Dinyeel 45

Jooseefi yāntì u-nabiyaamu béè-u

1 Niinee Jooseefi kaa nìn gíti ŋūǹ kí cúú u-ba bin kɔkɔ nìn bí u-ceeyee nimbiin. Ní u téeń yii: «Nyāntímaan binib kɔkɔ m-cee doo.» An kíǹ u nì u-nabiyaamu ŋmaniŋmee ní u yāntì bi béè yii an sá úǹ Jooseefi^a. 2 Ní u bíi sūǹ mpɔn ní Eejipiti yab bin u nyántèe gbìl̄ ní an gbītì ki bàn̄ Faaroo cindi. 3 Ní Jooseefi bí u-nabiyaamu yii: «Man Jooseefi dee! M-baa gbíntìi dáá bí dimaŋfalinaaa?» Ama u-nabiyaamu wunti nìn kpíì u-nimbiin ní baa ŋúń ki kíí-u. 4 Ní u bí-bi yii: «Ní sútiń kí pìl̄-maa!» Ní bi sútì ki pìl̄-u. Ní u bí-bi yii: «An sá man Jooseefi, ni-nabiki kin ni nìn dūu nyáfì bi cáá-mi ki cūnnì Eejipitee. 5 Ama kɔŋkɔnnee, ni-pɔbiliŋ ń taa bīil̀, án taa wà-ni mun yii ni dū-mi ki nyáfì bi cáań-mi doo. An sá Unimbɔti di dū-mi ki péé ki līntìń ḿ dāá nīn bí doo kí ŋmā kí fīī-ni ní taa kpú. 6 Di sá yii ŋkùm nín nyáń kitiŋ pu nee, abin ali sèé. Abin aŋmoo ŋin mun dòoń nee, ubɔ kaa làá kpɔ̀ tikpaalaaa, kaa làá cā tijin mun. 7 Unimbɔti di túnní-mi ḿ lìntīń ni-nyɔkɔpu, án nín làá ŋá pu ní taa kúntí kitiŋ pu, ama ú dū u-pɔŋkpaaŋŋu kí fīī-ni ní ŋmátée. 8 Míǹ puee an kaa sá nimbi di yāntì ní m dɔ́miń doo, Unimbɔti di cáań-mi. Úǹ di kāaǹ-mi ḿ nīn sá kii Faaroo kpambal ki kpòotī-u, kí nīn sá u-dicaŋkun ukpil, ní kí nīn sá Eejipiti tiŋki kɔkɔ gɔminau. 9 An puee ní gítí m-baa cee malaa kí tùkù-u yii u-jipɔɔn Jooseefi nín tú bí tùkù-u puee sèé: <Unimbɔti dū-mi ki kāaǹ Eejipiti tiŋki kɔkɔ kpiliu. Míǹ puee dāan̄ m-cee malaa, á taa tàan̄ní. 10 A làá nīn kóò Gooseen tiŋgbaŋkin ní ki pìlīǹ-mi, sii nì a-biyaamu nì a-naantiibi nì a-piii nì a-naai nì tin kɔkɔ a pée cááyee. 11 M làá nīn kpèé-si niin, sii nì a-dicaŋku nì a-waŋkuti kɔkɔ, án nín làá ŋá pu tiba nì tiba ń taa lóó-see, kun puee an gíti kíǹ abin aŋmoo ní ŋkùm ń jītí.>»

12 Ní Jooseefi kútì ki lī yii: «Kéè nimbi ni-ba ká nì ni-nimbiliŋ, m-naal Beenjameen mun ká nì u-nimbiliŋ yii an baasii sá man di bíi sòoǹ nì naa! 13 Ní māafì m-baa tinyool paaŋŋu ŋun poon m bí Eejipiti tiŋkin nee nì tin kɔkɔ ni kée, kí ŋá malaa kí cáań-u m-cee doo.» 14 U sòon̄ míǹ ki dóòyee ní ki bìb̄ u-naal Beenjameen ní bi-silii pá tɔb gbigbipati pu ní bi-liitil bíi sūǹ. 15 Ní u bìb̄ u-nabiyaamu mun kíǹee mun ki súń. Míǹ boonee ní u-nabiyaamu nín ŋúń ki sòon̄ nì u.

Faaroo yíiń Jaakɔb ú dāan̄ Eejipiti

16 Ní an gbītì ki bàn̄ Faaroo cindin yii Jooseefi nabiyaamu bāań, ní an mɔ́ɔkiǹ Faaroo nì u-naacimbi. 17 Ní Faaroo bí Jooseefi yii: «Tùkù a-nabiyaamu yii bí túń bi-mammu tijin kí nīn gítí Kanaan tiŋkin. 18 Bi yaa bàn̄ee, bí yòon̄ní bi-baa nì bi-dicaŋŋi kí cáań m-cee doo, ḿ lēē Eejipiti tiŋki dijandi din pée ŋān̄ee kí tīī-bi, ní bí nīn jīǹ tijimmɔntiil tin kitiŋ gbanti lòoǹee. 19 Yàntī a-nabiyaamu ń yòon̄ tɔrɔkub Eejipiti doo kí cùú yòon̄ní bi-nimpoobi nì bi-biyaamu nì bi-baa kí cáań doo. 20 Bí taa yāliŋkì tin bi làá yīkìí fáń lapuee pu, kun puee Eejipiti tiŋgbaŋki kin cáá tikɔkɔ nì tikɔkɔee poon ní bi làá nīn bí.»

21 Ní Jaakɔb jipɔmbi ŋá kii bi nín sáŋkì-bi puee. Ní Jooseefi tīī-bi tɔrɔkub kii Faaroo nín bí yii ú ŋá puee, ní ki tīī-bi tijin tin bi làá nīn jīǹ nsannee. 22 U pú u-nabiyaamu kɔkɔ dibɔkutipɔndi diba diba, ní ki tīī Beenjameen úǹ animbil jitɔmbi alaataa ata nì abɔkutipɔɔn aŋmoo. 23 U dū tiwammɔntiil tin bí Eejipitee tiba ki túǹ mmanjamu saalaa, ní mmansalimu saalaa mun tú tijin bí cáá tīī u-baa ú nīn jīǹ ki dòoń. 24 Ní u kpáafì u-nabiyaamu yii: «Ní taa tin já nsanni.» Ní ki pú-bi nsan bí nīn kùǹ. 25 Niinee bi yíkì Eejipiti ki nín cá, ki tin bàn̄ Kanaan tiŋkin bi-baa Jaakɔb cee. 26 Bi bàn̄ee ní ki tùkū-u yii: «Jooseefi gbíntìi dáá bí dimaŋfalin, úǹ di sá gɔmina Eejipiti tiŋkin.» Ama an kaa nìn kɔ́ Jaakɔb pɔbilin, di sá yii waa nìn fōō tin bi lēe ki kíí. 27 Bi nín máafì Jaakɔb tibɔti tin kɔkɔ Jooseefi sòon̄ nì bee, nì u nín ká tɔrɔkub bin Jooseefi tīiń bí dāan̄ kí yòon̄-uee, ní u nín fīntì ŋgeem pu. 28 Ní Jaakɔb bí yii: «M-biki Jooseefi gbíntìi bí dimaŋfalinaa! An ŋmāntì, maa ti pée là tiba kí kūtì. M làá cùú ká-u ní kí nín kpú.»