Ilakaawa mibi sa ila⁄imbidu gu hida
5
1 Musaa gi eteedi daqa lenge Waisraeeli goõ, gi kaay sa inay tuba, “Ye Waisraeeli, itatiisa ilakaawa goõ haa sariyaa goõ sangu kaawe pandaa doogunay letuti. Unkuray hangu caacaahhamisidee gimbakee haa khuꞌuma naraꞌa lugu yonditay.2 Taataa Iliitleemu, Iliitleemu goori, yaati qaasi ila⁄imbidu haa dandiray oõ gu Horeebuge.a 3 Taataa Iliitleemu yaati qaasiiba ila⁄imbiduki haa ayiĩ koti kilesi, slime yaati qaasi haa dandiray gonkotaa gu tiꞌii waaree, gu slafee letuti. 4 Taataa Iliitleemu yaati gimbuusi haa unkuray pandaa haa pandaa, tla⁄aã gu aslaago yade onke. 5 (Qatlaykee ana haati qadidi tla⁄antla⁄a gu Taataa Iliitleemu haa unkuray, sangugi kakaami gimba gosi, sa gimba unkuray haa tlaꞌamutiri aslatira, haa ilakhiinaaꞌatiriiba onke.) Taataa Iliitleemu yaati kaay tuba,
6 ‘Ana na Taataa Iliitleemu, Iliitleemu googuna, hiĩ gwaa hiica⁄asu unkuray hhapee da tongaiimaago da Misiri.
7 Unkuray hhanti kontay iliitleemamee wakinay, ti ana kilesi.
8 Hhanti boo⁄imisiday sanaamuu, baku idoo lensee da khafinay da slanqasa haa idoo da rawge waara, da khoorotii waara haa da maꞌayge waara.
9 Sanamamuu hhakee sigi hhanti keebeeꞌemitay hhapeege baku hagi hhanti firiirintay, sa gimba ana Taataa Iliitleemu, Iliitleemu googuna, ti Iliitleemu gu kooma tloomu. Ana hoóti ⁄agitima yaꞌay koina sa tlakwaroo da ayiĩ koina, laqwaloo da tamii haa laqwaloo da cigahha naqatloo, da hida hhakaꞌa guni wakee ana. 10 Teesaaqay see, ana hoóti laqama hhoinay gu didiru daqa laqwaloo elefafaa da hida hhakaꞌa guni slaee haa gu iliikoomee ilakaawa doy.
11 Hhanti uꞌuntay diitiray uma goy, ana Taataa Iliitleemu, Iliitleemu googuna, sa gimba ana mawaaba faadoo dakoo daqa heedikaꞌay gu uꞌuma diitiray uma goy.
12 Khuꞌuma naraꞌa, iliikoomaw baloo da Sabaato, laga tlintiꞌisiday, ana gooay Taataa Iliitleemu, Iliitleemu googuna, idoo hangwaa ilii ilafahhi. 13 Balalu lahhoꞌo yondiidi yondu googu goõ. 14 Teesaaqay see, baloo da fanqu ti Sabaato da Taataa Iliitleemu, Iliitleemu googuna. Baloteesii hhanti yondita yondu lensee, ugu, nankoogu, hotoogu, tongimoo googu haa tongitoꞌoo doogu, kuꞌunaanay googu ma yaamulooay gooba gu mara googuu waara see, tongimoo googu haa tongitoꞌoo doogu, ma hiifiifisidi ugu gooay. 15 Slawaw, unkuray yaati tongee hhapee da Misirige, ana Taataa Iliitleemu, Iliitleemu googuna, hangwaagii ca⁄asi unkuray taysaa hari daba goy gu kooma ⁄uuru. Inkoo sa idotee, ana Taataa Iliitleemu, Iliitleemu googuna, sangunaa ilafahhi unkuray, ma losonuusidiri baloo da Sabaato.
16 Muriidi taataa googu haa iyoo doogu, Taataa Iliitleemu, Iliitleemu googu gooay giyaa ilii ilakaay ugu. Teesaaqay laqe, ma ibiti balalu wa⁄a haa ma dugu pihhi hhapee sugu hadise ha ana, Taataa Iliitleemu, Iliitleemu googu.
