Sariyaa da buꞌudu gu ilaki⁄isa khooslay
22
1 Bere heedi fiisi slee baku bee⁄imoo, haa gigi isa hiiquutli baku gigi naadina, kwanda gi buiye yakway kooani sa sletee da leẽ baku bee⁄u cigahha sa bee⁄imokee gu leẽ. 2 Bere, fiisiisay duguũ ooymi cihhi mara hari amasi, dugugi difi ti amoolaa gwaai, heedikee guũ gaasu ina konaaba dakoo da gaasaraa. 3 Inkoo, bere gimbakee hintii ca⁄i qatlay letu giyaani ilii biifiꞌisidi, heedikee kona dakoo da tuutuqa da ceedee.Fiisiisaykee kwanda gi buiye khooslay goõ giĩ fiisi. Bere, konaaba idoo, ina loi kwanda dugu naadine sa bueema da fiisatee tosi.
4 Bere, kuꞌunaanimokee daa fiisi dugu slay slafi dabaiĩ kosi, gini karaamoogoo, daqwaygoo baku bee⁄imoogoo, kwanda gi buiye waa cada.
5 Bere, deꞌemiisay deꞌena kuꞌunaanay gosi haa gi deꞌemisi qaymoo dosi da sabiibu, haa ina gii geemay kuꞌunaanay gosi qaymoo da heedi wakuu, ina kwanda gi buiye hari baruũ gu hhou gu qaymoo dosi loi baku qaymoo dosaa da sabiibugo.
6 Bere, heedi ooyisi aslaa qaymoo dosaa haa gi da⁄ada kweera da kooma leqeewaa, haa aslatee gii qonta qaymoo da heedi wakuu gi da⁄ada ganoo daa khiidiidimi upaiĩ, baku ganoo da kahhiye buꞌuru, baku qaymoo goõ dagagi hhamisi, heedikee guũ ooyisu aslatee kwanda gi buiye.
7 Bere, heedi hadisi peesay baku khooslay waku sa danaꞌa gosi, ma sugu qaasi, khooslaykee dugugi fiisi mara gosaa, bere fiisiisaykee duguũ ooyi, kwanda gi buiye ilaki⁄isa da khooslaykee waa cada. 8 Inkoo, bere fiisiisay duguba slawaraa, looimoo gu mara duguniraa khay pandaa da ilabuꞌumiiseege, dama mai tuba, ina yaa fiisiiba khooslay gu danaꞌa gosi. 9 Bere da wana gimba gu naanaqamidu gu slee, baku daqway, baku bee⁄imoo, baku qayroo, baku idoo lensee daa hhanti, haã da kaayiye ha kila heedi tuba, ti tooi, hida hhakee gu cada kwanda digiraa khaye pandaa da ilabuꞌumiiseege. Heedikee da kaayiye ha ilabuꞌumiisee tuba, hinti giimaamisi afaꞌafuuma kwanda gi buiye heedi danaꞌa gosi waa cada.
10 Bere, heedi dubisi sa heedi danaꞌa gosi daqway, karaamoo, bee⁄imoo baku kuꞌunaanimoo waku magu deꞌemi, kuꞌunaanimokee gi gwaai baku dugugii sletuudisi baku dugugii oy, heedi lensee guba arimaa, 11 hikira saa dubisi kwanda gi seeline pandaa da Taataa Iliitleemuge, dama laqami tuba, ina yaa fiisiiba khooslay gu danaꞌa gosi. Looimoo gu khooslaykee kwanda gi ⁄imbiye seelirukee ma bueemaa see buiyaaba. 12 Inkoo, bere kuꞌunaanimokee dugwaa daqa dosii fiisi, kwanda gi buiye sa looimoo gosi loi. 13 Bere, kuꞌunaanimokee dugwaati dee⁄i ha makay gu kweera, heedikee saa dubisi kwanda giraa khaye ⁄aaraiĩ gu kuꞌunaanimokee duguma arimi hida. Teesaaqay, ina buiyaaba bueemaa lensee sa kunaanimokee.
