Isa Al Masih katahona sab̄ua dou ma supu ncola
8:1-4
8
Sawa'u b̄a Isa londona d̄i doro to'i, mboto dou mab̄atu Sia. 2 Wakatu ede, Sia mai raka b̄a sab̄ua dou ma supu ncola.f Dou ede sujuna d̄i tando Isa, edempara nggahina, <<Ruma, nggara Ita mangawasi, Ita maloaku kataho supu mada.>>3 Edempara Isa ^dalana rima ro ^dama-Na dou ede. Nggahi Sia, <<Io, Nahu kangawa. Tahora nggomi!>> Wakatu ede wa'u mbora lalo supu dou ede. 4 Edempara nggahi Isa d̄i dou ede, <<D̄i kawaramu! Aina ngoamu kone d̄i cou-cou rau mab̄oha lampa rawi ake. Pala ake laopu aka imam ro katadapu sarumbumu d̄i imam b̄a one nggomi wa'ura taho supumu. Sawa'u b̄a ede lao d̄onggo ro mbeipu koroba b̄une ra kaukai b̄a la Musa, ^dibukutikaimu d̄i dou-dou b̄a one nggomi wa'ura poda-poda taho supumu.>>
Isa Al Masih katahona supu ada Perwira Roma
8:5-13
(Luk. 7:1-10)
5 Wakatu Isa lu'una aka kota Kapernaum, sab̄ua dou perwira Roma mai rakana Sia ro rahona bantu d̄i Isa. 6 <<Ruma,>> nggahi perwira ede, <<Ada mada wunga supuna aka uma. Sia nasupu made ^binci ro nawancuku ncoki iuna.>>
7 Nggahi Isa d̄i perwira ede, <<Nahu d̄imalao katahona.>>
8 Pala cambe b̄a perwira ede d̄i Isa, <<Ruma, mada wati patuna d̄imatarima Ita d̄i uma mada, tanggahi mpa sampu'u, ndad̄i ada mada ede ^dimataho. 9 B̄a one ndai mada rau pab̄uaku b̄atu au ra parentakai b̄a dou mana'ekai mada. Ro awa mai b̄a mada wara rau tentara-tentara. Siad̄oho pab̄uaku b̄atuna au ra parentakai b̄a mada. Nggara kausi b̄a mada d̄i sab̄ua tentara, <Lao!> Sia nalao. Nggara nggahisi b̄a mada ^dimakalaina, <Maipu ta ake!> Sia namai lalo; ro kausi b̄a mada ada mada, <Karawipu ake!> Sia tantu nakarawiku.>>
10 Wakatu ringa b̄a Isa au ra nggahi b̄a perwira ede, Sia nawancuku midi adena. Edempara Isa nggahina d̄i dou-dou ma b̄atu Sia, <<Nahu manggahi d̄i nggomid̄oho, sapodakaina imbi ma na'e b̄une ake watipu parana eda b̄a Nahu kone sab̄ua dou rau d̄i ade weki dou Israel. 11 Mboto dou ma ramai ele mai ro ma ramai d̄i mai, mangaha sama-sama lab̄o la Ibrahim, Ishak lab̄o la Yakub d̄i ade Karaja'an Saroga.
12 Sapodakaina dou-dou ede d̄imandad̄i anggota Karaja'an Saroga, pala ^dipaki ari lua d̄i hid̄i marindi ncaki. Ta ede siad̄oho ^dimanangi ro ^dimasusa ro ncoki.>> 13 Edempara Isa nggahina d̄i perwira ede, <<Dulara, b̄une ra imbi b̄a nggomi ede ^dimanda^di.>>
Ndad̄i d̄i wakatu ede wa'u ada perwira ede taho lalo supuna.
Isa Al Masih katahona supu riana siwe la Simon Petrus ro dou-dou makalai
8:14-17
14 Sawa'u b̄a ede, Isa laona aka uma la Petrus. Ta ede Sia edana riana siwe la Petrus ma wunga hengge sari'i d̄i hid̄i marukaina. 15 Isa ^damana rima dou siwe ede, edempara mbora lalo henggena. Dou siwe ede tu'u ro kab̄ua weana ngaha ro nono d̄i ru'u b̄a Isa.
