Gwaa⁄araa da Musaa oõ gu Neeboge
34
1 Da hheꞌesi, Musaa gi waaudi raqamaauu gu Moaabugo, gi ilakhiinaaꞌadi oõ gu Neeboge, cina da Pisigaa naqatloo, bara da ilacindoo gu rawaa khuꞌusa gu yaamu gu Yeeriko. Yade Taataa Iliitleemu sugugi laqami hhapee goõ, Gileyaadigo, yaamu gu Daani naqatloo, 2 hhapee goõ da Nafutaali, hari bara da ilacindoo gu biraa gu duudu gu Yoridaani, hhapee goõ da Efurayiimu haa da Manaase, hari bara da wayee gu hhapee da Nafutaali, hhapee goõ da Yuuda, hari bara da ilacindoo gu biraa gu duudu gu Yoridaani, tlawa da ilacindoo gu biraa naqatloo hatee na tlawa da didiri da Mediteraaniya, 3 kongoqomee da Negeebu haa hhapee goõ tlaatleesa da hiihuuꞌuma gu Yeerikogo, yaamu gu mitende, Soaari naqatloo. 4 Da hheꞌesi, Taataa Iliitleemu gi kaay sa Musaa tuba, “Haã na hhapetira gaa hiifadidi hari seeliru sa Aburahaamu, Isaaka haa Yakoobo ambee, ‘Haga hadisa sa laqwaloo dooina.’ Ana suguũ laqami maga anti hari ilaa koku ugu loi. Teesaaqay see, ugu daadaaba hhapetaꞌay.”5 Teesaaqay, Musaa yondimiisay gu Taataa Iliitleemu gi hhami yade hhapee da Moaabuge, Taataa Iliitleemu gooay giyaa iliihheꞌesi kaawa. 6 Taataa Iliitleemu gugi qaasi hiihuuꞌumakeesii gwaa iladifaa gu yaamu gu Beeti-Peyoori da hhapee da Moaabuge waara. Letuti naqatloo, hhaku heedi lensee gu khua, Musaa daqa dugwaa iliiqaasi. 7 Musaa yaa kona koraraa miyaa leẽ haa mibeeri cada giyaa iliihhami. Teesaaqay see, ⁄uuru gu ilaa kosi yaay faakiriiba, gimati slaqwa dosi see yaa doroꞌodiiba. 8 Waisraeeli gi gaiidiri sa gwaaꞌaraa da Musaa balalu mibeeri tami raqamaauu gu hhapee da Moaabuge, qatlaykaꞌa naqatloo giyaa iliigaasiri balalu hhakee.
9 Inkoo, Yosuuwa nanku Nuuni yaa kona waaway hari khisla, sa gimba Musaa nugwaa iliiqaasi dabaiĩ rawaa kosii, giyaa iliikahhiye hhama. Teesaaqay, Waisraeeli gugi akhamisiri ina haa gi yondiidiri gimbakira Taataa Iliitleemu gooay giyaa ilii ilakaay Musaa.
10 Tlaatleesoo da qatlaykeesaa, yaa kara hiica⁄iiba tletimiisay waku Israeelige gu Musaa pahha, hiĩ Taataa Iliitleemu gungwaa slaslaaslawa haa ina pandaa haa pandaa. 11 Gu lou, hhaku gwaa yondiidu Musaa gooay, gwaa yondiidu gimbakira goõ gu bakaꞌasa, hiĩ Taataa Iliitleemu gwaa ya⁄abi magu yondiidi yade Misirige, daqa Faraawge, daqa yondimiisee dosii goõ haa hhapee goõ da Misiri. 12 Wanaaba tletimiisay waku gwaa yondiidu gimba gu denu haa gu hiitlaꞌamuudisa, Musaa gooay giyaa iliiyondiidi pandaa da Waisraeeli gonge.