14 Bere, heedi firoo kay kuꞌunaanimoo daqa heedi danaꞌa gosii, kuꞌunaanimokee dugu ilaqai baku gi gwaai, looimoo gosi hhaku, kwanda gu buiye kuꞌunaanimokee. 15 Inkoo, bere looimokee kosi yaa wana, hikee gwaa firoo kaw buiyaaba idoo lensee. Bere kuꞌunaanimokee gwaati firoo kay sa yondu gu bueemaa, looimoo gosi ⁄imbi oowa bueematee da hiinaaca.
Sariyaa da ibinaa da hhoi
16 Bere, heedi laalaagi kikitoꞌoo da kahhiye hiidaamisu, girigi gui, kwanda gi buiye khooslay goõ, haa gigi khabina sagameeriyatee. 17 Bere, taataa gu sagameeriyatee siꞌi, dagama khabimi ha heedikee, kwanda heedikee gi buiye khooslay, idoo daraa iliiboo⁄i gooay bueemaa kikitoꞌoo.
18 Miisliisoꞌoo haga hhanti hiigeemayda, ma ibiti.
19 Heedi guri gua kuꞌunaanay kwanda dugu gaasiye.
20 Heedi gu cu⁄a idadu gi haysi sadaaka sa iliitleemu waku, ba⁄ay da hadisa sadaaka goõ sa Taataa Iliitleemu kilesi, kwanda dugu hhamisiye sumuku.
21 Ugu hhanti yondita idoo lensee da tlakwi daqa heedi gu yaamulooay gooba ma labaꞌasa see, sa gimba unkuray see yaati dahaa hhapee da Misirige.
22 Hhanti labaꞌasida hadee daa afahhami hhawata, ma makeebee see. 23 Bere teesaaqay laqada, inay hinigi ilii⁄aa⁄iyay ana gimba lenge see, gu lou akhasa ⁄aa⁄imu gooina. 24 Qupidaa koi ooyay aslaa pahha, ana gi ⁄isima unkuray danguma cu⁄i hari pangaa ha fa⁄ayaa dooguna. Tigay kokuna mogombiisee tleehhidiyay, haa yaꞌay kokuna makeebee tleehhidiyay.
25 Bere, hadisida peesay sa heedi iinaa pahha tla⁄aã gu hida koii gu kwaeeli, ugu hhanti heedikaꞌa pahha tleehhita goó slaꞌa ilaki⁄isa da didiri daqa dosaa. 26 Bere, ugu hiiooda qayru gu heedi danaꞌa googu laanii, kwanda sugu ki⁄iside da iliikahhiye hiihua letu. 27 Teesaaqay laqe, sa gimba hikee na qayru gosi leẽ hingiroó ilacuuye. Goó ilatahhade ina hari mala ilacuuy? Teꞌesii caahhi tuba, bere hini ilii⁄aa⁄i sa gimba suguũ ki⁄isidiiba qayru, ⁄aa⁄imu gosi hagu akhasa, sa gimba ana kooma muuna gu ⁄awaariru.
28 Hhanti belendeqesida Iliitleemu ma ilawaasa see heedi lensee gu didiru goó tawaalima hida koku. 29 Hhanti mayda hadisa sadaaka daqa kuugiyoo kokaa haa daqa idadu kokaa giyoó kitahhante.
Slime, kwanda sini hadiside badiisu googu gu hhawata. 30 Kara, teesaaqay leẽ laqe daqa badiisasaa da kuꞌunaanay googu. Balalu fanqu, mawaki ma ibiidiri haa amu koina, baloo da gweletige sini hadiside sadaaka sa ana.
31 Unkuray, hida koi tleehhitay daa tlintiꞌisi sa ana hari amoo da makhanay du⁄iya. Inkoo, unkuray etaa hhanti ⁄agintay fuꞌumay gu kuꞌunaanimoo diĩ gaasi ha makimoo. Fuꞌumay hhakee kwahhakina sa gwehheeri.”