Tongee da Waeburaaniya
21
1 Iliitleemu gi ilakoomi cocoꞌomoo sa Musaa tuba, “Ilakaawa ga qaaside pandaa da Waisraeelige na nahaã.2 Bere, kirigida tongimoo hiĩ gu Eburaanimoo, yondiidi sa ugu koraraa lahhoꞌo. Kori gu fanquge, tongimoo tleehhidiyaaba, ina ti waaudi bueemaa lensee hhaka. 3 Bere, ina yaati khay daqa dooguu kahhi khaboo, maati waaudi ina lenkosi. Teesaaqay see, bere yaati khay kona hadee, kwanda gi waaute sliimaa haa ina. 4 Bere, ina sugwaati khabimi hadee ha looimoo gosi, sugugi laqwalidi yaꞌay, hadetee haa yaꞌay kosi ti meetiyay dabaiĩ gu looimokeesii. Tongimokee ti waaudi ina lenkosi.
5 Teesaaqay see, bere tongimokee koku kaay tuba, ‘Looimoo goy, hadee doy haa yaꞌay koi gonkoinaa hagi slaꞌa. Ana waaudaaba,’ 6 teꞌesii, looimoo gosi gu leehhisi ina pandaa da ilabuꞌumiiseege,a ma qadidi afamaraage baku giidimooge, haa gi cihhi eea dosi hari singanoo. Balalu sliimaa, ina tongimoo gu looimoo gosi tleehhidi.
7 Bere, Eburaanimoo naadina hotosi gi tongitoꞌoo tleehhita, amoo dosi da hiica⁄a tongaiimaago ti paslida haa haã da tongee da hhawatee, digoó ilii geemaamaye. 8 Bere, ina muunaboo⁄eesidaaba looimoo gosi, gwaa hiidaamisu ina, kwanda gi maye dagama afiigweedi. Ina, kara konaaba haaki da hiigeemawa dagama kirigi ha hida gu hhapapu wakinay. Bere teesaaqay laqi, ina hiti yondiidi gimba gu hiicoridu. 9 Bere, looimokee gii daamisi hadetee sa nankosi, ina ti yondiidi sa tongitoꞌotee hotosi pahha. 10 Bere, looimokee khabina hadee waka, kwanda gi ilakone hadimisu ⁄agoo, qayroo haa haaki dosi da hadee da gere⁄iya. 11 Bere, ina gi buꞌudisiyaaba gimbakii gu tamige, hadetee da gere⁄iya, waauta, bueemaa lensee hhaka.
Ilakaawa ilaqaꞌa da heedi
12 Heedi gu difa heedi danaꞌa gosi haa gugi gaasi, gu lou ina see kwanda dugu gaasiye. 13 Teesaaqay see, bere heedikee gunti gaasiiba hari taariru, Iliitleemu ningii geemay gimbakee ma hiica⁄i, ana Iliitleemu sangu laqama daqa gaa hiileehhi gi iliilakidiye heedikee. 14 Inkoo, bere heedi gaasi danaꞌa gosi hari amoo da taariru, gimati lakidi masabaahu dooii, hikee ca⁄asakuu teꞌesaa duguma gaasi.
15 Heedi gu difa taataa gosi baku iyoo dosi, kwanda dugu gaasiye.
16 Heedi gu oowa heedi waku hari ⁄uuru gugi naadiru kay baku dugugi slay daba gosii, gu lou kwanda dugu gaasiye.
17 Heedi gu ilawaasa taataa gosi baku iyoo dosi, kwanda dugu gaasiye.
18 Bere hida cada naanaqiyay haa leẽ gi cakhadi danaꞌa gosi hari tlaa⁄u baku gugi tlupi hari konday gosi gwaaꞌa see guba, gi mama⁄i haa gi qaamidi buburuge, 19 hikee gwaa ilaqau ina, kwanda gu mama⁄eedeesiye ti amoolaa hhoay sumuku, hiidahhasiye oowa hhadaa haa gi khoci. Gimati teesaaqay see, kwanda gi buiye qatlay gosi goõ giyaa ilii buburuge wane. Bere teesaaqay laqi, hikee gwaa ilaqau ina dugu ilamooyna.
