nìn kpáfì ki cūtìi jáń nì Beera, Soodoom bɔtiu, nì Biirisa, Goomoora bɔtiu, nì Siinaab, Adima bɔtiu, nì Seemeebeer, Seebooyiim bɔtiu, nì Beela tiŋki kin bi gíti yíì Soowaaree mun bɔtiu. 3 Bibɔtiibi gbantee nì bi-naacimbi nìn kpáfì Siidiim tantakalin. Ditantakal gbanti di kpántì díǹ Ŋyaam mɔɔl. 4 Bi nìn bí ubɔti Keedoolawoomeer taapu ní ki tin sāā abin saalaa nì ali. Abin saalaa nì ata poonee ní bi yíkì kaa kíí bi-ba pu. 5 Dibindi diba kpá saalku poon ní ubɔti Keedoolawoomeer nì bibɔtiibi bin u nì bi pēeǹ kinyɔkɔee jáń ki pɔ́ɔkiǹ Reefa yab Asitarooti-Kaanayiim tiŋkin, ki jáń ki pɔ́ɔkiǹ Suusi yab Aami tiŋkin ní ki jáń ki pɔ́ɔkiǹ Eem yab Saafee Kiiriyatayiim tiŋkin. 6 Bi nìn jáń ki pɔ́ɔkiǹ Kɔɔr yab bin kóò Seeyiir jooŋŋi puee mun, ki jìn̄-bi ki bàn̄ Eel-Paraan, kitiŋ kin pìlīǹ kuteeuee. 7 Míǹ boonee ní bi pɔ́ĺ ki búntì Eeni Miisipati, kitiŋ kin bi yíì kɔŋkɔnnee Kadeesee. Niin ní bi jáń ki pɔ́ɔkiǹ Amaleeki yab bi-timmu kɔkɔ poon, ki kpáaǹ Amɔɔr yab bin kóò Asaasɔn-Taamaar tiŋkinee.

8 Niinee ní Soodoom nì Goomoora nì Adima nì Seebooyiim nì Beela (an dàkà yii Soowaar) timmu bɔtiibi kɔkɔ kpáfì ki bóob́ dikɔ̀ndi Siidiim tantakalin, 9 kí já nì Keedoolawoomeer, Eelam bɔtiu nì Tiidaal, Gooyiim bɔtiu nì Amiirafeel, Siinaar bɔtiu nì Ariyɔɔki, Eelasaar bɔtiu. An nìn sá bibɔtiibi binaa di nìn kpáfì kí já nì bibɔtiibi biŋmoo. 10 Siidiim tantakal gbanti nìn sá aŋɔ lɔkɔgiŋŋi ŋma ní. Kujaau pɔ́ɔkì Soodoom nì Goomoora bɔtiibi bíi sáńee, ní ki tin jéetì alɔkɔginee poon, ní bin kíǹee sáǹ ki dàb̄ dijool. 11 Bin nìn jáń ki pɔ́ɔkiǹ-bee dɔ́miń ki kóoǹ Soodoom nì Goomoora timmu yab wanti kɔkɔ nì bi-jinti kɔkɔ ki kpáàa búntì. 12 Bi nìn cúú Looti, Abram nabiki jipɔɔn ki kpáaǹ u-wanti kɔkɔ ki cáa búntì, kun puee Looti nìn kóò Soodoom ní.

13 Kijapaai kiba nìn sáǹ ki ŋmátì kujaau gbantin ní ki dɔ́miń Abram, ueebruja cee ki tùkū-u yii binannanliibi cúú Looti ki cáa búntì kuyuŋu. An yuntiŋuee, Abram nìn dáá kóò ki pìlīǹ Mamiree, uamɔɔrja sufii ní. Mamiree gbanti nì u-nabiyaamu Eeskool nì Aneer nìn kpáfì nì Abram bi sòon̄ ki ŋá ubaanti. 14 Abram nín gbìl̄ yii bi cúú u-nabiki ki kpáàa búntì kuyuŋuee, ní u bɔ́ntì u-tɔntɔnliibi bin sá bibaatandambi bi màl̄-bi u-cindinee, binib alaataa ata nì saalku nì bita, ní bi kùl̄ ki bīiǹ bibɔtiibee nì bi-janjaliibi boon ki tin bàn̄ kitiŋ kin bi yíì yii Daanee. 15 Kunyeeuee ní u nì u-naacimbee cúu yākatì akiti akiti ní ki lùkū ki tú bi-nannanliibi. Kujaau kíĺ, ní Abram nì u-yab jáń ki pɔ́ɔkiǹ-bi ní ki jìn̄-bi ki tin bàn̄ Ooba tiŋki kin bí Damaasi tiŋki ŋgan púee. 16 Ní Abram fōoń tin kɔkɔ bi nìn dɔ́miń ki kóoǹee, ki fōō ki kpáaǹní u-nabiki Looti nì u-wanti kɔkɔ, nì binimpoobi nì binib bin bi nìn pée cúúyee kɔkɔ.

17 Abram nín nìn jáń ki pɔ́ɔkiǹ Keedoolawoomeer nì bibɔtiibi bin nìn dɔ́miń ki kútì u-puee ki fātìi kùn̄ee ní Soodoom bɔtiu túŋkìń-u Saafee tantakalin, an dàkà yii ubɔti tantakalin.

18 Meelkiiseedeeki un sá Saleem bɔtiuee mun nìn dɔ́miń niin. U nìn sá Yilpu Fɔ́ŋŋŋ Nimbɔtiu saraaŋaliu ní. Meelkiiseedeeki gbanti nìn cáań kpɔnɔ nì ndamam ki tīī Abram^a. 19 Meelkiiseedeeki nìn mēē ki bīiǹ u-pu ki lī yii: «Yilpu fɔ́ŋŋŋ Nimbɔtiu un náań yilpu nì taapuee ń bìin̄ Abram boon. 20 Yilpu fɔ́ŋŋŋ Nimbɔtiu un dū a-nannanliibi ki ŋá a-ŋaan a jáń ki pɔ́ɔkiǹ-bee ń ká tinyool!» Niinee ní Abram lēē tiwan tin kɔkɔ u nìn jáń ki fātìi fōońee, nì tin kɔkɔ u cááyee saalaa kamaa puee kubɔ kubɔ ki tīī Meelkiiseedeeki.

21 Ní Soodoom bɔtiu bí Abram yii: «Sii yòon̄ tiwan tin a jáń ki fōōyee kɔkɔ kí dū binib kí tīī man.» 22 Ní Abram kíí-u yii: «M yōoǹ m-ŋal ki pūtì ti-Dindaan, Yilpu Fɔ́ŋŋŋ Nimbɔtiu un náań yilpu nì taapuee 23 yii maa làá pée gbēē a-wanti báà tiba. Báà gulfa kpaŋkpan gba, maa làá dáb́, ki dāa nín nyàab̀ inaataaŋmii. M pūtì yii m kpá kí fōō a-cee tiba nì tiba, á dāá gāā a-bindi kí lì yii: <Man di yì-tì ní Abram kpántì ugaaja!> 24 Ubɔ ń taa pée tīī-mi tiba. Tijin tin m-naacimbi jíńee ŋmāntì, ama Aneer nì Eeskool nì Mamiree bin céeǹ-mee, bíǹ ń yòon̄ bi-yati.»