16 Wakatu ne'era mbia ai, mboto dou ma mai wa'a d̄i Isa dou-dou ra lu'ukai b̄a roh setan. Ro kai sampu'u nggahi mpa, Isa katesana roh-roh setan ede ro kataho rauna sara'a dou ma supu. 17 Isa karawi sara'ana ede ncihi ncao b̄une ra nggahi b̄a Nabi Yesaya eded̄u, <<Sia ^dimatanggungna susa ro ncoki ndai ro makatahona supu ndai.>>
Dou-dou ma ne'e ndad̄i ana mori Isa Al Masih
8: 18-22
(Luk. 9:57-62)
18 Wakatu Isa edana mboto poda dou ma mai raka-Na, Sia kauna dou-dou ma b̄atu Sia lao ipa b̄ae b̄a ndano. 19 Edempara sab̄ua dou guru agama mai rakana Isa ro nggahina, <<Guru, mada kane'e b̄atu Ita ta b̄e ralaokai Ita!>>
20 Cambe b̄a Isa, <<Lako doro nantau karombo, nasi nantau so^bu, pala Ana Manusia wati ntauna hid̄i ^disanawakaina.>>
21 Edempara nggahi b̄a sab̄ua dou ade weki dou-dou ma b̄atu Isa, <<Ruma, mada maraho ijin d̄i Ita, mada d̄imalao umbu wa'u amaku ma wa'ura made.>>
22 Pala cambe b̄a Isa, <<^Batupu Nahu, co'opu dou ma made na'umbu mpa b̄a dou ma made.>>
Isa Al Masih kadenggana angi na'e
8:23-27
23 Edempara Isa lab̄o anamorid̄oho-Na ne'ena sampa. 24 We^di lalo mpa mai angi na'e d̄i ndano ede ndad̄ina sampa ^boe b̄a balumba. Wakatu ede, Isa wunga maruna. 25 Edempara anamorid̄oho-Na mai rakana Isa ro ro^duna Sia, <<Ruma, ta bantu to'ipu! Lelira ndai!>>
26 Nggahi Isa d̄i siad̄oho, <<^Ba^bauku dahukaimu, oe nggomid̄oho ma kura imbi?>>Sawa'u b̄a ede Isa tu'u ki^dina ro ficana angi ro ndano ede. Edempara ndano ede midi lalona.
27 Anamori-anamori Isa mbora mena akana. Nggahi siad̄oho, <<Cousi Dou ake? Nda^dina angi ro balumba rau na^batuku parenta Sia!>>
Isa Al Masih katahona d̄ua dou ralu'ukai b̄a roh setan
8:28-34
28 Sawa'u b̄a ronggana ipa b̄ae b̄a ndano d̄i dana ro rasa Gadara, Isa mai raka b̄a d̄ua dou ra lu'ukai b̄a roh setan. Dou-dou ede losana ra d̄i karombo-karombo ma wara d̄i rade ro nawancuku mbanina, ndad̄ina wati wara kone sab̄ua dou rau ma disa lampa sai hid̄i ede. 29 Siad̄oho kanggica ro nggahina, <<Oe Ana Allahg d̄ika^bunemu nami ake? Sab̄ua Nggomi mane'eku kancoki nami, kone watipu raka wakatuna?>>
30 Wati d̄o'ona lab̄o hid̄i ede, wara wawi ma mboto poda ma wunga ngupa ngaha. 31 Roh-roh setan ede rahona d̄i Isa, <<Nggara Nggomi makatesasi nami ra d̄i dou ake, kaupu nami lu'u d̄i wawi-wawi aka.>>
32 Nggahi Isa d̄i siad̄oho, <<Lao!>> Edempara roh-roh setan ede losana d̄i d̄ua dou ede ro lu'una d̄i wawi-wawi ede. Wawi-wawi ede lao raina ro babuna d̄i kengge rengge ro lu'una d̄i ade ndano, edempara made mimina.
33 Dou-dou ma tonggu ro sandaka wawi-wawi ede lao raina aka kota ro ngoana samenana ma ndad̄i ede d̄i dou-dou. Ro ngoa rauna au ma wa'ura ndad̄i d̄i dou d̄uana ma ralu'ukai b̄a roh setan ede. 34 Ndad̄i sara'a dou d̄i kota ede lao rakana Isa. Wakatu siad̄oho edana Isa, siad̄oho raho poda-podana loakud̄u Isa tu'u wi'ina dana ro rasa siad̄oho.