20 Bere, looimoo difi tongimoo gosi baku tongitoꞌoo dosi hari hhadaa haa gigi gaasi nama teꞌesii lenge, kwanda dugu ⁄agitine. 21 Inkoo, bere tongimokee baku tongitoꞌotee hhoayda heetlaalee baku bolotiray, looimokee dugu ⁄agitinaaba, sa gimba tongetee ti khooslay gosi.
22 Bere, hhawatee qwaatliyay haa gi ilaqaiyay hadee da kooma hubay, haa daa⁄u dugugi hiiday slehheeri kosi kahhiyay buꞌuda, ilaqaꞌa da didiri see hhaka, hikee guũ ilaqau hadetee gi iliihuui, idoo hhawata gosi haa gaduũ gu balasaa gi iliikereꞌesiye gimbakee. 23 Inkoo, bere digi ilaqai hari khisla, hhawatakee kwanda gi buiye slafimaa kosi loi sa slafimaa koina, 24 bere hiĩ gaasi ila, ina see dugu afagaasiye ila dosi, bere hiĩ puru⁄usi ⁄aatlimoo, ina see dugu afapuru⁄usiye ⁄aatlimoo gosi, bere hiĩ kereꞌesi daba, ina see dugu afakereꞌesiye daba gosi, bere hiĩ kereꞌesi yaaee, ina see dugu afakereꞌesiye yaaee dosi,b 25 da⁄araa aslaa hari da⁄araa aslaa, sla⁄amiya hari sla⁄amiya haa hiiniiroo⁄ida hari hiiniiroo⁄ida.
26 Bere, looimoo hiimaahhasi ila da tongimoo gosi baku ila da tongitoꞌoo dosi, haa ila gi ilahhanta, kwanda gi geemaye ma waauti, sa gimba gu ilatee tosi. 27 Nama teesaaqay, bere hiimaahhasi ⁄aatlimoo gu tongimoo gosi baku tongitoꞌoo dosi gi puru⁄udi, kwanda gi geemaye ma waauti sa ⁄aatlimokee kosi.
Ilakaawa daqa kuꞌunaanayge
28 Bere awu tlupi hari khadami hhawata baku hadee gigi gaasi, kwanda awukee dugu gaasiye hari amoo da cakhadiru hari tle⁄eẽ, fuꞌumay kosi digi ⁄agiyaaba. Teesaaqay see, looimoo gu awukee buiyaaba idoo lensee. 29 Gimati teesaaqay see, bere awukee yaa caahhi tlupidu hida hari khadaã gosi, haa looimoo gosi dugwaa ilii⁄oo⁄i ha hida, gugi may khiidiru, bere gaasi heedi, kwanda dugu cakhadine hari tle⁄eẽ ti amoolaa gwaai. Slime looimoo gosi see kwanda dugu gaasiye. 30 Teesaaqay see, hida gu heedikee diĩ gaasi, bere ⁄imbiyay duguma bui, looimoo gu awukee kwanda gi buiye bueematee da slaiye, ma ilabuꞌumi ibinaa dosi. 31 Slime, bere awu hiĩ tlupi khwaylimoo baku khwayla hari khadaã gosi, looimoo gosi duguti hukuna harima sariyatee leẽ. 32 Bere, awu tlupi tongimoo baku tongitoꞌoo hari khadaã, looimoo gu awukee kwanda gi buiye ilakhua da roobo kiloo gu feesa sa looimoo gu tongimokee. Kara, awukee kwanda dugu cakhadine hari tle⁄eẽ ti amoolaa gwaai.
33 Bere, heedi may ilakhupisa bonda, baku gi fooli bonda, gigi may tiparaa, haa kuꞌunaanimoo gii huui teꞌesii, 34 looimoo gu bondakee kwanda gi buiye looimoo gu awukee. Slime, awukee guũ gwaau ti kosi tleehhidi.
35 Bere, awu gu heedi ilaqai awu gu danaꞌa gosi haa awukee gi gwaai, looetee kwanda gi naadinee awukee gu slafa, haa hingigi deehhinay naraꞌa peesaykee. Slime, kwanda hingi deehhinee naraꞌa fuꞌumay gu awukee guũ gwaau. 36 Teesaaqay see, bere baraslayay tuba, awukee yaa caahhi tlupidu hida haa kuꞌunaanay hari khadaã gosi, haa looimoo gosi goó khiidinaaba, kwanda gi buiye awu gu slafa. Slime, hikee guũ gwaau ti kosi tleehhidi.