Isa Al Masih weha ao b̄a dou kai ndiha poda d̄i Yerusalem
21:1-11
21
Wakatu Isa ro anamorid̄oho-Na wa'ura ^deni lab̄o Yerusalem, siad̄oho ronggana d̄i Betfage d̄i doro to'i Zaitun. Ta ede Isa kauna d̄ua dou anamori-Na lampa ulu. 2 Nggahi-Na, <<Laopu aka rasa d̄i tando ede, nggomid̄oho ma'edaku, sab̄ua keledai lab̄o anana ra^diki. Horipu keledai ede ro mai wa'a ca'arapu. 3 Nggara warasi dou ma sod̄i au-au, ngoapu d̄i dou ede, <Rumar maparaluna>, ro Sia ^dima^bali rocina.>>4 Lampa rawi ede ndad̄ina ncihi ncao b̄une ra karongga b̄a nabi,
5 <<Nggahipu d̄i Sion,
Sangajimu wunga maina ara nggomi
Sia ka'awana weki ro nentena keledai siwe,
ro sab̄ua ana keledai.>>
6 Edempara d̄ua dou anamori-Na ede laona ro kalampana au ra kaukai b̄a Isa d̄i siad̄oho. 7 Siad̄oho wa'ana keledai ede lab̄o anana. Edempara lama b̄a siad̄oho kontu keledai-keledai ede kai jumba siad̄oho.Sawa'u b̄a ede, Isa nentena keledai ede. 8 Mboto dou ta aka ma wira jumba-jumba siad̄oho d̄i ncai ro dou-dou makalai dompona sanga-sanga haju mpida ro reana d̄i woha ncai. 9 Dou mboto ma lampa d̄i tando ro d̄i kontu Isa ro siad̄oho nggahi kana'ena, <<^Dese ro ntasara! Ana Daud! Allah Ta'ala ma bareka Sia ma mai kai ngara Ruma! Roi ro wadira Allah Ta'ala Ma Wancu ^Dese Ro Ntasa!>>
10 Wakatu Isa lu'una d̄i Yerusalem, ndad̄i mboura d̄i sara'a kota ede. So^di b̄a dou-dou d̄i kota ede, <Cousi dou ake?>
11 <<Sia Nabi Isa, dou Nazaret ra d̄i Galilea,>> cambe b̄a dou mboto ma ^dende Isa.
Isa Al Masih lu'una d̄i ade Bait Allah
21:12-17
12 Sawa'u b̄a ede Isa lu'una d̄i Bait Allah ro katesa sara'ana dou ma landa ro lajo d̄i sarei Bait Allah. Sia pongana meja-meja hid̄i cepekai piti ro bangko-bangko ntau dou ma landa nasi dara. 13 Edempara Sia nggahina d̄i dou-dou ede, <<D̄i ade Kitab Suci wara ratunti b̄a one nggahi Allah Ta'ala, <Uma Nahu ^ditangarakai uma Do'a.> Pala nggomid̄oho makanda^dikaiku so^bu parampo.> >>
14 Dou-dou ma mbuda ro ma made ^binci maina d̄i Isa d̄i Bait Allah ro Sia katahona siad̄oho. 15 Pala dou-dou mana'ekai imam ro ahli-ahli Taurat mbanina b̄a edana rawi ma^bisa ro guna ra karawi b̄a Isa. Ro siad̄oho mbani rauna b̄a ringana d̄ambe-d̄ambe to'i ma nggahi d̄i ade Bait Allah, <<^Dese ro ntasara Ana Daud!>>
16 Siad̄oho nggahina d̄i Isa, <<Nggomi maringaku au ra nggahi b̄a sia^doho?>>
<<Io, Nahu karinga,>> cambe b̄a Isa, <<Watipu rabaca b̄a nggomid̄oho ade ayat Kitab Suci ake: <^Dambe-^dambe to'i ro ana dou to'i kea wa'ura tei-Mu renta roi ro wadi ma mpuruna?>>
17 Sawa'u b̄a ede Isa tu'u wi'ina siad̄oho, edempara losana d̄i kota ede ro laona aka Betania ro maruna ta aka.
Isa Al Masih sumpana fu'u ara
21:18-22
18 Wakatu si^di-si^di poda, Isa lao mbalina aka Yerusalem. D̄i ade lampa ro laokaina ede, Isa iuna hi^do. 19 Sia edana sampu'u fu'u ara d̄i kengge ncai. Edempara Sia lao rakana fu'u haju ede, pala wati edana kone sab̄ua rau wuana selasi ro'o mpoana. Edempara Isa nggahina d̄i fu'u haju ara ede, <<Nggomi wati ^dimambua wali santoi-ntoina!>> Ndad̄i fu'u ara ede male lalona.
