17
1 Musaa gi kaay sa Waisraeeli tuba, “Hhanti hadisiday sa Taataa Iliitleemu, Iliitleemu googuna sadaaka da karamu baku bee⁄u gu kooma sletu, baku tlakwaroo lensee, sa gimba, gimbakee ti slahhaaꞌasa daqa dosii.2 Angamalee, hhawata waku baku hadee waka, goó ibiidee leẽ gu yaamu sangu hadisiye ha Taataa Iliitleemu, dagaã baraslay tla⁄aã googunay, yondiidi tlakwaroo, pandaa da Taataa Iliitleemuge, Iliitleemu googuna, hari kwahharaa ila⁄imbidu gosi, 3 ina hingii fookidi haa gi tlaatleesi firiiriru iliitleemamee wakinay haa gi khuupuuꞌudi daqa dooinay, taqay letu gooay, slehheẽ, tica⁄eerii haa idadu wakinay hhaã ina giyaa tlaatlahhasi firiiriru. 4 Bere gimbaki duguraani khay daqa doogunay, kwanda hagu ilatahhadee naraꞌa. Bere gimbakee guti lou, haguũ maꞌadi tuba, slahhaaꞌasatee dagaati yondiidi Israeelige, 5 kwanda hadetee baku hhawatakee guũ yondiidu yondukee gu tlaku, gurii ca⁄adee kaꞌafu gu yaamuge, haa hagugi cakhadintay hari tle⁄eẽ ti amoolaa gwaai. 6 Teesaaqay see, heedikee duguti gaasi, bere hida cada baku tami wanay gu ilatlawee tlakwaroo dosi tuba, heedikee yoó firiirina iliitleemamee. Etaa heedi lensee hagu hhanti gaasiday hari ilatlawa da heedi leẽ kilesi. 7 Hida hhakee guũ ilatlawee na tlaatleesiyee cakhadiru hari tle⁄eẽ heedikee, hida wakinay goõ gu yaamu hhakee gugi asu cakhadinay. Teesaaqay gani iliifiiciday tlakwaroo tla⁄aã googunaa.
Balasaa da ilii kereꞌemisu gimba
8 Bere unkuray sanguraa khay balasaa doogunay gimba gwaa karahhu hari khisla kereꞌesaraa, gini gimba gu gaasaraa goo heedi, iinanu goo baku iliitlaꞌadu, gimbakee goõ leehhisakuna daqa damaa hiileehhiye ha Taataa Iliitleemu, Iliitleemu googuna, ina ma ibiidi teꞌesii. 9 Unkuray taa⁄amida daqa hhapalooee da Walaawige, haa daqa ilabuꞌumiisay gu yonduge waara qatlaykeesii. Unkuray ca⁄asaw gimba googuna daqa dooinay, inay kaayay idoo gi ilii hukunee. 10 Unkuray kwanda ga yonditee naraꞌa, idoo sanguũ iliikaay gooay ha inay daqateesii damaa hiileehhige ha Taataa Iliitleemu. Khuꞌuma naraꞌa gi yonditay gimba sliimaa, dangoo ilii ilakaaye gooay yondiida ha inay. 11 Yondiida naraꞌa, idoo dangoó iliicaacaahhamisiye gooay sariyaa haa idoo giyoó iliikereꞌemisiyee gimba. Hhanti mayday hiigaamisu naraꞌa hukumuu gi kaayee sa unkuray. 12 Heedi gu qooqiida hhapalooay baku ilabuꞌumiisay daa qaasi teꞌesii, ma yondiidi sa Taataa Iliitleemu, Iliitleemu googuna, heedikee kwanda dugu gaasiye. Teesaaqay gani iliifiiciday tlakwaroo tla⁄aã gooinaa Waisraeeli. 13 Hida goõ akhasiyay haa tlaꞌamuuday, hhanti kara yondiidiyay hari amoo da qooqiimidu hukumuu.”
Ilakaawa daqa mutemige
14 Musaa gi kaay sa Waisraeeli tuba, “Qatlay gamaa ilii guntee hhapeteesii sangumaa hadisiye ha Taataa Iliitleemu, Iliitleemu googuna, hagagi hii⁄utliday haa gagi ilii ibitay, unkuray angamalee, maa kaaday tuba, ‘Dandiray qaasana mutemi da iliiwane gooay hhapapu goõ goó niini⁄idee dandiray.’ 15 Gu lou, unkuray qaasa mutemi daa hiileehhi ha Taataa Iliitleemu, Iliitleemu googuna. Mutemikee kwanda giyaa tla⁄aã gu hida kokuna loi dahhiye. Hhanti qaasiday heedi, hiĩ gu yaamulooay gu Israeeli gooba. 16 Teesaaqay see, mutemikee hhanti kona faraasi wa⁄a sa ina lenkosi loi, slime ma ki⁄isa see hida, gi hhanti ki⁄isi hhapee da Misirige, ma slay faraasi wa⁄a, sa gimba Taataa Iliitleemu hiĩ ilii⁄oo⁄i unkuray Waisraeeli tuba, ‘Etaa hhanti kara ki⁄iday yade Misirige.’ 17 Gimati teesaaqay see, mutemikee hhanti khabina tigay wa⁄a, bere malee, muuna gosi hiifookidi gi may firiiriru Taataa Iliitleemu. Kara, ina hhanti ilakiiki⁄imisi feesa haa sahaabu wa⁄a hari khisla.
18 Qatlay gimaa ilii ibiidiye kitiĩ gosii gu mutemamaisooge, kwanda gi ilaki⁄iye handikaa sa ina kitaabuuge ilakaawa haa caacaahhamisuki daqa kitaabukiraa gu pandaa gu hhapalooee da Walaawige waara. 19 Balalu sliimaa, kitaabukee kosi kwanda gi wane daqa dosii, haa kwanda gi somine balalu sliimaa ibinaa dosii. Hari amotee, mangi caacaahhamisi gwaa⁄a Taataa Iliitleemu, Iliitleemu gosi haa mangu caacaahhamisi yondiidu naraꞌa gimba goõ gu ilakaawatee. 20 Balalu sliimaa, mutemikee higi somine mangi hhanti arina tuba, ina guti kaaru ba⁄ay da Waisraeeli danaee kosi, yondiidiye gimba goõ, ma ilakaawa see gi hhanti qaasi afayige, harima amoo lensee. Teesaaqay laqiye, ina haa laqwaloo dosi, ma hiidahhasiri tawaaliru hhapee da Israeeli koraraa wa⁄a.”