Sariyaa da yaamu gu iliilakidimoo
(Faadoo 35:9-34; Yosuuwa 20:1-9)
19
1 Da hheꞌesi, Musaa gi kaay sa Waisraeeli tuba, “Qatlay Taataa Iliitleemu, Iliitleemu googuna, gimaa ilii hhamisiye hida gu hhapapu, hhaã hhapee dooina gi hadisiye sa unkuray, unkuray maa hii⁄utliday hhapee dooina haa gi ibitay yaamu koinay haa maraai koinay. 2 Qatlaykeesii, unkuray kwanda ga tlintiꞌisidee sa unkuray yaamu tami, gu tla⁄aã gu hhapee doogunay waaree, hhapetee sangu hadisiye ha Taataa Iliitleemu, Iliitleemu googuna, maga hii⁄utlidiri. 3 Unkuray boo⁄imisa balabalaluu gu yaamu hhakee, haa deehhima hhapetee bareemoo tami, hhapetee sangu hadisiye ha Taataa Iliitleemu, Iliitleemu googuna, ma tooguna tleehhiti balalu sliimaa. Heedi gu gaasa heedi taariru see guba, ina hiidahhasi lakidimoo yaamu hhakaꞌay gu ilaciyaage waaree hari khisla haa ina, tla⁄aã gu yaamu hhakeesii gu tamige.4 Inkoo, haã na sariyaa da heedi gu gaasa heedi. Bere heedi hiĩ gaasi danaꞌa gosi taariru see guba, kara heedikee giĩ gaasi, yaa fa⁄aymoo gosiiba wakaꞌalee, ina hiidahhasi lakida yaamu lenge tla⁄aã gu yaamu hhakeesii gu tamige, ma ilabuꞌumi ibinaa dosi. 5 Hari ilaꞌaaꞌaatisa gooay, heedi hadakay kweerage haa danaꞌa gosi sa tlaqanay gu magiiduu. Qatlay gu tlaqanay khaimoo, kiraara gii solo⁄ota hopinaa gosaa haa gi tlatlafida danaꞌakira kosi haa gi gwaai. Heedikee hiidahhasi lakidimoo yaamu lenge, tla⁄aã gu yaamu hhakeesii gu tamige, haa gi ilabuꞌuna ibinaa dosi. 6 Bere suti, heedi goó bua ⁄imbu gu ceedee diĩ tuutuqi, gu hiidahhasi siragusiru hari qupidaa gu dihhi, gugi ooy haa gugi gaasi hikee guũ ⁄isimu gwaaꞌaraa da danaꞌa gosi, ina giraamatii boo⁄iiba see gwaaꞌaraa, sa gimba ina gunti gaasiiba danaꞌa gosi hari taariru. 7 Haã na idoo sanguũ ilakaay unkuray, ma tlintiꞌisidiri yaamu tami gu iliilakimidu sa unkuray.
8 Kara, bere Taataa Iliitleemu, Iliitleemu googuna hiitlakhweesi hhapee dooguna, idoo giyaa ilii seelimi gooay harii fadidu sa ayiĩ kokuna, haa sangugi hadisi unkuray hhapee goõ giyaa hiifadidi, 9 qatlaykee unkuray khuꞌuma naraꞌa la yonditay ilakaawati goõ hanguũ ilafahhi unkuray letuti, hari slaꞌamuu Taataa Iliitleemu, Iliitleemu googuna, haa balalu sliimaa gi sirakontay amoo dosi. Teꞌesii, unkuray hiirogisiday kara yaamu wakinay tami, gu iliilakimidu gu hhaã pahha gu tami. 10 Yondiida teesaaqay, ceedee dabasli dakoo hhanti tuutuquta hhapee doogunay, haã Taataa Iliitleemu, Iliitleemu googuna sangumaa hadisiye unkuray, ma tooguna tleehhiti balalu sliimaa, unkuray maa ba⁄atii slayday dakoo da tuutuqa ceedee.
11 Teesaaqay see, bere heedi waki danaꞌa gosi, gugi giidi, gugi iliitlai haa gugi gaasi, da hheꞌesi ina gi lakidi leẽ gu yaamu hhakeesiige gu iliilakidimoo, 12 teꞌesii gaduũ gu yaamu kosi kwanda gi ya⁄abiyee heedi daqa dosii, magwaa hiica⁄asi yadaa haa gugi taatahhiyay daqa hhia gu hikiray diĩ gaasi, ma hiidahhasi hiislarakhasa ⁄imbu hari amoo da gaasa heedikee guũ gaasu hhia gosi. 13 Unkuray sugu hhanti ⁄awaarintay heedikee. Unkuray kwanda ga kwahhadee Israeeligo dakoo da cu⁄uduũ hida gubasli dakoo, unkuray ma ibitiri hari qasaw.”
Digimi gu segi gu hhapee
14 Musaa gi kara kaay sa Waisraeeli tuba, “Unkuray hhantii satimisiday tle⁄eẽ gu digimi gu danaee kokuna, daa qamidi ha hida hhakira gu wakaꞌalee, hhapeteesii sangu hadisiyege ha Taataa Iliitleemu, Iliitleemu googuna, maga aalintiri unkuray.”
Sariyaa da Masaydii
15 Kara, Musaa gi kaay sa Waisraeeli tuba, “Ilatlawa da heedi leẽ buꞌutaaba hukuruu heedi tlakwaroo waka, baku dakoo waka giyaa yondiidi. Gimba kwanda dugu maꞌasiye hari ilatlatlaw gu masaydii cada baku tami.
16 Bere masaydii gu kooma piimaa da tlakwi ilatlay daqa heedi wakuu, haa gi sitaakina heedikee hari dakoo waka, 17 teꞌesii hida hhakee cada gu koomee naanaqamoo kwanda gi qadimidiyee pandaa da Taataa Iliitleemuge,a hatee ti pandaa da hhapalooeege haa pandaa da ilabuꞌumiisee gu waaree yonduge baloteesii. 18 Ilabuꞌumiisee kwanda gi cangicangimisiyee gimbakee naraꞌa. Bere masaydii dugu arina tuba, ti afaꞌafuusay, ilakeesi ilatlawa da afaꞌafuuma daqa danaꞌa gosii, 19 teesaaqay, unkuray laqakuna ina, idoo ina gooay giĩ iliislaiye laqaraa daqa danaꞌa gosii. Teesaaqay hagani iliifiiciday tlakwaroo tla⁄aã googunaa. 20 Teꞌesii, hida guũ meetee akhasiyay gimbakee haa gi tlaꞌamuudiyay. Etaa, tlakwaroo da hatee gooay, maa hiica⁄adaabaa kara tla⁄aã googunay. 21 Hida da hhakee gooay sigi hhanti ⁄awaarintay. Inkoo, bere heedi hiĩ gaasi, ina see dugu gaasiye, bere hiĩ gaasi ila, ina see dugu afagaasiye ila dosi, bere hiĩ puru⁄usi ⁄aatlimoo, ina see dugu afapuru⁄usiye ⁄aatlimoo gosi, bere hiĩ kereꞌesi daba, ina see dugu afakereꞌesiye daba gosi, haa bere hiĩ kereꞌesi yaaee, ina see dugu afakereꞌesiye yaaee dosi.”