Sariyaa da haaki haa ⁄awaariru
23
1 Iliitleemu gi ilakoomi cocoꞌomoo sa Musaa, ma kaay sa Waisraeeli tuba, “Hhantii qoomeesida gimba gu afaꞌafuuma. Hangu hhanti ilagaasida haa heedi goó yondiida gimba gu tlaku, hari amoo da hiica⁄asa ilatlawa da afaꞌafuuma. 2 Hhanti sirakomamita raqa da hida goó yondiidee tlakwaroo. Qatlay ga ilii ilakeeside balasaage, ugu gimba gu lou na ilakeesi, hangu hhanti ilagaasida haa raqatee, gi hhamisida haaki. 3 Kara, kwaꞌalimoo hagu hhantii lehhita sitaakaa dosii.4 Bere, hanguu slaslaydi haa karaamoo baku daqway gu fa⁄ayimoo googu yaani hhami, kwanda gu ki⁄iside daqa dosii. 5 Bere, haã anti daqway gu fa⁄ayimoo googu hiĩ huui hhapeege hari tlokay gosi gu kooma khooslay, hagu hhanti mayda teꞌesii, kwanda gu iliiaydee hiitlaysa.
6 Ugu hhanti tlankida haaki da kwaeeli sitaakaa dooinay. 7 Hangu tlintiꞌiside segenge haa sitaakaa da afaꞌafuuma, ma gaasa see hagu hhanti gaasida heedi guba dakoo haa heedi gu kooma ibidinaa daa tafaꞌadi. Ana, hagu ilamooymaaba heedi gu tlaku.
8 Hhanti ⁄imbida duguma tlupi hari peesay, gimbakee yoó ilahhamisi hakiimamaa, inay gi hhamisiyay gimba gu hida gu koomee ibinaa daa tafaꞌadi.a
9 Heedi gu yaamulooay gooba hagu hhanti labaꞌasida, unkuray loi khuꞌuday dahaa, idoo gi iliiwane, sa gimba unkuray see yaa yaamulooee gooba hhapee da Misirige.
Sariyaa da Sabaato
10 Qatlay gu koraraa lahhoꞌo daamisiday pisagaroo qaymamu kokunay haa gi buꞌuntay baruũ gosi. 11 Inkoo, kori gu fanquge hhanti doosliday qaymamu kokuna, ma hiifiifisiri. Teesaaqay, kwaeeli guwaaree tla⁄aã googunay, ma slayri ⁄agoo qaymamu hhakeesii, haa ⁄agotee gi meesiyee dagama ⁄agimi ha makay. Teesaaqay leẽ laqaday, qaymamu kokunay gu sabiibuge haa miseyituunige.
12 Balalu lahhoꞌo kuiyage yondiidi yondu googu, baloo da fanquge fiifisii. Teesaaqay laqe, karamu haa daqwaai koku see ma hiifiifisiri. Slime, tongee doogu daa laqwali mara googuu, sliimaa haa yaamulooee dooguuba, ma hiifiifisiri.
13 Iliiqaasaw gimbakee goõ gaa kaay sa unkuray. Coko⁄o see, hhanti firiirintay umaiĩ gu iliitleemamee, ma akhasa see digi hhanti akhasi afaiĩ kokunay.
Loseenoo tami gu deni korige
14 Kila kori waa tami, kwanda ga losonuusidee sa laqaru muree daqa dooii. 15 Losona gu pandaa ga losonuusidee ti losona gu mukaatee doóba iliiqaasa hamiira. Balalu fanqu ⁄agima mukaatetee, idoo hangwaa ilii ilakaay gooay unkuray. Losonuusa losonakee qatlaykaꞌay loi daa ilakhuukhuꞌusi gu slehheẽ gu Abiibu, (hiĩ na slehheẽ gu cigahha,) sa gimba slehheki ganaa iliica⁄adiri Misirigo. Heedi lensee yaa hhanti khay pandaa dooii yaa konaaba sadaaka daba gosii.
16 Losonuusiday losona gu buꞌuru sliimaa haa ⁄aamukaꞌa gu pandaa gu hiiandida qaymamu kokunaa. Kara, losonuusiday losona gu hiikurunkuriru gu baruũ gu hiifaakoo da kori, qatlay ga ilii kurunkuridee baruũ goó qaymamu kokuna dahha.
17 Kila kori waa tami, hhawatee goõ gu hhapee dooguna kwanda giyaa khayee pandaa da Taataa Iliitleemuge, Looimoo googuna.
