Losona gu Pasaaka
16
1 Musaa gi kaay sa hida gu Israeeli tuba, “Kila kori, iliikoomaw slehheẽ gu Abiibuge, losonuusa losona gu Pasaaka, ma lanqatiri muree daqa Taataa Iliitleemu, Iliitleemu googuna, sa gimba slehhekeesii gu Abiibuge, hari amasi Taataa Iliitleemu ginaa iliica⁄asi unkuray hhapee da Misirigo. 2 Qatlaykeesii unkuray gani ilii hadimisiday sadaaka da Pasaaka, daqa kuꞌunaanay googunaa. Hari amoti gani iliimuritay Taataa Iliitleemu, Iliitleemu googuna, daqa gimaa hiileehhige, uma gosi ma ibiidi teꞌesii. 3 Unkuray hhanti ⁄agintay mukaatee daa iliiqaasi hamiira sliimaa haa fuꞌumay gu sadaakatee. Qatlay gu balalu fanqu, kwanda ga ⁄agintee mukaatee doóba iliiqaasa hamiira, mukaatee da labaꞌasu, sa gimba dangwaati cira hiica⁄asi hhapee da Misirigo. Teesaaqay laqa, balalu sliimaa gu ibinaa dooguna, ma hiislaslaydiri balotira dangwaa iliica⁄asi hhapee da Misirigo. 4 Qatlay gu balalu fanqu, heedi lensee hhapee doogunay, hhanti qaasi hamiira mara gosii. Slime, fuꞌumay gu kuꞌunaanimokee see daa isahiiquutli baloo da pandaa hari khwayaiĩ, digi hhanti meesi heetlawa naqatloo.5 Hhanti hadisiday sadaaka da Pasaaka da isahiiquutla, daqa yaamu lensee sangu hadisiye ha Taataa Iliitleemu, Iliitleemu googuna. 6 Sadaakatee ti hadisakana daqataꞌay Taataa Iliitleemu, Iliitleemu googuna gimaa hiileehhige, uma gosi ma ibiidi teꞌesii. Teꞌesii na daqa ga ilii hadimisidee sadaakatee da Pasaaka hari khwayaiĩ, letu gi iliislaꞌade hiihuua, hatee ti hiislawaraa tleehhita da qatlaykiraa gaa iliica⁄adiri hhapee da Misirigo. 7 Iladahhasa fuꞌumay hhakee haa ligi ⁄agintay daqa teesii Taataa Iliitleemu, Iliitleemu googuna gimaa hiileehhiyege. Da hheꞌesi, hari heetlawa la ki⁄iday heemamuu kokunay. 8 Balalu lahhoꞌo ⁄agintay mukaatee doóba iliiqaasa hamiira haa doo iliidaye baloo da fanqu, kurunkuridaw raqa da didiri sa firoo da Taataa Iliitleemu, Iliitleemu googuna. Baloteesii hhanti yonditay yondu lensee.”
Losona gu buꞌuuꞌuru
(Hiica⁄araa 34:22; Gimba gu Walaawi 23:15-21)
9 Musaa gi kaay sa hida gu Waisraeeli tuba, “Fatay kuiyoo fanqu. Tlaatleesa faadoo balotaꞌa ga ilii tlaatleesidee buꞌuru baruũ. 10 Da hheꞌesi, unkuray gi losonuusiday losona gu kuiyoo sa Taataa Iliitleemu, Iliitleemu googuna, hari amoo da hadimisu sadaaka hari muunaiĩ kokuna, idoo danguũ ilii pihhi gooay ⁄aafaraa, ha Taataa Iliitleemu, Iliitleemu googuna. 11 Hari amotee da ⁄agoo sadaakatee, hhaꞌaluumida pandaa da Taataa Iliitleemuge, Iliitleemu googuna, daqa gimaa hiileehhige, uma gosi ma ibiidi teꞌesii. Hhaꞌaluumida sliimaa haa yaꞌay kokuna, tongee dooguna, Walaawi, hhakaꞌa gu yaamulooee gooba, makeebee haa mogombiisee goó ibiida tla⁄aã gu tongagu kokunay. 12 Slawaw tuba, unkuray see yaati tongee yade hhapee da Misirige. Inkoo, khuꞌuma naraꞌa gi akhamisiday ilakaawatee.”
Losona gu cuuraiĩ
(Gimba gu Walaawi 23:33-43; Faadoo 29:12-39)
13 Musaa gi kaay sa Waisraeeli tuba, “Kila kori, balalu fanqu, losonuusa losona gu cuuraiĩ,a qatlay goo ilii hheꞌesidee hiikurunkura baruũ googuna haa goo ilii hheꞌesidee tinqiru ⁄aamu gu sabiibu googuna. 14 Hhaꞌaluumida sa losonakee, unkuray haa yaꞌay kokuna, tongee dooguna, Walaawi, hhakaꞌa gu yaamulooee gooba, makeebee haa mogombiisee goó ibiida tla⁄aã gu tongagu kokunay. 15 Balalu fanqu, losonuusa sa Taataa Iliitleemu, Iliitleemu googuna daqateesii gimaa hiileehhige, sa gimba ina hangu ⁄aafi buꞌuuꞌuru gu baruũ googunay goõ, ⁄aafi yondu goó yonditee hari dabaiĩ kokuna. Teꞌesii, gani iliihhaꞌaluumitay gu lou lou.
16 Kila kori waa tami, hhawatee goõ gu hhapee dooguna kwanda giyaa khayee pandaa da Taataa Iliitleemu, Iliitleemu googuna, daqa teesii gimaa hiileehhiye sa losona gu mukaatee doóba iliiqaasa hamiira, losona gu kuiyoo haa losona gu cuuraiĩ. Heedi yaa hhanti khay daqa Iliitleemuge konaaba idoo dabage. 17 Kila heedi kwanda giraa khaye idoo da hadisa, idoo dangwaa ilii pihhi gooay ⁄aafaraa ha Taataa Iliitleemu, Iliitleemu googuna.
Ilabuꞌumiisee da gimba
18 Unkuray leehhaw ilabuꞌumiisee haa giyaadimiisee da deni daqa kabiraa doogunaa, tongagu kokunay sangu hadisiye ha Taataa Iliitleemu, Iliitleemu googuna, inay ilabuꞌunay hida hari amoo da haaki. 19 Hhanti hhamisiday haaki ma laqaru see hiilehhidu. Slime hhanti ⁄imbiday danguma tlupi hari idoo lensee, sa gimba tlupa yoó ilahhamisida ilaa gu ilabuꞌumiisee gu koomee waaway, haa yoó hiifookida gimba gu lou gu heedi gu kooma ibinaa daa tafaꞌadi gi afaꞌafuuma tleehhidi. 20 Hida gu Israeeli, balalu sliimaa unkuray kwanda ga iliiqaasidee gimba gu haaki kilesi, ma ilakontiri ibinaa haa ma hii⁄utlidiri hhapetee sangu hadisiye ha Taataa Iliitleemu, Iliitleemu googuna.”
Firiiriru iliitleemamee wakinay
21 Musaa gi kaay tuba, “Waisraeeli, hhanti qadidisiday unguruiya lensee da iliifiroo iliitleemitoꞌoo Aseera, tluntlubaa da masabaahu gaa boo⁄imisidiri sa Taataa Iliitleemu, Iliitleemu googuna. 22 Kara, hhanti qadidisiday ma tlaa⁄a da iliifiroo, sa gimba Taataa Iliitleemu, Iliitleemu googuna waki iliitleemamee.”