Ilabuꞌumiisee
Gimba guri giyaada
Uma gu kitaabuki yaa daqa giyaadimiisetira dahhi daa khuiye hari uma gu Ilabuꞌumiisee. Inay digaati waratlaysi ha Iliitleemu, ma giyaadimiisee da hhapee da Israeeli tleehhidiri. Gimbaki yaatii ca⁄i hari amoo da hhamaraa da Waisraeeli yade hhapee da Misirige haa duduka dooina alunge daqa Iliitleemugo daa ilii gwaai Yosuuwa. Kitaabuki yoóti ilakesidi gimba gu Waisraeeli tlaatleesa da gwaaꞌaraa da Yoosuwago haa yondu gu tletimiisay Samweeli. Sa gimba Taataa Iliitleemu giyaatii leehhi inay, ma hida kosi tleehhidiri, hhaã hari amoo dooina hida gu hhapapu goõ yaa aloo caahhiyay slaꞌamuu gu Iliitleemu. Inkoo, Iliitleemu giyaa aloo mayaaba inay, ma huuiri sumuku, digigi tooinaa ilahufidi ha fa⁄ayaa dooina.
Iliitleemu yaati iliiay Waisraeeli, ma kaba⁄iri haa ma hii⁄utliri hhapee da Kanaani, haã daa ilii ibiidi hida gu hhapapu wa⁄a, gwaa yondiidee tlakwaroo. Teesaaqay see, inay hhapetee da hiifadidu gi aloo hhamisiyay, sa gimba inay yaa tlaatleesiri siaraa Taataa Iliitleemu. Qatlay giyaa ilii fookidiri Iliitleemu, ina see Iliitleemu gii tlaysi Ilabuꞌumiisee, magi ilabuꞌuniri inay dabaiĩ gu fa⁄ayaa dooinaa. Slime, Ilabuꞌumiisee ma ki⁄isiri kara Waisraeeli amamu haa piimaa dosii haa ma giyaadimiisee dooina tleehhidiri. Teesaaqay, qatlayki dugwaati khui gu khamaslaslaa daa eteediidine Ilabuꞌumiisee, hhaã naa giyaadimiisee da kabiraa da Israeeli. Kitaabukii, Ilabuꞌumiisee mibi haa cigahha digaa handikimi tuba, inay naa giyaadimiisee da Waisraeeli. Ilabuꞌumiisee daa khuiye hari khisla niĩ Yefiita, Deboora, Gidiyooni haa Saamsooni.
Hhapapu gwaa ilahufimaamidee Waisraeeli qatlaykii gu Ilabuꞌumiisee naa nahhaã: Wakalidaayo, Wamoaabu, Wakanaani, Wamidiyaani, Waamooni haa Wafiliisiti. Qatlayki gu Ilabuꞌumiisee yaatii kaasi koraraa miyaa cigahha haa mibi haa gimba gwaa hiicaca⁄u, dugwaati arimi, hingi tosaa sirakomamidi.
Kitaabuki ti laqaaqana tuba, Iliitleemu kwanda gi hukune tlakwaroo. Slime, ina ilamooyna haa yaa ki⁄isi hida hhakaꞌa gwaa hiifookidee daqa dosii tlakwaroogo.