Ilakaawa mibi da Iliitleemu
20
1 Taataa Iliitleemu yaa kaay gimbaki goõ tuba,2 “Ana na Taataa Iliitleemu, Iliitleemu googuna gwaa hiica⁄asu unkuray hhapee da tongaiimaago da Misiri.
3 Unkuray hhanti kontay iliitleemamee wakinay, ti ana kilesi.
4 Hhanti boo⁄imisiday sanaamuu, baku idoo lensee da khafinay da slanqasa haa idoo da rawge waara, da khoorotii waara haa da maꞌayge waara. 5 Sanamamuu hhakee sigi hhanti keebeeꞌemitay hhapeege baku hagi hhanti firiirintay, sa gimba ana Taataa Iliitleemu, Iliitleemu googuna, ti Iliitleemu gu kooma tloomu. Ana hoóti ⁄agitima yaꞌay koina sa tlakwaroo da ayiĩ koina, laqwaloo da tamii haa laqwaloo da cigahha naqatloo, da hida hhakaꞌa hini wakee ana. 6 Teesaaqay see, ana hoóti laqama hhoinay gu didiru daqa laqwaloo elefafaa da hida hhakaꞌa guni slaee haa gu iliikoomee ilakaawa doy.
7 Hhanti uꞌuntay diitiray uma goy, ana Taataa Iliitleemu, Iliitleemu googuna, sa gimba ana mawaaba faadoo dakoo daqa heedikaꞌay gu uꞌuma diitiray uma goy.
8 Slawaw baloo da Sabaato, laga tlintiꞌisiday. 9 Balalu lahhoꞌo yondiidi yondu googu goõ. 10 Teesaaqay see, baloo da fanqu ti Sabaato da Taataa Iliitleemu, Iliitleemu googuna. Baloteesii hhanti yondita yondu lensee, ugu, nankoogu, hotoogu, tongimoo googu haa tongitoꞌoo doogu, kuꞌunaanay googu ma yaamulooay gooba gu mara googuu waara see. 11 Ana, Taataa Iliitleemu balalu lahhoꞌoge, haa tleehhi raw haa hhapee, tlawoo gu deni haa idadu sliimaa gu waꞌay koinay waaree. Da hheꞌesi, hagii fiifisi baloo da fanquge. Inkoo, ana haga ⁄aafa baloo da Sabaato haa haga ilabuusla.
12 Muriidi taataa googu haa iyoo doogu, ma ibiti balalu wa⁄a hhapee sugu hadise ha ana, Taataa Iliitleemu, Iliitleemu googu.
13 Hhanti gaasida.
14 Hhanti slipalauta.
15 Hhanti fiisida.
16 Hhanti ilatlatlayda afaꞌafuuma sa heedi danaꞌa googuu.
17 Hhanti slahhaahhaaꞌada mara gu danaꞌa googu, hhanti slahhaahhaaꞌada hadee dosi, tongimoo gosi, tongitoꞌoo dosi, karaama dosi haa daqway gosi, ma idoo lensee gi kone.”
18 Hida goõ gi aniri mankaraaiya, gi akhasiri tiiriꞌisinoo haa afoo da paranda, haa gi aniri oõ eehhi. Inay gonkoinaa gi tlaꞌamuudiri haa gi dakhadakhiri. Gonkoinaa gi qadimidiri segenge. 19 Teꞌesii, inay gi kaayri sa Musaa tuba, “Ugu loi noo cocoi haa dandiray, hagu akhasana. Taataa Iliitleemu hagu hhanti hiigeemayda, ma cocoi haa dandiray, ba⁄atii kaka⁄ana.”
20 Musaa gi kaay sa hida tuba, “Hhanti tlaꞌamutay! Iliitleemu yantikhay mangu koimisi, magu gwaa⁄adiri haa ma maydiri yondiidu tlakwaroo.”
21 Qatlaykeesii hida hhakee gi qadimidiri segenge, Musaa gi iliisati ciyoomooge tlongitira dii looi, daqa daa iliiwane Iliitleemu.
Sanaamamuu haa masabaahu
22 Da hheꞌesi, Taataa Iliitleemu gi kaay sa Musaa tuba, “Ugu kaay sa Waisraeeli ubee, ‘Unkuray haã antiri hari ilaa kokuna, haã gimbuusi haa unkuray rawaa gu rawgo. 23 Hhanti boo⁄imisiday sanaamuu lensee da feesa ma da sahaabu see, gaga ilakhuukhuꞌusiday haa ana.
24 Unkuray sini boo⁄imisidee masabaahu da konto⁄oo, rawaa kosi sini hadimisidee sadaaka dooguna da da⁄araa aslaage haa sadaaka da qasaw da yakway, aaraa baku bee⁄u gooay. Daqeemoo sliimaa uma goy duguma hiislaslay, ana haa khaw daqa doogunay haa hangu ⁄aafa. 25 Unkuray bere sini tleehheday masabaahu da tle⁄eẽ, haga hhanti tleehheday hari tle⁄eẽ daa tlupidi. Bere hagi tlupitay hari khooslay googuna, haga slasla⁄uudisiday. 26 Kara, haga hhanti tleehhiday masabaahu da kooma kitariidaamoo. Bere teesaaqay laqaday, heedi hiidahhasi arimaa slaꞌay googu.’ ”