Dinyeel 50

Jaakɔb síbitam nì u-kpool

1 Jooseefi baa Jaakɔb dáaĺ u-ba ki sīntèe ní Jooseefi ŋàan̄ ki cìb̄-u ní ki súń ki yáliŋkì. 2 Boonee ní u tùkū u-tɔntɔnliibi bin sá dɔkɔtabee yii bí bɔ́ntí u-baa ú taa sūū. Dɔkɔtabee nìn bɔ́ntì Jaakɔb wunti. 3 Bi nìn dū iwiin imuŋku ili ní ki bɔ́ntì Jaakɔb ki ŋmītì u-wunti ikpafi ú taa sūū. Iwiin in nyɔkɔm bi nìn dù kí bɔ́ntí utaŋkpiil ú taa sūūyee dee. Eejipiti yab nìn dū iwiin imuŋku ita nì saalaa ki súń Jaakɔb kpool.

4 Bi súń Jaakɔb kpool an jítèe ní Jooseefi bí bikpilib bin bí ki pìlīǹ Faarooyee yii: «M gbāam̀-ni, ní dàkà-mi tiniti kí tùkù Faaroo yii: 5 <Kí wàatī m-baa ń kpúee, u nìn yāntì m pūtì ki pōoǹ-u yii u yaa kpíìyee, ḿ cáá-u kí síb́ Kanaan tiŋkin, dikaakul din u bɔ́ntì ki yóoǹ u-bee poon. An puee, pɔ̄-mi nsan ḿ cùú síb́ m-baa kí fàtīí gítiń^a.>» 6 Faaroo gbìl̄ mimmee ní ki bí Jooseefi yii: «Nín̄ cá kí síb́ a-baa kii u nín yāntì a pūtì ki pōoǹ-u puee.» 7 Niinee ní Jooseefi búntì kí cùú síb́ u-baa. Faaroo tɔntɔŋkpilib kɔkɔ nì u-kpambaliŋ nì Eejipiti tindaŋkpilib kɔkɔ nìn céeǹ-u. 8 Jooseefi dicaŋkun yab kɔkɔ nì u-nabiyaamu nì u-baa dicaŋkun yab kɔkɔ nìn cūtì. Bi-biyaamu nì bi-waŋkuti baba di nìn pée kíǹ Gooseen tiŋkin. 9 Binib biba mun nìn kā tɔrɔkub ní biba mun kā itaamu ki céeǹ Jooseefi, ní bin nìn céeǹ-uee dūu ŋá dinikitikpaŋkpaandi.

10 Bi bàn̄ Ataadi naapaal din bí Jɔɔdan buŋgbandi lapu puee, ní ki kāl̀ niin ki súń Jaakɔb kpool tiŋan pu, ki gāā dituweel. Iwiin iluli ní Jooseefi dūu kāl̀ u-baa kpool niin. 11 Kanaan yab bin nìn kóò niinee nín ká bi súń Jaakɔb kpool Ataadi naapaal pu miŋyee, ní bi bí yii: «Dikpool nee sá dikpɔkpaandi ní Eejipiti yab cee.» An pu ní bi pú dinaapaal din bí Jɔɔdan buŋgbandi lapu puee yii Abeel Miisirayiim, taapu di sá yii: <Eejipiti yab kpool>.

12 Jaakɔb jipɔmbi nìn ŋá kii bi-baa nín nìn kpáafì-bi puee. 13 Bi yōoǹ-u ki cūnnì Kanaan tiŋkin ki síb́ dikaakul din sá ntaŋkpalɔkɔ ki bí Makipeela saakunee. Abraam di nìn dá kusaau gbanti Eefrɔn, ueetija cee Mamiree timbiliiki caŋin ki dūu ŋá kuceeu^b. 14 Jooseefi síb́ u-baa ki dóòyee ní ki fātìi nín gítí Eejipiti, u nì u-nabiyaamu nì bin kɔkɔ céeǹ-u u cūtìi síb́ u-baayee.

Jooseefi dū u-nabiyaamu kpitii ki pú-bi

15 Jooseefi nabiyaamu nín ká yii bi-baa kpíìyee ní bi bíi lì tɔb cee yii: «Mimmee Jooseefi yaa dū-ti ki ŋá u-poon ní ki làá téeǹ-ti ikpiti in kɔkɔ ti nìn ŋá-uee fáà!» 16 Ní bi tú bí tùkù Jooseefi yii: «Kí wàatī a-baa ń kpúee, dinyɔɔbunjoolkaal din u nìn lēe sèé: 17 <Ní tùkù Jooseefi yii m gbāam̀-u, ú dū u-nabiyaamu nín yīntiǹ-u puee nì bi nín ŋá-u ikpiti in kɔkɔee kí pɔ̄-bi.> Míǹ puee dū timbi bin nóó Unimbɔti un a-baa nìn nóóyee kpitii kí pɔ̄-ti.» Bi nín tùkū Jooseefi an bɔtee ní u bíi sūǹ. 18 Niinee ní u-nabiyaamu mu-ba dɔ́miń ki lítì u-taaŋi taapu ní ki bí-u yii: «Ti sɔ̀, dū-ti kí kpántí a-yumbui.» 19 Ní Jooseefi bí-bi yii: «Taa fàŋkìmaan! M ŋūǹ kí fōō Unimbɔti paaŋŋuɔɔ? 20 Ni bàà nìn dākafì kí ŋá-mi tikpitil ní, ama ní Unimbɔti dūu kpántì tiŋan kí ŋmā kí fīī dinibukpaandi kii an nín bíi jītí pu díǹ ni wāĺ nee ní. 21 An puee taa fàŋkìmaan. M làá nīn kpèé ni nì ni-dicaŋŋi tiŋan.» Míǹ ní u nìn sòon̄ nì bi dinyɔɔbummɔɔndi ki sɔ̄ŋkì bi-pɔbil.

Jooseefi kúm

22 Jooseefi nì u-baa dicaŋkun yab nìn gbíntì ki kóò Eejipiti tiŋkin. Jooseefi nìn ŋá abin dilaataal nì saalaa ní ki nín kpíì. 23 Jooseefi ká u-jipɔɔn Eefiraayiim biyaamu áli anaantitɔntɔkɔ ata, ní ki ká u-naantiiu Makiir, Manasee jipɔɔn biyaamu mun. 24 Bi bí míǹ dalbee ní Jooseefi tùkū u-nabiyaamu yii: «Man làá kpú ní nee, ama Unimbɔti làá dāá pée tūtuǹ-ni. U làá dāá nyāntí-ni kitiŋ nee poon kí cáá-ni kí cùnnì kitiŋ kin u nìn pūtì ki pōoǹ yii u làá tīī Abraam nì Isaaki nì Jaakɔbee.» 25 Ní Jooseefi yāntì Isirayeel yab pūtì ki pōoǹ-u, ní u lī-bi yii: «Unimbɔti làá dāá pée tūtuǹ-ni ní. Ní dāá kpáaǹ m-kpabiŋ kí nyā kitiŋ nee poon^c.» 26 Jooseefi ŋá abin dilaataal nì saalaa ní ki nín kpíì. Bi nìn bɔ́ntì-u ki ŋmītì u-wunti ikpafi ú taa sūū, ní ki dū-u ki ŋá dakaa poon ki síiǹ Eejipiti tiŋkin niin.