Musaa ⁄aafi kabiraa da Israeeli
33
1 Haã na ⁄aafa, Musaa yondimiisay gu Iliitleemu, giyaa kaay sa Waisraeeli, giyaa iliikahhiye gwaaꞌa. 2 Ina gi kaay tuba,“Taataa Iliitleemu yaagii ⁄eeti oõ gu Sinaaygo,
sa iliiawa dandiray,
ina yaagii tlay letu pahha
haa yaagii wanqasi daqa hida kosii, omeeri gu Seyiirigo,
wanqamee dosi yaagii cencuudisi oõ gu Paraanigo.
Ina yaagi khay sliimaa haa elefafaa da malayika dosi,
haa aslaa daa ooyiiyima daba gosii gu ⁄uyage.
3 Gu lou, Taataa Iliitleemu slai hida kosi,
haa yoó ga⁄ay hida kosi goõ daa tlintiꞌisi.
Yeꞌeeroo kokuu gonkoinaa yoó hiigupu⁄umisiyay sagaiĩ koina
haa yoó ooyiyay caacaahhamisu daqa doogwaa.
4 Musaa hindaa ilafahhi dandiray muriidaraa sariyaa,
hatee na aalimee da kaari hari khisla,
daqa doorii hida gu Israeeli.
5 Taataa Iliitleemu, gi mutemi gu Waisraeeli tleehhidi,
qatlay giyaadimiisee dooina giyaa iliikurunkuridiri,
sliimaa haa kabiraa goõ da Israeeli.”
6 Musaa gi kaay sa hida gu kabiraa da Rubeeni tuba,
“Etaa unkuray hhanti kaka⁄aday,
teesaaqay see, unkuray balalu sliimaa faadoo dooguna hiti coko⁄o tleehhite.”
7 Sa kabiraa da Yuuda gi kaay tuba,
“Ye Taataa Iliitleemu, akhasi ⁄aa⁄imu gu kabiraa da Yuuda,
harikhawanki inay daqa kabiraa dooinay waka da Israeeli.
Qwaatli hari dabaiĩ koku sa inay,
iliiayii kabiraa da Yuuda, daqa fa⁄ayaa dooinaa.”
8 Sa kabiraa da Laawi gi kaay tuba,
“Ye Taataa Iliitleemu,
hadisi sa Laawi tle⁄eẽ gu Uriimu haa Tumiimu,a
sa hhakee goó iliipaꞌamee ugu,
hhaã gaa koimisidi yade Maasage,
haa hangugi kabaaba⁄adiri maꞌay gu Meeriibage.
9 Inay yaa taqay gimbuusiri sa ayiĩ koina haa amu koina tuba,
‘Etaa dandiray hangu slaꞌanaaba unkuray,’
Digigi afahhami hiidayuuma dooina,
gi mayri baraslawa see yaꞌay koina.b
Sa gimba, inay gi ilakoniri gimba googu,
haa gi iliikoniri Ila⁄imbidu googu.
10 Inay caacaahhamisiyee laqwaloo da Yakoobo ilakaawa doogu,
caacaahhamisiyee hida gu Israeeli sariyaa doogu.
Walaawi ilaeehhimisiyee ubaanii pandaa dooguu,
daada⁄anee sadaaka masabaahu dooguu.
11 Ye Taataa Iliitleemu, ⁄aafi hindaqaruumaa dooina goõ,
haa dugu muunaboo⁄eesiye hari maguuma dooina,
hhamisi fa⁄ayaa dooina goõ,
dife fa⁄ayaa dooina hhantii tlayay kara.”
12 Sa kabiraa da Benyamiini gi kaay tuba,
“Haã na kabiraa gi slaiye Taataa Iliitleemu,
inay yoóti ibiidiyay hari qasaw ilaciyaa kosii.
Ina giyoóti ga⁄ay inay balalu sliimaa,
haa gi ibiidi tla⁄aã gu tioo koinay.”
