Ngoa ro kawara loakud̄u aina kabare d̄i ahli-ahli Taurat ro d̄i dou-dou Farisi
23:1-12
23
Edempara Isa nggahina d̄i dou mamboto ede ro d̄i anamori^doho-Na, 2 <<Ahli-ahli Taurat ro dou-dou Farisi rakana kuasa ^dimaka'aona hukum Taurat. 3 B̄ara ndedena to'akaipu ro b̄atu sara'apu au ra kaukai b̄a siad̄oho.Pala aina kalampamu au ra karawi b̄a siad̄oho, b̄ara siad̄oho wati kalampana au ra tei b̄a ndai siad̄oho. 4 Siad̄oho narahoku lampa rawi ma nggonggi ro nambeiku atoran-atoran ma tani, pala kone sato'i rau siad̄oho wati ne'ena bantu dou ma kalampana. 5 Samenana ra karawi b̄a siad̄oho loakud̄u ^di'eda b̄a dou mpa. Siad̄oho nakani ntiriku ai sambeakai ma paja-paja ro nakaniku jumba ma ^dondo-^dondo.t 6 Siad̄oho naca'u doho ta tando hid̄i ma taho poda wunga warasi ndiha ro ndede rauku rawi siad̄oho d̄i uma-uma sambea ro ibadakai. 7 Siad̄oho naca'u ^dihoroma b̄a dou d̄i amba-amba, ro ^di'oukai <Pa Guru>. 8 Pala nggomid̄oho, aina ngawamu ^di'oukai <Pa Guru>, b̄a one Gurumu sab̄ua mpa ro nggomid̄oho sara'ana eded̄u sa'e lab̄o ari. 9 Ro nggomid̄oho aina oumu <Ama> kone d̄i sab̄ua dou rau d̄i dunia ake; b̄ara Amamu sab̄ua mpa, eded̄u Ama ma wara aka saroga. 10 Ro nggomid̄oho aina ngawamu ^di'oukai <Dou mana'ekai>, b̄ara dou mana'ekaimu wara sab̄ua mpa eded̄u Sangaji Makasalama ra sake b̄a Allah Ta'ala. 11 Dou ma wancu na'e d̄i ade weki nggomid̄oho, pab̄uaku ndad̄i dou d̄imakarawi weamu. 12 Ro cou-cou ma ka'ese weki ^dika'awa ro dou ma ka'awa weki ^dika^dese.>>Isa Al Masih kancarana dou ma ca'u coro-coro
23: 13-28
13 Sawa'u b̄a ede, Isa nggahi walina, <<Ihara nggomid̄oho ahli-ahli Taurat ro dou-dou Farisi! Nggomid̄oho ma ca'u coro-coro. Nggomid̄oho matapaku dou d̄imandad̄i anggota Karaja'an Saroga. Ndai nggomid̄oho wati ne'emu ndad̄i anggota Karaja'an Saroga ro dou makalai ma ne'e ndad̄i anggota Karaja'an Saroga, matapaku b̄a nggomid̄oho.
14 Ihara nggomid̄oho ahli-ahli Taurat ro dou-dou Farisi: Nggomid̄oho ma ca'u coro-coro. Nggomid̄oho ma tipuku dou-dou siwe mbaru mboha, ma weha pakasaku umana ro ^di^bontokai rawimu madab̄ae ede nggomid̄oho mado'aku ma ^dondo-^dondo. B̄ara ndedena hukuman d̄i ru'u b̄a nggomid̄oho pea nataniku!
15 Ihara nggomid̄oho ahli-ahli Taurat ro dou-dou Farisi! Nggomid̄oho ma ca'u coro-coro! Nggomid̄oho malao d̄o'o ro masapaku moti ro makaliliku dana ro rasa d̄ikandad̄ikaimu sab̄ua dou mab̄atu agamamu. Nggara wa'usira dou ede b̄atuna agamamu, nggomid̄oho makandad̄iku dou ede d̄ua kali ncewi dab̄ae ntewikaisi lab̄o nggomid̄oho.Nda^dina sia ede tantu ^dimalu'u ade anaraka.
16 Ihara nggomid̄oho dou-dou mana'ekai ma mbuda! Nggomid̄oho mateiku ake, <Nggara dou nasumpasi kai Bait Allah, dou ede wati pab̄ua kalampana sumpana; pala nasumpasi kai masa d̄i ade Bait Allah, sia pab̄uaku kalampana sumpana ede.> 17 Nggomid̄oho dou-dou sampula ma mbuda! B̄e ma ipi penti: masa atao Bait Allah ma kandad̄ina masa ede raso? 18 Nggomid̄oho mangoa ro tei rauku, <Nggara sab̄ua dou nasumpasi kai mezba, dou ede wati pab̄ua kalampana sumpana; pala sia nasumpasi kai au ra d̄onggo ro mbeina d̄i wawo mezba ede, sia pab̄uaku kalampana sumpana ede.> 19 Nawancuku mbudamu nggomi^doho! B̄e ma ipi penti? ^Donggo ro mbei atao mezba ma kandad̄ina au ra d̄onggo ro mbei ede raso? 20 B̄ara ndedena, nggara sab̄ua dou nasumpasi kai mezba, ede aona sia sumpana kai mezba ro sara'a ra d̄onggo ro mbei ma wara ese wawo mezba. 21 Ro nggara sab̄ua dou nasumpasi kai Bait Allah, ede aona sia sumpana kai Bait Allah ro d̄i Allah Ta'ala ma ngge'e d̄i hid̄i ede. 22 Ro nggara sab̄ua dou nasumpasi kai saroga, ede aona sia sumpana kai hid̄i dohokai Allah Ta'ala ro d̄i Allah Ta'ala ma dohokaina.
