Khongoroꞌosay wakinay gu tle⁄eẽ gu ila⁄imbidu
34
1 Da hheꞌesi, Taataa Iliitleemu gi kaay sa Musaa tuba, “Gongoriisi khongoroꞌosay cada gu tle⁄eẽ hhakira pahha gu pandaa. Ana handikima khongoroꞌosay keesii, gimbakira gwaa waara daqa khongoroꞌosaykiray gu pandaa gaa cu⁄udi. 2 Heetlaalee hari heetlawaa, hangoo ilakhuukhuꞌuside loo ilakhiinaaꞌata cina da oõ gu Sinaayige, mangi slaslayni haa ana. 3 Heedi lensee yaa hhanti khay sliimaa haa ugu. Kara heedi lensee dugu hhanti arina daqa lenge see onke, gimati bee⁄u, aaraa haa yakway digi hhanti deꞌena ilaciyaa haa oõ.”4 Teesaaqay, Musaa gi gongoriisi khongoroꞌosay cada gu tle⁄eẽ, hhakira pahha gu pandaa. Ina gi waaudi hari heetlawaa dati kahhi tumpaatumpu gi ilakhiinaaꞌadi oõ gu Sinaayige, idoo dugwaa ilii ilafahhi gooay ha Taataa Iliitleemu, gii oyi khongoroꞌosaykira cada gu tle⁄eẽ dabaiĩ kosii. 5 Da hheꞌesi, Taataa Iliitleemu, yaagii ⁄eeti waꞌay gu tlongiyage wana, gi qadidi sliimaa haa Musaa, gi kakaami uma gosi, “Taataa Iliitleemu.” 6 Ina gi teesaaqay laqi hari amoo da hiicata hari pandaa da Musaa kakaana tuba, “Ana, Taataa Iliitleemu, Taataa Iliitleemu, ti Iliitleemu gu kooma ⁄awaariru haa hhoinay gu didiru, hoó slahhaaꞌaaba cira, haati haci slaꞌamuu haa nati lou. 7 Ana hoóti laqama slaꞌamuu goóba hiifaakoo sa elefafaa da hida, haa gigi ilamooyima tlakwaroo dooina haa dakoo dooina. Teesaaqay see, yoó mayaaba ⁄agitiru heedi gu kooma tlakwaroo. Slime, ina yoó ⁄agitina yaꞌay haa yaꞌay gu yaꞌay koina, sa tlakwaroo da ayiĩ koina, laqwaloo da tami haa da cigahha see.”
8 Cirakiray Musaa gi keebeeꞌedi hhapeege haa gi firimi Taataa Iliitleemu. 9 Ina gi kaay tuba, “Ye Looimoo gu goõ, bere haã slay hhoinay gu didiru pandaa dooguu, ana hagu firima poo sliimaa haa dandiray. Hida hhanki giyaamati sagaiĩ karaarahhiri, handi ilamooyinte tlakwaroo doori, handi oode ma hida koku tleehhidani ugu loi.”
Ila⁄imbidu dugu hii⁄abeesi
10 Taataa Iliitleemu, gi kaay sa Musaa tuba, “Yuꞌudiyaa ha qaasa ila⁄imbidu pandaa da hida kokuu goõ. Pandaa dooinay goõ ha yondiida gimba gu bakaꞌasa da kahhiye yondu hhapee wakayge, ma khooroo gonge see. Hida goõ hhaã ugu goó ibiida haa inay, arinay yondu gooi gu denu, idoo gi iliiwane gu bakaꞌasa. Hayondiida gimbaki sa ugu pandaa dooinay. 11 Unkuray kwanda ga oodee ilakaawa goõ sangu hadise sa unkuray letuti. Yuꞌudaa, ana ha gusima pandaa doogunaa Waamoori, Wakanaani, Wahiiti, Wapereesi, Wahiifi haa Wayebuusi. 12 Unkuray hangu ga⁄aydee, hhanti ⁄isintay ila⁄imbidu lensee haa hida gu hhapetee, ga kakaakaydee. Gimbakee maa ba⁄atii hatliroo tleehhidi tla⁄aã googunay. 13 Unkuray kwanda ga tlakweemisidee sumuku masabaahu koina, loolokhoma tle⁄eẽ koina gu iliifiriiriru haa tlaaqa sumuku unguruꞌu gu iliitleemitoꞌoo dooina Aseera. 14 Sa gimbakee, unkuray hhanti firiirintay iliitleemu lensee waku, sa gimba ana Taataa Iliitleemu diniti khui hari umaki, ‘Gu kooma tloomu,’ ana ti Iliitleemu gu kooma tloomu.
15 Unkuray hhanti ⁄isintay ila⁄imbidu lensee haa hida gu hhapetee, sa gimba qatlay gi ilii slipalauumidiyee daqa iliitleemamee koinay gu afaꞌafuuma haa gigi tambikinay, dangumaa kwahasuusi, unkuray dangumaa laalaagi gi ⁄agintay sadaaka giroó tambikinee iliitleemamee koina, 16 haa qaraiya dooguna gi khabiibinay sagameeru gooina, sagameerukee goó firiirimee iliitleemamee koina, gi laalaaginay qaraiya dooguna ma yondiidiri slipalauumaa haa iliitleemamee koina.