20 Wakatu anamori-anamori Isa edana au ma ndad̄i ede, siad̄oho mbora poda akana. Edempara siad̄oho sod̄ina, <<^Buneku loana fu'u ara ede made sara'a lalona?>>
21 <<Ncihi romo,>> cambe b̄a Isa, <<Nggara nggomid̄oho ma'imbisi ro watisi mbali mbua ademu, nggomid̄oho maloaku karawi b̄une ra wa'u karawi b̄a Nahu d̄i fu'u ara ake. Ro laina ede mpoa, nggomid̄oho rau maloaku nggahi d̄i doro to'i ake, <Hantapu wekimu ro lao pakipu wekimu ade moti,> ndad̄i lampa rawi ede ^dimanda^di. 22 Ro au-au ra raho b̄a nggomid̄oho d̄i ade do'amu, nggomid̄oho ^dimatarimana, sura imbimu.>>
Mab̄oha kuasa Isa Al Masih
21:23-27
23 Sawa'u b̄a ede Isa lu'una d̄i Bait Allah, ro ngoa ro teina ta ede. Wakatu Sia wunga ngoa ro teina, dou-dou mana'ekai imam ro dou-dou ma tuakai Yahudi mai rakana Sia ro sod̄ina, <<Kai kuasa auku, sara'a ra karawi b̄a Nggomi? Cou ma rambeimu kuasa d̄i Nggomi?>>
24 Cambe b̄a Isa, <<Nahu rau mane'e sod̄i d̄i nggomid̄oho.Nggara maloasi cambe b̄a nggomid̄oho, Nahu ^dimangoamu kai kuasa auku Nahu karawikaiku lampa rawi ake. 25 La Yahya kandeu rasona dou kai kuasa cou? Allah Ta'ala atao manusia?>>
Edempara dou-dou mana'ekai imam ro dou-dou ma tuakai Yahudi mafakana d̄i ade weki siad̄oho, <<Nggara nggahisi b̄a ndai, <Kai kuasa Allah Ta'ala>, ndad̄i Sia nanggahiku, <Nggara ndedesi b̄ab̄auku nggomid̄oho wati imbikaimu d̄i sia?> 26 Pala nggara nggahisi b̄a ndaita, <Kai kuasa manusia,> ndai tadahuku d̄i dou mamboto, b̄ara samenana dou ede nawi'ikaiku la Yahya eded̄u nabi.>> 27 Ndad̄i cambe b̄a siad̄oho, <<Nami wati ^bademu.>>
Edempara nggahi Isa d̄i siad̄oho, <<Nggara ndedesi Nahu rau wati ^dimangoa nggomid̄oho kai kuasa cou Nahu karawiku samenana ake.>>
Conto ro ibara mab̄oha d̄ua dou ana
21:28-32
28 <<Ake b̄uneku kananu b̄a nggomid̄oho mab̄oha lampa rawi ake?>> Nggahi Isa sawa'u b̄a ede. <<Waraku sab̄ua ama ma ntau d̄ua dou ana mone. Dou ede laona d̄i anana ma sasa'e ro nggahina, <Ana, laopu karawi aka nggaro anggo sanai ake.> 29 <Mada wati wa'uku,> cambe b̄a anana ede. Pala sia sinci adena, edempara laona. 30 Sawa'u b̄a ede amana ede laona aka anana ma ka^duakaina ro nggahina b̄une ra nggahina d̄i anana ma sasa'e. <<Io, Ama,> cambe b̄a anana ma ka^duakaina ede. Pala sia wati laona. 31 D̄i ade weki d̄ua dou anana ede, ma^beku ma kalampa au ra kane'ekai b̄a amana ede?>>
<<Ma sasa'e,>> cambe b̄a dou-dou mana'ekai imam ro dou-dou ma tuakai Yahudi ede.
