Dinyeel 47

1 Ní Jooseefi cūtìi ká Faaroo ní ki tùkū-u yii: «M-baa nì m-nabiyaamu nyánní Kanaan tiŋkin ki bāań ki kpáaǹní bi-piii nì bi-ŋoobui nì bi-naai, nì bi-wanti tin kɔkɔ bi pée cááyee. Bi bí Gooseen tiŋgbaŋkin.» 2 Ní Jooseefi lēē u-nabiyaamu kansikin binib biŋmoo ki cáá-bi ki dàkā Faaroo. 3 Ní Faaroo bālifì Jooseefi nabiyaamu yii: «Ba tundi ní ni tūǹ ní?» Ní bi kíí-u yii: «Timbi a-tɔntɔnliibi pée sá biwaŋkpaaliibi ní, kii ti-baabi mun nín nìn pée sá puee.» 4 Ní bi bí Faaroo yii: «Ti dá láá dɔ́miń kí kàl̄ kitiŋ nee pu ní, di sá yii ŋkùm pɔ̄ɔ̄ Kanaan tiŋki poon tikpil, ní timool mun kaa ti bí timbi a-tɔntɔnliibi waŋkuti ń ŋmɔ́. Míǹ puee ti mèé-si á pɔ̄-ti nsan tí kàl̄ Gooseen tiŋgbaŋkin.» 5 Ní Faaroo bí Jooseefi yii: «A-baa nì a-nabiyaamu dɔ́miń a-cee. 6 Eejipiti tiŋki kɔkɔ bí a-ŋaan ní. Kpèè dijandi din ŋān̄ee kí lēē kí tīī-bi bí nīn kóò. Bi ŋūǹ kí nīn kóò Gooseen tiŋgbaŋkin. A yaa ká bi-kansikin biba nyí diwaŋkpàal tundi tiŋanee, á lēē-bi bí nīn sá bin kpèé man waŋkutee kpilib.»

7 Ní Jooseefi cáań u-baa Jaakɔb ki dàkā Faaroo ní Jaakɔb jáam̀-u ki mēē ki bīiǹ u-pu. 8 Ní Faaroo bālifì Jaakɔb yii: «A ŋá abin aŋa dee?» 9 Ní Jaakɔb kíí-u yii: «M nín pée yíkìi tú ki yìiǹ ki póotí ntimu nee, an ŋá abin dilaataal nì mmuŋku nì saalaa dee. Abin gbanti poonee, m ká agìń tikpil, ní ŋaa kpáàa bàn̄ m-baabi nín nìn yúntì nnicantimu poon puee.» 10 Ní Jaakɔb gíti jáam̀ Faaroo ki mēē ki bīiǹ u-pu ní ki nyáń ki nín kùǹ.

11 Bi nyáńee ní Jooseefi ŋá kii Faaroo nín bí ú ŋá puee ki nyàab̄ Eejipiti tiŋkin dijandi din ŋān̄ ki bí Ramseesi tiŋkinee^a ki kāaǹ u-baa nì u-nabiyaamu. 12 Ní Jooseefi tīī u-baa nì u-nabiyaamu nì u-baa dicaŋkun nib kɔkɔ tijin min nyɔkɔm làá bà bi nì bi-biyaamu ń jēe.

Jooseefi nín ŋá min ŋkùm yuntiŋuee

13 Ŋkùm nìn píĺ ki pɔ́ɔkì ní tijin kaa ti bí laaba binib ń jī. Ŋkùm nìn nyāŋkiǹ Eejipiti nì Kanaan timmu yab ní bi yɔ̀l̄ kaa ti nyí tin poon bi bée. 14 Jooseefi nìn kpáfì animbil ŋin kɔkɔ Eejipiti nì Kanaan yab nìn cāabìń ki dāā tijinee ki cáa yóoǹ Faaroo dumpu. 15 Ŋyunti ŋun Eejipiti nì Kanaan timmu yab dū bi-nimbiliŋ kɔkɔ ki dáal̀ tijinee, ní Eejipiti yab cūtì Jooseefi cee ki bí-u yii: «Tīī-ti tijin! Ba pu ní tí kpú ŋkùm a-nimbiin míǹ yii ti nín kaa ti cáá animbilee pu?» 16 Ní Jooseefi kíí-bi yii: «Ni yaa kaa ti cáá animbilee, cáaḿmaan-mi ni-waŋkuti ḿ dūú kpántí-ni tijin.»