17 Hhanti gaasida.
18 Hhanti slipalauta.
19 Hhanti fiisida.
20 Hhanti ilatlatlayda afaꞌafuuma sa heedi danaꞌa googuu.
21 Hhanti slahhaahhaaꞌada hadee da danaꞌa googu. Hhanti slahhaahhaaꞌada mara gu danaꞌa googu baku qaymoo dosi, tongimoo gosi haa tongitoꞌoo dosi, karaama dosi haa daqway gosi, ma idoo lensee gi kone.’ ”
Musaa cocoꞌomiisay gu Iliitleemu
22 Musaa gi kaay sa hida tuba, “Haã na ilakaawatira da mibi Taataa Iliitleemu giyaa kakaami hari afoo da didiri daqa hiikurunkurida doogunay goõ, yade onke, tla⁄aã gu aslaago haa tlogiyatiraa haa ⁄oona diilooi. Kara, ina yaa hiiroogisiiba idoo lensee. Da hheꞌesi, ina gigi handikimi rawaa gu khongoroꞌosay cadage gu tle⁄eẽ, haa sinigi hadisi ana.
23 Qatlay gaa ilii akhasidiri afotee da Taataa Iliitleemu tla⁄aã gu ⁄oonago, rawaa gu onko, gwaa ooyiiyima aslaa, giyaadimiisee goõ da kabiraa dooguna haa gaduũ, hinaagi iliikhayri ana. 24 Unkuray gaduũ hagi kaadiri tuba, ‘Yuꞌudiyaa! Taataa Iliitleemu, Iliitleemu goori, sindaa hiitlaaꞌasi wanqamee dosi da didiri, hagi akhasani afoo dosi yaa hiicaca⁄ada tla⁄aã gu aslaago. Letuti haã arini Iliitleemu hiidahhasi cocoꞌomoo haa dandiray hida, haagi tooraa ilakona ibinaa! 25 Teesaaqay see, inkoo, hangu soꞌoy hiilu⁄ana gwaaꞌaraage dandiray, dandigi hhamisi ha aslatira da didiri? Bere, ilakona akhamisu afoo da Taataa Iliitleemu, Iliitleemu goori, kaka⁄ana! 26 Ti heedi mala, hiĩ gwaa akhasu Iliitleemu gu slafa cocoi tla⁄aã gu aslaago, gwaa ilii akhasani gooay dandiray, haa gi meeti slafi? 27 Musaa, ugu taa⁄a satii ilaciyaage, itatiisi gimba goõ da cocoiye ha Taataa Iliitleemu, Iliitleemu goori. Da hheꞌesi, ugu laakhayda, sandi kaade gimbakee goõ gaani akhasidi daqa Taataa Iliitleemugo. Dandiray hagu itatiisana haa hagu yondiidana.’
28 Taataa Iliitleemu, yaa akhasi gimbakee kooguna, sinigi kaay tuba, ‘Haã akhasi gimba giĩ kaayri hida hhakee. Gimba goõ giĩ kaayri guti lou. 29 Gu lou, balalu sliimaa bere inay yaati konay ilahudaa da hhaã gooay, hinigi gwaa⁄iyay haa gi ilakonay ilakaawa doy goõ, gimba gooina goõ, inay loi sliimaa haa laqwaloo dooina, yaati aloo tafai cuti koraraa haa koraraa gooba hiifaakoo.
30 Taa⁄a sigi kaade, ma ki⁄iri hemamuu koinay. 31 Inkoo, ugu Musaa laaki⁄ida la meta sliimaa haa ana tiꞌii, ana ma sugu hadisi ilakaawa goõ haa sariyaa goõ ga caacaahhamisidee hida, maga akhasiri hhapeteesii sigi hadiidimise, magi hii⁄utliri gi tooina tleehhita.’ ”
32 Musaa, qariqaaqari giyaa iliiooy sariyaa goõ daqa Iliitleemugo, gi kara kaay sa Waisraeeli tuba, “Teesaaqay, unkuray khuꞌuma naraꞌa la yonditay gimbakee, Taataa Iliitleemu, Iliitleemu googuna gooay, idoo hangwaa ilakaay, kila idoo yondiida naraꞌa. 33 Unkuray, sirakooma amamu goõ gu Taataa Iliitleemu, Iliitleemu googuna giyaa ilakaay sirakomamidu, ma ibitiri ibidinaa daa hacidi hhoinay. Slime, unkuray ma hiidahhasidiri ibinaa koraraa wa⁄a, hhapeteesii sangu hadisiye, maga hii⁄utlidiri gi tooguna tleehhita.”