Edempara Isa nggahina d̄i siad̄oho, <<Imbipu: Dou-dou mataki tagi bea ro dou-dou siwe sunda ^dima'ulu ndad̄i anggota Karaja'an Sorga ntewikaisi nggomid̄oho. 32 B̄ara la Yahya Mataki kandeu raso dou maina ro teina nggomid̄oho cara mori ra kane'ekai b̄a Ruma, pala nggomid̄oho wati ne'emu imbi au ra ngoa ro tei b̄a la Yahya; pala dou-dou mataki tagi bea ro dou-dou siwe sunda na'imbiku d̄i la Yahya. Pala kone ma wa'ura eda samenana ede, nggomid̄oho wati ngge'epu rungkamu kananu ro wati imbimu.>>
Conto ro ibara mab̄oha dou-dou ma karawi cengga hasi nggaro anggo
21:33-46
33 Sawa'u b̄a ede, Isa nggahi walina, <<Kade'epu conto ro ibara ma sab̄ua ake wal, sab̄ua dou ma ntau dana ma nggud̄a anggo d̄i sab̄ua nggarona. Nggarona ede kuta heko b̄a sia ro ngarina kancoa hid̄i ^dipuakaina anggo, sawa'u b̄a ede tu'una sab̄ua salaja mad̄ese ^dijaga ro ^ditonggukaina nggaro ede. Sawa'u b̄a ede sia kauna pila-pila dou ma karawi cengga hasi nggaro anggona, edempara dou ede laona d̄i dana ro rasa ma kalai. 34 Wakatu rakara oru wehakai hasi anggo, dou mantau nggaro ede kauna lao ada^dohona aka dou ma karawi cengga hasi nggaro ede ^ditarimakaina ru'una. 35 Pala dou-dou makarawi nggaro ede wa'u ro letona ada-ada dou mantau dana ede: Ma sab̄ua ^boena, ma kalaina hadena ro ma kalai wali to^bana kai wadu. 36 Dou ma ntau nggaro ede kau walina lao ada^dohona makalai, ma ncewi mboto ntewikaisi ma sarambakaina. Pala siad̄oho iuna b̄une ra iu b̄a lenga^dohona ma ulu. 37 Cumpukaina dou mantau nggaro ede, kauna lao ana ndaina, <Tantu ana nahu ^dilia ro horomana,> kananu b̄a sia. 38 Pala dou-dou makarawi nggaro ede edana ana dou mantau nggaro ede, nggahi siad̄oho d̄i sab̄ua lab̄o ma kalaina, <Akeku sia, ^dimakapasakana. Mai ndai tahadeku sia, loakud̄u raka b̄a ndai pasakana!> 39 Edempara ana dou ede wa'u ro leto b̄a siad̄oho, hadena, edempara pakina ta ari mai b̄a nggaro.>>
40 So^di b̄a Isa, <<Nggara dou mantau nggaro ede namai mbalisi, ^dikab̄une b̄a dou mantau nggaro ede d̄i dou-dou ma karawi cengga hasi nggaro ede?>>
41 Cambe b̄a siad̄oho, <<Dou-dou madab̄ae ede, tantu ^dihade edempara nggaro anggo ede nakauku karawi cengga hasi d̄i dou makalai ma ngawa mbei ru'u d̄i sia hasi dana ede rakasira wakatuna.>>
42 Edempara nggahi Isa d̄i siad̄oho, <<Sab̄ua watipu ra baca b̄a nggomid̄oho ra tunti ade Kitab Suci?
<Wadu ma wati loa ^dikani b̄a dou-dou mataki tu'u uma
nawa'ura ndad̄i wadu ma ipi penti.
Ake rawi Ruma;
nawancuku ntikana!> >>
43 <<Ndad̄i kawarapu,>> nggahi Isa, <<Sara'a hakmu d̄i ade Karaja'an Allah ^diweha mbali d̄i nggomid̄oho ro nambeiku d̄i sab̄ua bangsa ^dimakalampana parenta-parenta Allah Ta'ala. 44 Dou ma mab̄u d̄i wadu ede, ^dimaleli; ro dou rapita b̄a wadu ede, ^dimaleli ndad̄i kalu^bu.>>