17 Bi cáań bi-waŋkuti ki tīī Jooseefi ní Jooseefi fōō bi-taamui nì bi-picaŋkpunti nì bi-ŋɔcaŋkpunti nì bi-nacaŋkpunti nì bi-mammu ní ki dūu kpántì-bi tijin. Dibindi gbantee, bi-waŋkuti ní u fōō ní ki tīī-bi tijin. 18 Dibindi gbanti kúntì dipɔndi páaǹee ní bi tí dɔ́miń ki bí Jooseefi yii: «Ukpil, taa ŋūǹ kí dūú báĺ-si. Ti-nimbiliŋ dóò ní ti cáań ti-waŋkuti mun ki tīī-si. Tin pée kíǹ tí cáań-see di sá timbi ti-ba nì ti-kpaatanti. 19 Ba pu ní tí kpú a-nimbiin míǹ ti-timmu ń gbíntí fám? An puee dā timbi nì ti-timmu kí tīī-ti tijin tí jī kí ŋmátí, ní Faaroo ń nīn kíǹ ki yì timbi nì ti-timmu. Tīī-ti ijimbool ti-timmu ń taa nín̄ dɔ̄ fám, tí ŋmā kí ká tin ti làá nīn jīǹ kí taa kpú kí céetée.»

20 Ní Jooseefi dá Eejipiti yab timmu kɔkɔ ki tīī Faaroo, kun puee ŋkùm nìn yíkìi píĺ ki pɔ́ɔkì Eejipiti yab pu, ní báà ŋma dū u-tiŋki ki nyáfì. An ŋá mimmee ní Eejipiti yab timmu kɔkɔ dūu kpántì Faaroo wanti. 21 Ní Jooseefi yāntì Eejipiti tiŋki kɔkɔ nib dūu kpántì iyumbu. 22 See bitandambi baba timmu ní Jooseefi kaa nìn dá, kun puee Faaroo nìn yóoǹ mara yii bí taa gbēē bitandambi wanti, di sá yii Faaroo di nìn tìì-bi tijin. An pu ní bíǹ kaa nìn nyáfì bi-timmu.

23 Ní Jooseefi bí samaa kɔkɔ yii: «Kɔŋkɔnnee, m dá-ni ki kpáaǹ ni-timmu ki tīī Faaroo, an puee m làá tīī-ni iwambool ní bɔ̄l̀ ni-sati. 24 Ni yaa láa cáńee, ní yàkatī miŋmoo pu ní kí lēē diba pu kí tīī Faaroo. Minaa min kíǹee, ní dūú kpíiǹ ni nì ni-biyaamu nì ni-dicaŋŋi yab kɔkɔ, ní kí kíń ibool kí dāá bɔ̄l̀.» 25 Ní bi kíí-u yii: «Ukpil, a fīī-ti ní! A dàkā-ti tiniti, an puee ti kíí kí nīn sá Faaroo yumbui.» 26 Ní Jooseefi dū an bɔtee ki kpántì mara Eejipiti tiŋkin. Mara gbanti bí ki dāa sāā díǹ. An di sá yii Eejipiti yab yaa cáń tijinee, see bí yàkatī miŋmoo pu ní kí lēē diba pu kí tīī Faaroo. Bitandambi baba timmu di kaa kpántì Faaroo wanti.

Jaakɔb dàkā laakin bi máaǹ kí síb́-uee

27 Isirayeel yab nìn kóò Eejipiti tiŋkin, Gooseen tiŋgbaŋkin míǹ ní ki dūu kpántì bitindambi niin, ní ki màl̄ ki būtì tikpil. 28 Jaakɔb nìn kāl̀ abin saalku nì ali ní Eejipiti tiŋkin. U nìn ŋá abin dilaataal nì imuŋku ili nì abin aluli ní ki nín kpíì.

29 Ŋyunti ŋun Jaakɔb béè yii u tóob́ ŋkúmee ní u yíiń u-jipɔɔn Jooseefi ní ki bí-u yii: «M gbāam̀-si, á dàkà-mi a-neendi nì a-laŋŋaŋfitiiku kí dū a-ŋal kí tíkiń m-tapandi taapu^b kí pùtī kí pòon̄-mi yii m yaa kpíìyee, aa làá síb́-mi Eejipiti tiŋkin. 30 M yaa kpíìyee, á yòon̄-mi Eejipiti tiŋkin doo kí cáá-mi kí síb́ m-baabi kaakul poon.» Ní Jooseefi kíí-u yii: «M làá ŋá a nín lī puee.» 31 Ní Jaakɔb fātìi bí-u yii: «Pùtī yii a làá ŋá míǹ», ní Jooseefi pūtì. Niinee ní Jaakɔb tīntì u-dooŋu pu ki jáam̀.