Ilakaawa da slaꞌamuu Iliitleemu
6
1 Musaa gi ilakoomi cocoꞌomoo sa Waisraeeli tuba, “Haã na ilakaawa goõ haa sariyaa goõ, dinaa ilakaay ha Taataa Iliitleemu, Iliitleemu googuna, mangu caacaahhamisi unkuray, ma yonditiri hhapeteesii ga hii⁄utla kaydee hari tlo⁄osaa gu duudu gu Yoridaani, 2 unkuray magu gwaa⁄adiri gugi akhamisiday Taataa Iliitleemu, Iliitleemu googuna, iliikooma ilakaawa dosi goõ sangu hadisiye qatlay gu ibinaa doogunay goõ, yaꞌay kokuna haa okookoiĩ kokuna, ma hhaꞌaluumitiri ibinaa ibidinaa da tleedi. 3 Ye Waisraeeli, itatiisa! Unkuray see khuꞌuma naraꞌa la yonditay gimbaki, ma dangu pihhi idoo ga slaꞌadee, slime faadoo dooguna gii roogita. Hhapetee ga iliiguuma kaydee, ti hhapee doó guuma ilibaa haa dinu, idoo sangwaa iliifadidi gooay ha Taataa Iliitleemu, Iliitleemu gu ayiĩ kokuna.4 Ye Waisraeeli, itatiisa! Taataa Iliitleemu, ti ina kilesi na Iliitleemu goori. 5 Slae Taataa Iliitleemu, Iliitleemu googu hari ilahudaa koku goõ, hari slafimaa koku goõ, haa hari ⁄uuru googu goõ. 6 Ilakaawati hanguũ ilafahhi unkuray letuti, slaslawakanay muunaiĩ kokunay. 7 Caacaahhamisa yaꞌay kokuna ilakaawatee hari maguuma. Inay sigi ilakontee catimisu qatlay goó ilii ibitee ayage haa inay haa qatlay goó ilii hhiyuumage wantee, qatlay goó ilii qaaqaatee haa goó iliitlaydee hari heetlawaa. 8 Ilakaawatee handikima haa khiidimakana dabaiĩ kokunay haa tla⁄aã gu pandaca⁄aai kokunay, ma idoo da hiislaslaw tleehhiti daqa doogunay. 9 Slime handikimakana gompaai gu afamaraaee gu maraai kokunay haa kaꞌafafee gu yaamu kokunay.
Hiigadiru sa hida gooba akhamisu
10 Taataa Iliitleemu, Iliitleemu googuna gooay giyaa iliifadidi sa ayiĩ kokuna, Aburahaamu, Isaaka haa Yakoobo tuba, ina sangu hadisi hhapee da kooma yaamu gu deni haa guraa hiiboo⁄ee hari khisla, hhaã gaa tleehhidiriiba unkuray. 11 Yaamu hhakee konay maraai gwaa hacaahacee idadu paslaapasloo gu hhoi, hhaã gaa qaasidiriiba unkuray. Kara konay wa⁄eemaa gaa ⁄aagwidiriiba unkuray. Slime konay qaymamu gu sabiibu haa miseyituuni gaa daamisidiriiba unkuray. Qatlay Taataa Iliitleemu hangumaa ilii leehhisiye hhapeteesii, hamaati kontay ⁄agoo sliimaa gamaa slaꞌadee. 12 Gu lou, unkuray hangu ga⁄aydee, dangumaa hhanti afahhana Taataa Iliitleemu, hiĩ gwaa hiica⁄asu unkuray hhapee da tongaiimaago da Misiri. 13 Unkuray kwanda ga gwaa⁄adee Taataa Iliitleemu, Iliitleemu googuna, yondiida sa ina lenkosi kilesi haa gi seelintay hari uma gosi kilesi. 14 Hhanti firiirintay iliitleemamee wakinay gu hhapapu gu ilaciyaa waaree haa unkuray. 15 Bere teesaaqay laqaday, Taataa Iliitleemu, Iliitleemu googuna hiĩ gu tla⁄aã googunay waara, qupidaa kosi yooti ooyiyay aslaa pahha sa unkuray. Ina hangu hhamisi sumuku khoorotaa, sa gimba ina ti kona tloomu hari khisla. 16 Taataa Iliitleemu, Iliitleemu googuna, hagu hhanti koisiday, idoo gwaa ilii koisidiri gooay yade Maasage.a 17 Gu lou, balalu sliimaa oowa naraꞌa ilakaawa dosi goõ, sangwaa ilafahhi ha Taataa Iliitleemu, Iliitleemu googuna. 18 Yondiida gimbakaꞌa gu haaki haa gu hhou pandaa da Taataa Iliitleemuge, ma dangu pihhi, ma hiiguntiri haa ma hii⁄utlidiri hhapetee da hhoi, Taataa Iliitleemu giyaa hiifadidi hari amoo da seeliru tuba, gi hadisi sa ayiĩ kokuna. 19 Teesaaqay laqi, unkuray haga hii⁄utliday hhapetee, hari amoo da gusiru fa⁄ayaa dooguna, Taataa Iliitleemu giyaa iliifadidi gooay.
20 Balalu gwaa khocee, yaꞌay kokuna angamalee hangumaa maasiyay tuba, ‘Maꞌaana da hiifadidukee, ilakaawatee goõ haa sariyatee goõ na mala daa ilafahhi ha Taataa Iliitleemu, Iliitleemu goorii?’ 21 Sigi kaadee ubee, ‘Dandiray yaa tongee da Faraaw hhapee da Misirige. Teesaaqay see, Taataa Iliitleemu hindaagii ca⁄asi hari ⁄uuru gosi. 22 Dandiray hari ilaa koti loi, haa arini Taataa Iliitleemu yondiidi gimba gu didiru gu bakaꞌasa hari khisla haa gu hiitlaꞌameedeesa daqa Wamisirige, mutemi gooinay sliimaa haa hida goõ gu mara gosi. 23 Taataa Iliitleemu hindaa ilabuꞌumi dandiray Misirigo, ina ma hindiraa khay haa sindigi hadisi hhapeti, giyaa hiifadidi hari amoo da seeliru hadisa sa ayiĩ koti. 24 Inkoo, Taataa Iliitleemu hindigi ilafahhi, ma akhamisani ilakaawatee goõ haa gugi gwaa⁄ana ina. Hari amotee dandiray gimba goori goõ, ma tafai cuti haa balalu sliimaa hindima ga⁄ay ibinaa doorii ga iliiwane gooay letuti. 25 Kara, ibinaa doori tafaꞌada pandaa da Taataa Iliitleemu, Iliitleemu goori, bere iliikona naraꞌa ilakaawatee goõ, idoo hindaa ilii ilafahhi gooay dandiray.’ ”