Taataa Iliitleemu Ilakaay Waisraeeli waaudaraa Sinaaygo
33
1 Da hheꞌesi, Taataa Iliitleemu gi kaay sa Musaa tuba, “Waaudi tiaa daqataa, ugu haa hida hhakee gaayi ca⁄asidi hhapee da Misirigo, taa⁄amida hhapetira naqatloo gaa hiifadidi sa Aburahaamu, Isaaka haa Yakoobo, gaa ilii kaay ambee, ‘Ana ha hadisa sa laqwaloo doogu hhapeti.’ 2 Ana haa ya⁄aba malayika ma danguri giyaadi ugu haa gi gusina Wakanaani, Waamoori, Wahiiti, Wapereesi, Wahiifi haa Wayebuusi. 3 Taa⁄amida hhapetiray doó guuma ilibaa haa dinu. Teesaaqay see, ana hadakawaaba sliimaa haa unkuray, sa gimba unkuray ti hida gwaa sagaiĩ karaarahhee, hangumaa ba⁄atii hhamisa amooge.” 4 Hida giyaa ilii akhasiri gimbaki gu tlaku gi gaiidiri, wanaaba heedi lensee gwaa daasu ⁄alaa kosi. 5 Inay yaa teesaaqay laqiri, sa gimba Taataa Iliitleemu yaa kaay sa Musaa tuba, “Kaay sa Waisraeeli ubee, ‘Unkuray ti hida gwaa sagaiĩ karaarahhee. Bere ha hadakaw sliimaa haa unkuray gimati hari qatlay gu coko⁄u kilesi, hangu hhamisa. Inkoo babacima ⁄alaa kokuna, ana ma caahhi idoo hangu laqe.’ ” 6 Teesaaqay, Waisraeeli gi babaciniri ⁄alaa koina goõ, oõ gu Horeebugo haa yade pandaage, yaa daamisiriiba kara ⁄alaa.Hemaa daa Tlintiꞌisi da Taataa Iliitleemu
7 Inkoo, Musaa yaa kona ou gu hiioymiru hemaa haa gu tluhhumisu kenga gu kambiige. Hematee gigi eteedi “Hemaa da Iliislaslaw.” Heedi gwaa slaꞌa maasa gimba daqa Taataa Iliitleemuge, ina yaati hadakay Hemaa da Iliislaslaw kenga gu kambiige. 8 Qatlay sliimaa Musaa giyaa ilii hadakakaakay hemaage, hida goõ yaatii tlatlaatlayay haa gi qadimidiyay afamaraaee gu hemamuu koinay, haa gi khuꞌunay Musaa hiti amoolaa hiiday waꞌay gu hemaage. 9 Qatlay Musaa giyoó iliidadaye waꞌay gu hemaage, unguruiya da tlongiya yoótii ⁄eta, haa yoóti qadita afamaraa gu hemaage. Teꞌesii Taataa Iliitleemu yoó gimbusi haa Musaa. 10 Qatlay hida giyoó ilii arinee unguruiyatee da tlongiya hiĩ qaditi afamaraa gu hemaage, kila heedi yaati qadidi afamaraa gu hemaa dosii haa gi firimi Taataa Iliitleemu. 11 Teesaaqay, Taataa Iliitleemu ginaa ilii giimaamisi haa Musaa pandaa haa pandaa, heedi gooay idoo giyoo iliicocoiye haa danaꞌa gosi. Da hheꞌesi, Musaa yaagi ki⁄i kara kambiige. Teesaaqay see, iliiayimiisay gosi qaraimoo Yosuuwa nanku Nuuni yaay ca⁄iiba waꞌay gu hemaago.
Taataa Iliitleemu hiifadidi sliimaa wana haa hida kosi
12 Musaa gi kaay sa Taataa Iliitleemu tuba, “Yuꞌudiyaa, ugu sini kakaakanta tuba, ‘Harigiyaadi hida hhanki,’ teesaaqay see, siniĩ kaadiiba miyaa haguni ya⁄abida mani iliiay ana. Ugu haã kaadi tuba, ‘Ana hagu khua ugu hari uma googu, kara ugu haã slaydi ila⁄imba pandaa dooii.’ 13 Inkoo, bere ana haã slay ila⁄imba pandaa dooguu, hani caacaahhamiside amamu koku, ana magu caahhi ugu, ana ma ilakoomi slaslaw hhoinay gu didiru pandaa dooguu. Kara, slayii tuba hida hhanki goõ ti hida koku.”
14 Taataa Iliitleemu gi ilaki⁄isi tuba, “Ana loi ha hadakaw sliimaa haa ugu, kara ana sugu hadisa ugu hiifiifisa.”
15 Musaa gi kaay tuba, “Bere ugu loi hadakaydaaba sliimaa haa dandiray, handi hhanti surukusida tiaa daqataa. 16 Inkoo, hida malee caahhiyay tuba, ana sliimaa haa hida koku haã slayni hhoinay gu didiru pandaa dooguu, bere ugu hadakaydaaba haa dandiray? Bere ugu hadakayda sliimaa haa dandiray hida caahhiyay tuba, ana haa hida koku ti hida gu paslee tla⁄aã gu hida gongo gu khooroo.”
17 Taataa Iliitleemu, gi kaay sa Musaa tuba, “Sa gimba haã slaydi ila⁄imba pandaa dooii, kara ana hagu khua ugu hari uma googu, gimbaki gaã kaadi ana hagu yondiida.”
18 Musaa gi kaay tuba, “Sini laqante wanqamee doogu da didiri.” 19 Taataa Iliitleemu, gi kaay sa Musaa tuba, “Ana hiicata hari pandaa doogu haa sugu laqama hhoinay goy goõ, hagi kakaama uma goy pandaa dooguu, ‘Taataa Iliitleemu.’ Ana laqama hhoinay sa hikaꞌa sa slae laqaru hhoinay, slime ha slahhaaꞌa sa hikaꞌa sa slae slahhaaꞌa. 20 Teesaaqay see, hiidahhasidaaba arimaa pandaa doy, sa gimba wanaaba heedi lensee guniarima ana haa gi ibiidi.”
21 Da hheꞌesi, Taataa Iliitleemu, gi kaay sa Musaa tuba, “Wanta daqa ilaciyaa haa ana, ga iliidahhaside qadida rawaa gu hhafidage. 22 Qatlay wanqamee doy giyoo iliicatide, ana hagoo yakwa waꞌay gu maraiya da hhafidage haa gugi ilacuuwa hari daba goy, qatlay goo iliicate naqatloo. 23 Da hheꞌesi hoo surukusa daba goy, teꞌesii ugu hoo arinta danda goy. Teesaaqay see, etaa pandaa doy hagoo antaaba.”