23 Ihara nggomid̄oho ahli-ahli Taurat ro dou-dou Farisi! Nggomid̄oho ma ca'u coro-coro, marakani lo'i: selasi, adas maci ro jintan rau, nggomid̄oho mambeiku saru'u ade ra cengga sampuru d̄i ru'u b̄a Ruma. Sapodakaina lampa rawi-lampa rawi ma ipi penti ade hukum Taurat eded̄u lampa rawi ma adil, kasi ade ro to'a wati kandad̄i au b̄a nggomid̄oho.Sapodakaina edeku d̄ipab̄ua karawi b̄a nggomid̄oho ro aina nefamu ma kalai rauna. 24 Nggomid̄oho dou-dou mana'ekai ma mbuda! Karoku ade oi nonomu makalosa pakiku b̄a nggomid̄oho, pala onta manonoku b̄a nggomi^doho!
25 Ihara nggomid̄oho ahli-ahli Taurat ro dou-dou Farisi! Nggomid̄oho ma ca'u coro-coro! Pingga ro mangkomu ma'alo karasoku b̄a nggomid̄oho ta ari kontu mpoana, sapodakaina ta ^deina nawancuku sampuna kai lampa rawi ra raka b̄a nggomid̄oho kai kasa ro na'e ademu. 26 Oe dou Farisi ma mbuda! Alo karaso wa'upu ta d̄ei pingga ro mangkomu ede, loakaina raso ta kontu rauna!
27 Ihara nggomid̄oho ahli-ahli Taurat ro dou-dou Farisi! Nggomid̄oho ma ca'u coro-coro! Nggomid̄oho b̄une rade ra ka^bura; ta arina natada ntika, pala ta ^deina b̄ini kai b̄a peke ro sara'a ma wou mbai. 28 ^Bune edeku nggomid̄oho.Ta arina tada tahomu d̄i dou; pala ta ^deina nggomid̄oho b̄ini kai b̄a coro-coro ro sapamu parenta-parenta Allah Ta'ala.>>
Hukuman d̄i ru'u b̄a ahli-ahli Taurat ro dou-dou Farisi
23:29-36
(Luk. 11:47-51)
29 Edempara Isa nggahi walina, <<Ihara nggomid̄oho ahli-ahli Taurat ro dou-dou Farisi! Nggomid̄oho ma ca'u coro-coro! Nggomid̄oho mandawiku rade ma ntika-ntika d̄i ru'u b̄a nabi-nabi ro maca'u kantika rade dou-dou ma rakarawi ma taho. 30 Ro nggomid̄oho manggahiku, <Pai nami mamori aipu jaman wa'i ro waro nami ntoina, nami wati d̄imab̄atu b̄une siad̄oho ma hade nabi-nabi.> 31 Ndad̄i nggomid̄oho mangaku b̄a ndaimu b̄a one nggomi^dohoku londo ro mai dou-dou ma rahade nabi-nabi! 32 Nggara ndedesi, karawi ntuwupu ro sala'i walipu dosa-dosa ra wa'u tampu'u b̄a wa'i ro waromu ede! 33 Nggomid̄oho dab̄ae ro londo ro mai dou dab̄ae b̄une sawa mawari! ^Buneku loakaimu hori weki ra d̄i hukuman d̄i ade anaraka? 34 Kade'e katahopu: Nahu ma nggadu nabi-nabi d̄i ru'u b̄a nggomid̄oho, dou-dou ma loa timba ro lemba ro ahli-ahli Taurat, wara d̄i ade weki siad̄oho ^dihade b̄a nggomid̄oho ro wara rau d̄isalib b̄a nggomid̄oho.Wara ^dikancoki b̄a nggomid̄oho d̄i ade uma-uma sambea ro ibadakai ro coco rero b̄a nggomid̄oho d̄i sab̄ua kota ro d̄i kota ma kalaina. 35 B̄ara ndedena, nggomid̄oho d̄ihukum b̄ara hade sara'amu dou ma wati wara ncara – ratampu'u hadekai la Habel ma wati wara ncara, sampe hademu la Zakaria ana la Berekia, ra hade b̄a nggomid̄oho d̄i hela d̄ua Bait Allah lab̄o mezba. 36 Imbipu: Sara'ana ede ^disu'u ro tundu b̄a dou-dou jaman ake.>>
Isa Al Masih kasi adena d̄i Yerusalem
23:37-39
(Luk. 13:34-35)
37 <<Yerusalem, Yerusalem! Nabi-nabi hade b̄a nggomi. Dou-dou ra nggadu b̄a Allah Ta'ala to^ba b̄a nggomi kai wadu sampe madena. Wa'ura pila-pila kali Nahu ne'eku pohu sara'a ela ro doumu, b̄une ina janga ma ^bonto ana-anana kai kaletena, pala nggomi wati ngawamu! 38 B̄ara ndedena Allah Ta'ala watid̄u ^dimalab̄ona nggomi. 39 D̄i ^badekaimu: Tampu'u ake, nggomi wati d̄ima'eda Nahu wali sampe nggomi nggahimu, <^Dibareka b̄a Ruma, Sia ma mai wa'a ngara Ruma.> >>