Dinyeel 49

Jaakɔb sòon̄ ki bīiǹ u-jipɔmbi saalaa nì bilee pu

1 Jaakɔb yíiń u-jipɔmbi ní ki bí-bi yii:

«Ní kpāfìmaan m-cee ḿ tùkù-ni

tin làá fu bàń-ni fool boonee.

2 Jaakɔb jipɔmbi, ní dāá kpāfìmaan kí pīlifì!

Ní dāá pīlifì man ni-baa Isirayeel.

3 Sii Rubeen, m-jipɔŋkpiliu,

sii di dàkā m-ninjati,

sii ní m péé ki màl̄

m-fatikuu nín dáá tùm̀ee.

A cáá tinyool nì mpɔn

ki jítiǹ a-naalib kɔkɔ.

4 A pɔ̄ɔ̄ kii nnyinjilee,

aa làá nīn gíti cáá ujipɔŋkpil nyooti.

Di sá yii a dōoǹ nì man a-baa nimpuu

ki kɔ́ǹ m-dooŋu tijɔkɔndi^a.

5 «Simeeyɔn nì Leefii sá kuyuu nì ku-bukul ní,

bi kpáfì kinyɔkɔ ki ŋá tipɔmbɔti.

6 Maa kútì bi-nyɔɔpeeŋu poon,

bi-kpāfitam kaa fáatì-mi.

Di sá yii bi gíí diŋuul ki pɔ̄fì binib^b,

bi ŋá inimbinaakulim ki gāatì ki kūū inajaa.

7 M ŋá bi-ŋuul fám,

kun puee bi dū-dì ki ŋá tipɔmbɔti.

M ŋá bi-búm fám,

kun puee bi dū-mì ki ŋá inimbinaakulim.

M làá yàkatī-bi kí tɔ̄ Jaakɔb niboolii kansikin.

M làá yàntī bí yàl̄ kí kɔ́ Isirayeel tiŋki kɔkɔn.

8 «Juuda, a-nabiyaamu làá dāá nyɔ̄ŋkì-si,

a làá dāá pɔ̄ɔkiǹ a-nannanliibi sɔ́kɔ sɔkɔ.

A-nabiyaamu làá dāá gbàan̄ a-nimbiin.

9 M-jipɔɔn Juuda, a sá digbikintipɔmbil

din nyáń njim ki fātìi gítìńee ní.

Gbikinti yaa gítìń ki dōoǹee,

ŋma di ŋūǹ kí ŋá-u mpɔn ú yīkì^c.

10 Sii Juuda ŋaan ní dibeel làá nīn pée bí,

a-dicaŋkun ní mpɔn làá nīn bí,

kí nīn cí un baasii yì dibeelee ń bàń.

Úǹ ní atimbun kɔkɔ làá dāá nīn tɔ́.

11 U dāa dù u-maŋki kí gbìn̄ fiinyi subu,

fiinyi supanjal pu ní u dāa dù u-mambiki kí kúĺ.

Ndamam poon ní u dāa fíntí u-bɔkutil,

fiinyi damam poon ní u dāa fíntí u-bɔkutikpaandi.

12 U-nimbiliŋ dāa máǹ kii ndamamee,

ní u-nyiŋŋi dāa pīiǹ kii nnaabiimee.

13 «Sabulɔn dāa kóò tiŋku gbandi ní.

Niin ní meelab dāa yūlifí.

U-tiŋki dāa wāā kí tin sāā Siidɔn.

14 «Isakaar sá kimaŋ kin yáàyee ní,

kì dɔ̄ awaŋgul ali kansikin^d.

15 U ká yii laakin u dɔ̄ ki ŋùŋfēe ŋān̄,

ní kitiŋ mun kítì.

U dū u-ba ki tīī kí túń awaŋgul,

ki sīntiǹ u-ba kí tɔ̄ uyumbu tundi.

16 «Daani làá dāá jī dibeel u-samaau pu

kii Isirayeel naakɔti kɔkɔ poon an nín bí puee.