17 Unkuray sangi hhanti boo⁄imisiday iliitleemamee gu sikhimi haa gigi firiirintay.
18 Unkuray kwanda ga losonuumisidee losona gu mukaatee doóba iliiqaasa hamiira. Qoomay gu balalu fanqu hamaa ⁄agintay mukaatee doóba iliiqaasa hamiira, idoo hangwaa ilii ilakaay gooay. Teesaaqay laqa, hari qatlay daa ilakaay slehheẽ gu Abiibuge, hikee na slehheẽ gu cigahha, sa gimba slehhekeesii unkuray haganaa iliica⁄adiri hhapee da Misirigo.
19 Kila badiisu gu hhawata ti koy, sliimaa haa badiisasaa da hhawatee da kuꞌunaanay googu goõ, gu yakway haa gu bee⁄u. 20 Badiisu gu daqway haguti afiigweta hari ⁄ambeenimoo. Bere hagu afiigwetaaba haguti gaasida hari amoo da afaqeetisa isa dosi. Yaꞌay kokuna gu hhawatee hhaã gu badiisasaa hagiti afiigwetay.
Heedi lensee yaa hhanti khay pandaa dooii yaa konaaba sadaaka daba gosii.
21 Balalu lahhoꞌo ha yonditay yondu googuna, baloo da fanqu hay fiifisiday, gimati qatlay gu doosla baku qatlay gu buꞌuuꞌuru, kwanda ga hiifiifisidee.
22 Unkuray kwanda ga losonuumisidee losona gu kuiyoo hari hadisa sadaaka da buꞌuru gu pandaa gu ganoo, haa losona gu hiikurunkuriru gu baruũ gu hiifaakoo da kori. 23 Kila kori waa tami, hhawatee goõ gu hhapee dooguna kwanda giyaa khayee pandaa da Taataa Iliitleemu, Iliitleemu haa Looimoo gu Waisraeeli. 24 Ana hangumaa iliiaw ma gusintiri hida gu hhapapu pandaa doogunaa ha hagii tlakweesa digimi gu hhapee dooguna. Wanaaba heedi lensee gumaa slahhaaꞌa hhapee dooguna, qatlay ga iliikurunkurimitee waa tami korige, sa hhaꞌaleesa ana Taataa Iliitleemu, Iliitleemu googuna.
25 Sini hhanti hadimisiday ceedee da kuꞌunaanay goó hadimisidee sadaaka daqa dooii, sliimaa haa mukaatee daa iliiqaasi hamiira, sadaakatira da losona gu Pasaaka, hhanti meta heetlawa naqatloo.
26 ⁄aamukaꞌa gu pandaa gu hiiandida gu qaymoo doogu, kwanda haguraa khayde mara gu didiruge gu Taataa Iliitleemu, Iliitleemu googu. Hhanti iladahhasida fuꞌumay gu dakhwadimoo baku ⁄ambeenimoo hari ilibaa gu iyoo dosi.”
27 Da hheꞌesi, Taataa Iliitleemu gi kaay sa Musaa tuba, “Handikimi gimbaki, sa gimba ana haã qaasi ila⁄imbidu haa ugu sliimaa haa hida gu Israeeli, idoo da iliiwane gooay gimbaki.” 28 Musaa yaa ibiidi yade onke sliimaa haa Taataa Iliitleemu balalu mibeeri cigahha, tleemaa haa amasi, yaa ⁄agimiiba ⁄agoo yaa kitahhiiba maꞌay. Ina gi handikimi khongoroꞌosay kirayge gimba goõ gu ila⁄imbidu, ilakaawatee da mibi.
Musaa yaa hii⁄eeti hhapeege Oõ gu Sinaayigo
29 Teesaaqay, Musaa yaagii ⁄eeti oõ gu Sinaayigo. Qatlay Musaa giyaa ilii⁄eeti onko, yaa kona khongoroꞌosay cada gu tle⁄eẽ gu ilatlatlaw dabaiĩ kosii, ina yaa caahhiiba tuba, pandaa dosi wanqaaqata, sa gimba ina yaani idaruusi haa Taataa Iliitleemu. 30 Haruuni haa Waisraeeli goõ giyaa iliianiri pandaa da Musaa yaa wanqada, inay gi tlaꞌamuudiri iliisata ina. 31 Teesaaqay see, Musaa gi eteedi Haruuni haa gaduũ goõ gu marimariya da Waisraeeli yaa khayee ilaciyaa kosii, da hheꞌesi ina gi gimbuusi haa inay. 32 Qariqaaqari Waisraeeli goõ giyaa iliisatiri daqa dosii, ina sigigi hadisi ilakaawa goõ sugwaani hadisi ha Taataa Iliitleemu yadaa oõ gu Sinaayigo.
33 Musaa giyaa ilii hheꞌesi cocoꞌomoo haa inay, gi ilakhupisi pandaa dosi hari dahhamiya. 34 Teesaaqay see, qatlay sliimaa Musaa giyaa ilii hadakakaakay, sa gimba haa Taataa Iliitleemu waꞌay gu Hemaa da Iliislaslawge, ina gi baci dahhamukee pandaa dosaa, giyaa iliica⁄i naqatloo khoorooge. Ina giyaa iliica⁄i khoorooge, gi gimbuusi sa Waisraeeli gimba goõ dugwaani ilafahhi. 35 Teꞌesii, Waisraeeli gi aniri pandaa dosi wanqada. Da hheꞌesi, Musaa gi ilakhupisi kara pandaa dosi hari dahhamiya, giyaa ilii cocoꞌomoo kay naqatloo haa Taataa Iliitleemu.