Dinyeel 46

Jaakɔb nì u-dicaŋku nín cá Eejipiti tiŋkin

1 Jaakɔb yíkìi kāl̀ nsan pu ki kpáaǹ u-dicaŋku nì tin kɔkɔ u cááyee. U bàn̄ Beerseeba tiŋkinee ní ki ŋá saraabi ki tīī u-baa Isaaki Nimbɔtiu. 2 Kunyeeu gbantee, ní Unimbɔti sòon̄ nì u kudamintiiun, ní ki yíiń-u yii: «Jaakɔb! Jaakɔb!» Ní u kíí yii: «M sèé.» 3 Ní Unimbɔti bí-u yii: «Man di sá Unimbɔti, a-baa Nimbɔtiu. A nín cá Eejipiti nee, á taa fàŋkì, kun puee niin ní m làá yàntī á kpántí ditimbuŋkpaandi baa. 4 Mama m-ba di làá céeǹ-si kí cùnnì Eejipiti ní kí fàtīí gíiǹní-si. A-kúm dalee, a-jipɔɔn Jooseefi di làá cúú-si ní á sìntī.» 5 Niinee ní Jaakɔb yíkì Beerseeba. U-jipɔmbi nìn dū tɔrɔkub bin Faaroo nìn tīińee ki yōoǹ u nì bi-nimpoobi nì bi-biyaamu. 6 Bi nìn kpáaǹ bi-waŋkuti kɔkɔ nì bi-gaajawanti tin bi ká Kanaan tiŋkinee. Ní Jaakɔb dūu bàn̄ Eejipiti^a, u nì u-dicaŋku kɔkɔ. 7 U nìn kpáaǹ u-jipɔmbi, nì u-bisalib nì u-naantiibi kɔkɔ ní ki cūnnì Eejipiti.

Jaakɔb dicaŋku yab yiŋŋi

8 Jaakɔb jipɔmbi nì u-naantiibi bin nìn nóó-u ki cūtì Eejipitee yiŋŋi sèé.

Jaakɔb jipɔŋkpiliu di sá Rubeen. 9 Rubeen jipɔmbi di sá Anɔki nì Palu nì Eetisirɔn nì Kaarmii.

10 Simeeyɔn jipɔmbi di sá Jeemuyeel nì Yamiini nì Oodi nì Jaakin nì Sookaar nì Saayuul, ukanaannimpu jipɔɔn.

11 Leefii jipɔmbi di sá Geersɔn nì Keeyaati nì Meerarii.

12 Juuda jipɔmbi di sá Eer nì Oonan nì Seera nì Peereesi nì Seeraki. Ama Eer nì Oonan bíǹ kpíìń Kanaan tiŋkin. Peereesi jipɔmbi di sá Eetisirɔn nì Amuul.

13 Isakaar jipɔmbi di sá Toola nì Pufa nì Yoob nì Simroon.

14 Sabulɔn jipɔmbi di sá Seereedi nì Eelɔn nì Jaaleel.

15 Mbininjabiyaamu mun Leeya nìn màl̄ Jaakɔb Padan-Aram tiŋkinee dee. Bi-niisal Diina mun nìn kútì. Leeya biyaamu nninjabiyaamu nì nnimpubiyaamu nì u-naantiibi kɔkɔ nìn kpáfì binib mmuŋku nì saalaa nì bita ní.

16 Gaadi jipɔmbi di sá Siifiyɔn nì Aagi nì Suuni nì Eetisibɔn nì Eer nì Aroodi nì Areel.

17 Aseer jipɔmbi di sá Yiimina nì Yiisifa nì Yiisifi nì Beeriya nì bi-niisal Seera. Beeriya nìn màl̄ mbininjabiyaamu muli: Eebeer nì Malkiyeel.

