Hiica⁄araa
Gimba guri giyaada
Kitaabuki gu Hiica⁄araa yoóti ilakona catimisu gu Waisraeeli, hida gu Iliitleemu tlaatleesa da qatlaykaꞌaa gu hiifaakoo gu gimba gu kitaabuu gu Tlaatleesoo. Tlaatleesoo da kitaabukaa, Waisraeeli gonkoinaa yaa tongee hhapee da Misirige. Teesaaqay see, Iliitleemu yaa akhasi firoo dooina, digima iliiay ha ina. Inkoo, Iliitleemu gii leehhi Musaa, ma giyaadimiisay gooina tleehhidi. Musaa sugugi qay hiidahhasa ha Iliitleemu, magii ca⁄asi inay hhapee da Misirigo haa magiri giyaadi inay. Teesaaqay see, qatlay Waisraeeli digaa iliica⁄asi, yaa konay labaꞌasu wa⁄a, qatlay giyaa ilii hhiyuudiri gii catiri hari kongoqomee yade khuꞌusa hhapee da Kanaanige, daa hiifadidi ha Iliitleemu daqa Aburahaamuge, maga hadisi sa inay.
Inay tiaatia yaa akhaakhamisiyaaiiba gimba gu Iliitleemu. Teesaaqay see, qatlay giyaa iliidayri oõ gu Sinaayige, Iliitleemu gii tlaaꞌasi sa Musaa sariyaa dosi (Hiica⁄araa 20:25), haã hida gi sirakomamidiyee, inay ma ibiidiri, idoo doó iliislaye Iliitleemu. Slime, Iliitleemu gi qay ilakaawa sa inay, idoo gi iliifiriirine ina haa idoo gi ilii boo⁄imisiyee daqa sa hhapalooee dooina, ma leehhimisiri sadaaka dooina daqa dosii.
Kitaabuki yoóti ilakwikwihhi, idoo Iliitleemu giyaa ilii ilakomaamidiye hiifadidu gosi daqa Aburahaamuge, Isaakage haa Yakooboge. Slime, kitaabuki sindoóti kakaana afiigweeda da didiri da laqwaloo da Aburahaamu hhaã gu Waisraeeli hhapee da Misirigo (Hiica⁄araa afamaraa gu 1–12).