Haaki da Hhapalooee haa da Walaawi
18
1 Da hheꞌesi, Musaa gi kaay sa hida gu Israeeli tuba, “Hhapalooee Walaawi haa kabiraa goõ da Laawi, hhanti konay daqa da aaliru sliimaa haa Waisraeeli. Inay hiti ⁄aginay sadaaka da da⁄araa da Taataa Iliitleemu, haa sadaaka waka haã Waisraeeli giyaa leehhimisiyee daqa dosii. 2 Inay hhanti konay aalimee da hhapee tla⁄aã gu hhiee koinay, inay hiti slayay idadu gi slaiyee daqa Taataa Iliitleemugo, idoo ina giyaa iliifadidi gooay sa inay.3 Haã na haaki da hhapalooee daqa hida gu hadimiseego sadaaka da yakway baku da bee⁄u, sigi hadisi mangaau, tlanqateerii haa khooslay gu guraꞌa. 4 Unkuray sigi hadimisiday inay daqa da pandaa da baruũ googuna, difaay da ⁄abi, du⁄iya haa quubu gu pandaa gu bee⁄u googuna. 5 Sa gimba, Taataa Iliitleemu, Iliitleemu googuna gingii leehhi kabiraa da Walaawi haa laqwaloo dooina tla⁄aã gu kabiraa doogunaa goõ, ma yondiidiri yondu gu hhapalooaisoo hari uma gu Taataa Iliitleemu, koraraa haa koraraa goóba hiifaakoo.
6 Angamalee, Mulaawimoo yaa looy hari muuna gosi, leẽ da tongagu kokunaago, daqa giyaa ilii ibimaamidiye hhapee da Israeelige, haa gi day daqa gimaa hiileehhiyege Taataa Iliitleemu, 7 haa gi yondiidi hari uma gu Taataa Iliitleemu, Iliitleemu gosi, ubee Walaawi deneꞌee kosi pahha, goó yondiidee teꞌesii pandaa da Taataa Iliitleemuge. 8 Ina slay ⁄agoo dosi, Walaawi danaee kosi gooay gu waaree teꞌesii, ina giyaanimati slay see peesay, hari naadiru khooslay gu taataa gosi.”
Ilii⁄oo⁄a sa ilakomamidu ou gu hhakaꞌa gu yaamulooee gooba
9 Musaa gi kaay kara tuba, “Qatlay gamaa iliiguntee, hhapee sangu hadisiye ha Taataa Iliitleemu, Iliitleemu googuna, hangumaa hhanti caacaahhamisiday, ilakeesiru ou gu slahhaaꞌasa gu hida gu hhapapu hhakee. 10 Heedi lensee hhanti wana tla⁄aã googunay, gumaa hadisa hotosi baku nankosi sadaaka aslaage. Kara, da hhanti wana heedi goó kuꞌumisa baku goó miisliislima, goó tletiitima diqimi, goó yondiida gimba gu qwaslarauumaa, 11 gimati miisliisay, gimati heedi goó firiirima iliitleemamee, baku heedi goó firiirima hida gwaa kaka⁄ee. 12 Heedi goó yondiida gimbakee, ti slahhaaꞌasa daqa Taataa Iliitleemuge, hatee na idoo Taataa Iliitleemu, Iliitleemu googuna sagani gusina hida hhakee gu hhapapu pandaa doogunaa. 13 Unkuray hhanti kontay ilawaamisu pandaa da Taataa Iliitleemu, Iliitleemu googuna. 14 Hida gu hhapapu hhakee ga hii⁄utla kaydee, inay yoóti akhamisiyay qwasleeri haa hhakaꞌa goó kuꞌumisee. Teesaaqay see, daqa doogunay unkuray, Taataa Iliitleemu, Iliitleemu googuna hingii geemayba unkuray ma yonditiri teesaaqay.”
Iliitleemu hiifadidi ya⁄abaraa tletimiisay gu Musaa pahha
15 Musaa gi kaay kara tuba, “Taataa Iliitleemu, Iliitleemu googuna sangu hiileehhi tletimiisay da ana gooay tla⁄aã googunaa unkuray loi Waisraeeli. Unkuray kwanda gu akhamisidee ina. 16 Teesaaqay gini iliiwana, idoo gaa iliifirintiri gooay Taataa Iliitleemu, Iliitleemu googuna yade Horeebuge, balotira gaa iliikurunkuritiri haa gi kaadiri tuba, ‘Dandiray hhanti akhasana kara afoo da Taataa Iliitleemu, Iliitleemu goori, gimati arimaa see aslati da didiri kara, ha ba⁄atii kaka⁄ana!’a”
17 Da hheꞌesi, Taataa Iliitleemu sinigi kaay ana tuba, “Gimba goõ giĩ gimbuusiri inay guti hhou. 18 Ana sigimaa hiileehha tletimiisay, gu ugu pahha tla⁄aã gu hhiee koinaa inay loi. Kara ana ha qaasa gimba goy afa gosii, ina maa gimbuusi sa inay gimba goõ hagumaa ilafahhe ana. 19 Heedi gumaaba akhamisu gimba goy, hiĩ tletimiisay gimaa gimbuusiye hari uma goy, ana loi heedikee hagumaati ⁄agitima.
20 Teesaaqay see, tletimiisay hiĩ gumaa koisa gimbuusa hari uma gu iliitleemamee wakinay, baku gumaa koisa gimbuusa gimba hari uma goy, tay ana haguũ ilafahhiiba magu gimbuusi, tletimiisaykee kwanda gi gwaaiye. 21 Unkuray ha ilahudeedemisiday muunaiĩ kokunay tuba, ‘Dandiray ha malee caahhana, bere gimba da giimaamisiye ha tletimiisay, Taataa Iliitleemu gwaani gimbuusiiba?’ 22 Bere, gimbakee tletimiisay gi kakaakane hari uma gu Taataa Iliitleemu, gimbakee hiica⁄iyaaba, caahha tuba, gimbakee Taataa Iliitleemu giyaani kaayiiba.”