Hiislaslaw gu Sariyaa
Gimba guri giyaada
Kitaabuki ha Musaa nugwaa handikimi haa dugoóti eteedina na “Hiislaslaw gu Sariyaa” hari ilakeesaraa waka uma gosi na “Hiislaslaw gu Toraati.” Uma gu kitaabuki, yaati daqa gimba gu Yunaanaisoo dahhi na “Deuteroonomioni.” Maꞌaana dosi na “Hiica⁄asaraa da Ilakaawa waa da cada.” Kitaabuki sugwaati qay umaki ha hida gwaa ilakesidee Ila⁄imbidu gu Segu, hari Yunaanaisoo na “Sepitugiaani.” Kitaabuki guni hiifaakoo daqa deehhoo da pandaage da Ila⁄imbidu gu Segu doó eteedine, “Kitaababaa Kooani gu Sariyaa.” Gimba daa kakaamige kitaabukii gu Hiislawaraa da Sariyaa, Musaa yaati qunqumadeesi gimba gu diini da Waisraeeli, ma Ila⁄imbidu daa hadisi sa ayiĩ koina tleehhidi. Ila⁄imbiduki na musingi gu gimba gu ilaciyaa daa tlaatleesi ha Iliitleemu tla⁄aã gosii haa Waisraeeli (Afamaraa gu 29), baku ti sariyaa gooba, haã inkotii daa laqami daqa Waisraeelige hari amoo da ilabuꞌuru gooina yadaa Misirigo haa digigi omi qatlay sliimaa gu tlingitlingimidu gooina taysi kongoqomeege. Qariqaaqari koraraa miyaa cigahha, Waisraeeli yaa daadaauusiri hiiguuma Hhapee daa Hiifadidige. Teesaaqay see, daa ilii kahhiye teesaaqay laqaraa, Musaa yaa slai hiislawa catimisu gooina, yaani gimbakaꞌa sliimaa daa yondiidi ha Iliitleemu, sliimaa haa ilakaawatira goõ giyaa slaiyee ilakooma akhamisu hhapee daa hiileehhi pahha ha Iliitleemu.
Musaa cocoꞌomoo gosii gu pandaa, giyaati slai hida ma hiislayri hhoinay gu Iliitleemu, qatlay sliimaa gu hhiyuuma dooinay, ma sigi hadisi hhapee da Kanaani. Musaa cocoꞌomoo gosii gu cadage, yaati ilakeesi qunqumadeesa da Sariyaa da Iliitleemu sliimaa haa Ilakaawa Mibi. Musaa gi kaay sa hida tuba, “Slae Taataa Iliitleemu, Iliitleemu googu hari ilahudaa koku goõ, hari slafimaa koku goõ, haa hari ⁄uuru googu goõ” (6:5). Inay ma ilakoniri hhaꞌaluumidu sa ⁄aafaraa doó daqa Iliitleemu dahha. Slime, Musaa yaati slai ilakwikwihhu naraꞌa gimba gu lou tuba, inay ma slayri ibidinaa da hhoi haa Iliitleemu, ti kwanda hida gi caacaahhamisiyee yaꞌay koina, ma slairi Iliitleemu haa ma akhamisiri ilakaawa dosi (Afamaraa gu 4:9-10; 6:7). Balalu sliimaa, gimbaki gu haaki haa ibinaa daa tafaꞌadi cuti, ma hiigunti muunaiĩ koinay, haã idoo slaꞌamuu gooina dugu ilii kakaane daqa hhiee koina goõ.
Kitaabuki slime yaa ilakeesi, idoo Yosuuwa dugwaa ilii leehhi, ma giyaadimiisay gu ⁄abu tleehhidi (Afamaraa gu 31), qatlay Musaa giyaa ilii gwaai (Afamaraa gu 34).
Slime, kitaabuki yoó caacaahhamisi hiislaslaw gu loseenoo gu kori, da losona gu Pasaaka gooay, Losona gu Mukaatee doóba iliiqaasa hamiira, Losona gu Kuiyoo, Losona gu Cuuraiĩ, Losona gu Buꞌuuꞌuru, sliimaa haa hiikurunkurimidu wakinay. Waisraeeli giyaatii slaslayri sa laqwaloo dooina, daa iliikomaamida slaꞌamuu gu Iliitleemu, daa laqami hari amoo da afiigweeda dooina hhapee da Misirigo, haa Iliitleemu gi ilakoomi omidoo inay haa sigigi hadisi ⁄aamu.