18 Siilpa un Laaban nìn dūu tīī u-bisal Leeya ú nīn sá ubiloolee bininjabiyaamu mun u nìn màl̄ Jaakɔbee dee. Siilpa biyaamu nì u-naantiibi kɔkɔ nìn kpáfì saalku nì ubɔ ní.

19 Jaakɔb nimpuu Raseel jipɔmbi di sá Jooseefi nì Beenjameen. 20 Jooseefi nì u-nimpuu Asinaati un sá Ooni tiŋki tandaaŋwu Pootifeera bisalee nìn màl̄ mbininjabiyaamu muli ní Eejipiti tiŋkin. Bi-yiŋŋi di sá Manasee nì Eefiraayiim.

21 Beenjameen jipɔmbi di sá Beela nì Beekeer nì Asibeel nì Geera nì Naaman nì Ēeyi nì Roosi nì Mupiim nì Upiim nì Aaridi.

22 Jaakɔb nì u-nimpuu Raseel jipɔmbi nì bi-naantiibi kɔkɔ nìn kpáfì unil ubɔ kpá saalku ní.

23 Daani jipɔɔn di sá Usiim.

24 Neefitalii jipɔmbi di sá Yaatiseel nì Gunii nì Yeetiseer nì Siileem.

25 Biila un Laaban nìn dūu tīī u-bisal Raseel ú nīn sá ubiloolee bininjabiyaamu mun u nìn màl̄ Jaakɔbee dee. Bi-kɔkɔ nìn kpáfì binib biluli ní.

26 Jaakɔb cindi poon nib bin nìn nóó-u ki cūtì Eejipitee kɔkɔ nìn sá binib imuŋku ita nì biluu ní, kaa kpáaǹ u-coopoobi. 27 Jooseefi jipɔmbi bili bin u nìn màl̄ Eejipitee nìn kútì, ní Jaakɔb dicaŋku nib kɔkɔ dūu kpáfì binib imuŋku ita nì saalaa.

Jaakɔb nì u-dicaŋku bàn̄ ki kāl̀ Eejipiti tiŋkin

28 Jaakɔb nìn dū Juuda ki tú ú cùú tùkù Jooseefi yii ú dāan̄ kí ká-u Gooseen tiŋkin. Ŋyunti ŋun Jaakɔb nì u-yab nìn tóob́ kí kɔ́ Gooseen tiŋkinee, 29 ní Jooseefi yāntì bi kpàl̄ u-taamui in dátí tɔrɔkuee ní u búntì Gooseen kí tūŋkì u-baa Jaakɔb. U nín bàn̄ ki ká u-baayee ní u ŋàan̄ ki cìb̄-u ní u-yil pá u-baa sil pu ní u súń ki yúntì. 30 Ní Jaakɔb bí Jooseefi yii: «M ŋūǹ kí kpú kɔŋkɔnnee, kun puee m fātìi ká-si a gbíntìi bí dimaŋfalin.» 31 Ní Jooseefi bí u-nabiyaamu nì u-baa dicaŋku yab yii: «M làá cùú ká Faaroo kí tùkù-u yii: <M-nabiyaamu nì m-baa dicaŋkun yab bin nìn bí Kanaan tiŋkinee dɔ́miń m-cee. 32 Binib gbanti sá bin kpàá tiwaŋkutee ní. Bi cáań bi-piii nì bi-ŋoobui nì bi-naai nì tin kɔkɔ bi pée cááyee.> 33 Faaroo yaa láa yíiń-ni ki bālifì-ni yii ba tundi ní ni tūǹee, 34 ní dāá kíí-u yii: <Timbi a-tɔntɔnliibi pée sá biwaŋkpaaliibi ní doooo ti-biyatin ki dāa sāā díǹ, kii ti-baabi mun nín nìn pée sá puee.> Mimmee u làá yàntī ní kàl̄ Gooseen tiŋkin, kun puee uwaŋkpaal kamaa sá Eejipiti yab cee mbusu niliu ní.»