17 Daani sá ukoobu un dɔ̄ didandi puee,

kii ukoowaati un dɔ̄ nsannee.

Ukoobu júntí utaamu tagbíŋŋi,

ní utanjakal ń lítí tiwantampin.

18 «M-Dindaan, a-fiil pu ní m máká.

19 «Gaadi nannanliibi làá dāá cíliń u-pu,

ama úǹ di làá dāá lábití kí jà-bi.

20 Aseer tiŋki làá dāá lòoǹ tijimmɔntiil,

tijin tin kítì bibɔtiibi ń jēe.

21 «Neefitalii sá upeeman un tɔ́ u-bee,

u màal̀ mbinyanyaammu.

22 «Jooseefi sá busubu bun lòoǹ tikpilee ní,

bu yú nnyimbul caŋin,

ní bu-pandi fɔ̄kɔǹ ki lībitì digundi.

23 U-nannanliibi táká-u.

Bi kā u-pu kàti kati ki tòó-u ipiin,

24 ama ní u ŋúb́ u-tɔbu an píkí,

u-ŋal tèen̄ ki yáb̀.

Jaakɔb Nimbɔtiu un sá Mpɔŋkɔdaan

ki kpàá Isirayeel,

ki sá u-taŋkpanaakookuee di tútúǹ-u.

25 Man a-baa Nimbɔtiu un tútúǹ-see puee,

Unimbɔti Mpɔŋkɔdaan un bīī a-boonee puee,

á fōō tiŋan tin sá utaa ki nyēeń yilpuee,

kí fōō tiŋan tin sá nnyim ki bí taapuee,

kí fōō tiŋan tin sá binib nì tiwaŋkuti maabutiŋuee.

26 Dibiindi din m fōō m-baabi ceeyee,

dibiindee jítiǹ din nyēeń

ajoon ŋin pée bí jaanjaanee pu,

ki jítiǹ cannaaku gbantammu pu.

Sii Jooseefi ń fōō dibiindi gbanti,

dí nīn bí sii un Unimbɔti lēē a-nabiyaamu kansikinee pu.

27 Beenjameen sá sinsiŋku un tɔ̀ntī tinanee ní.

Kutaafaauee u cútí upeel ní kí ŋmɔ́

ní kujoouee ú dū tinan tin kíǹee kí yàkatī.

28 «Bíǹ gbanti kɔkɔ di kpáfì ki sá Isirayeel naakɔti saalaa nì tilee. Tibɔjoolkaal tin bi-baa nìn sòon̄ nì bi ŋyunti ŋun u nìn bīiǹ bi-puee dee. U nìn tīī báà ŋma nì u-biindi nín sá puee.»

Jaakɔb kúm

29 Jaakɔb kpáafì u-jipɔmbi yii: «Kɔŋkɔnnee, m làá kpì kí cùú ŋàl̄ m-baabi. M yaa búntèe, ní síb́-mi m-baabi kaakul din sá ntaŋkpalɔkɔ ki bí ueetija Eefrɔn saakunee. 30 Ntaŋkpalɔkɔ gbanti bí Makipeela ki pìlīǹ Mamiree timbiliiki kin bí Kanaan tiŋkinee. M-naanja Abraam di nìn dá kusaau gbanti Eefrɔn cee án nīn sá-u kuceeu^e. 31 Niin ní bi síb́ u nì u-nimpuu Saara, ní ki síb́ m-baa Isaaki nì u-nimpuu Reebeeka. Niin ní ma mun síb́ m-nimpuu Leeya. 32 Eeti yab cee ní u nìn dá kusaauee nì ntaŋkpalɔkɔ gbanti.» 33 Jaakɔb nín kpáafì u-jipɔmbi míǹ ki dóòyee ní ki fātìi dōoǹ, ki dáaĺ u-ba ki sīntì ki nín cá u-naanjab cee ditaŋkpiilin^f.