18 Sini hhanti hadimisiday ceedee da kuꞌunaanay goó hadimisidee sadaaka daqa dooii, sliimaa haa mukaatee daa iliiqaasi hamiira.
Kara, wahhana gu kuꞌunaanimoo gu sadaaka da losona gooi da⁄akuna, hhanti meta heetlawa naqatloo.
19 ⁄aamukaꞌa gu pandaa gu hiiandida gu qaymoo doogu, kwanda haguraa khayde mara gu didiruge gu Taataa Iliitleemu, Iliitleemu googu.
Hhanti iladahhasida fuꞌumay gu dakhwadimoo baku ⁄ambeenimoo hari ilibaa gu iyoo dosi.
Hiifadidu haa ilakaawa da Iliitleemu
20 Yuꞌudiyaa, ana ya⁄aba malayika goy, ma giyaadi pandaa doogunay haa danguma ga⁄ay hhiyuuma doogunay. Teesaaqay, ina manguraa khay daqataꞌay gaa ilakhuukhuꞌusige sa unkuray. 21 Malayikakee, gimba gosi sugu taatlidee eaa haa akhamisakuna. Hagu hhanti siꞌiday ina, dakoo dooguna higimaa ilamooyinaaba, sa gimba uma goy waꞌay kosii wana. 22 Bere, gimba gosi suguti taatliday eaa naraꞌa haa gi yonditay gimba sliimaa sangu giimaamise unkuray, ana fa⁄aymoo gu fa⁄ayaa dooguna tleehhida, haa kanimiisay gu hida goó kanimisee unkuray tleehhida. 23 Teesaaqay, malayika goy sangu giyaadi unkuray pandaage, danguraagi khay hhapee da Waamoorige, Wahiitige, Wapereesige, Wakanaanige, Wahiifige haa Wayebuusige. Kara, ana hagi hhamisa sumuku inay khoorotaa. 24 Hhanti keebeeꞌemitay pandaa dooinay iliitleemamee baku gigi firiirintay, ma sirakooma see ou gooina. Unkuray muumu⁄umakini sumuku haa gi tlupitay tle⁄eẽ gu unguruꞌu gu daqatee toina. 25 Unkuray kwanda ga firiirintee Taataa Iliitleemu, Iliitleemu googuna, ina hangu ⁄aafi unkuray hari ⁄agoo haa maꞌay. Kara, ina sanguu ca⁄asi ga⁄ay tla⁄aã googunaa. 26 Hhaka hadee lensee damaa tlakweemisa guraꞌa ma damaa mogombitoꞌoo tleehhida see hhapee doogunay. Ana sangumaa pihha ibidinaa da tleedi.
27 Ana, hamaa hiitlaꞌameedisa pandaa doogunay hida gu hhapapu goó kanimisee unkuray. Slime, hamaa ⁄isima fa⁄ayaa dooguna goõ, ma hiifookiti haa gi lakita daqa doogunaa. 28 Ana ⁄isima fa⁄ayaa dooguna, Wahiifi, Wakanaani haa Wahiiti, ma tlaꞌamuti haa hagi gusima pandaa doogunay qatlay giyoo iliisatidee inay. 29 Inay hagi gusimaaba kori lenge, sa gimba hhapee yoo hhanti meta makeebeuuma haa makay gi haciyay hari khisla ba⁄ay da unkuray. 30 Inay hagiti gusiisima cokoocoko⁄o pandaa doogunay, qatlaykaꞌa naqatloo unkuray gamaa iliiroogitee haa hhapetee gi tooguna tleehhita.
31 Ana hiitlakhweesa digimi gu hhapee dooguna, tlaatleesa da tlawa da didirigo da Saamu hata naqatloo da Wafiliisiti doó eteedine Meditereeniya. Kara, tlaatleesa da kongoqomeego, duudu gu didiru gu Efuraati naqatloo. Ana qaasa digimi hhakee hari amoo da taatahha dabaiĩ kokunay yaamulooee doó ibiida hhapeteesii, unkuray hagi gusintay, ma waaudiri teꞌesaa. 32 Hhanti qaasiday ila⁄imbidu lensee haa inay ma haa iliitleemamee koina see. 33 Inay hagi hhantii geemayday, ma ibiidiri hhapee doogunay, ma hhanti ⁄isiniri unkuray, ma yonditiri tlakwaroo daqa dooii. Bere hagii geemayiday ma ibiidiri haa unkuray, yonditay sa iliitleemamee koina, gu lou teꞌesii dangu ooyi hatlirooge.”