13 Sa kabiraa da Yoseefu gi kaay tuba,
“Taataa Iliitleemu ⁄aafiye hhapee dosi,
hari rau gu kaaru rawaa gu rawgo,
haa hari hhaahhiyoo gu maꞌay,
goó ciiqee hhapeego,
14 daga ⁄aafiye hari ⁄aamu gu hhou goó hamaada hari tleemaa doó hamaadisa,
haa hari ⁄aamu gu kila slehheẽ.
15 Hari ⁄aamu gu hhou gu omeeri gu segi,
haa ⁄aamukee gu tioo gu wakaꞌalee.
16 Hhapee dosi hacide idadu goõ gu hhoi,
haa daqa ⁄aafiye hari hhoinay gu didiru gu Taataa Iliitleemu,
Taataa Iliitleemu hiĩ gwaay ca⁄u rukutiya daa cicaaci⁄age aslaa.c
⁄aafati yaa ilii⁄ete kabiraa da Yoseefu,
ina gu didiru tla⁄aã gu hhiee kosii.
17 Kabiraa da Yoseefu, maati khamaslaslaa
awkaꞌa pahha gu badiisu,
hari khasima gooina, maati ilaqaꞌadiyay fa⁄ayaa dooina,
sadee⁄imoo pahha hari khadami kosi.
Hari khasima gooina maati tlupidiyay hida gu hhapapu,
haa gigi ila⁄upiyay hiifaakoo da khooroo naqatloo.
Teesaaqay dagani iliiwana mibeeri elefu gu Efurayiimu.
Teesaaqay dagani iliiwana elefafaa da kabiraa da Manaase.”
18 Sa kabiraa da Sabulooni haa kabiraa da Isakaari gi kaay tuba,
“Ugu Sabulooni hhaꞌaluudi hhiyuuma dooguu,
ugu Isakaari hhaꞌaluudi hemamuu kokuu.
19 Inay kwahhasuusiyay hhakaꞌa gu yaamulooee gooba omeeri koinayge,
yade hida hadimisiyay sadaaka da slaiye.
Inay hindaqaruumidiyay hari idadu gu tlawa da didiri,
haa hari idadu doó boo⁄imisiye seehhinay gu kenga gu tlawage.”
20 Sa kabiraa da Gaadi, gi kaay tuba,
“Dugu daareesiye Iliitleemu, goó hadisa sa Gaadi daqa diitlaakhwi.
Hida gu kabiraa dosi maa iliitlaiyay fa⁄ayaa dooina pandaduge,
diidaw pahha goó khuupuuꞌuda, baqamidi tu⁄a daba baku saga gu makimoo waku.
21 Ina hingii leehhi daqa da hhapee da hhoi sa ina;
qatlay giyaadimiisee da hida giyaa iliikurunkuridiri sliimaa,
inay yaa hadisiri daqa da hhapee sa ina.
Kabiraa da Gaadi yaa hiigaasidi haaki da Taataa Iliitleemu,
haa yaa iliiayri kabiraa waka da Israeeli ma slayri haaki dooina.”
22 Sa kabiraa da Daani, gi kaay tuba,
“Hida gu Daani, ti yaꞌay gu diidaawee pahha,
goó iliitlo⁄osee fa⁄ayaa dooina yadaa hhapee da Basaanigo.”
23 Sa kabiraa da Nafutaali, gi kaay tuba,
“Ye Nafutaali gwaa ankhu hhoinay gu Taataa Iliitleemu,
ugu gwaa hacu ⁄aafa da Taataa Iliitleemu,
ugu hii⁄utlida bara da ilacindoo gu biraa haa gu waayee yade naqatloo tlawa da Galilaaya.”
24 Sa kabiraa da Aseeri, gi kaay tuba,
“Iliitleemu ⁄aafiye kabiraa da Aseeri hari khisla,
ba⁄ay da yaꞌay goõ gu Yakoobo,
inay digi slaiye ba⁄ay kabiraa waka da Israeeli,
hhapee dooina daga hacisiye hari khai gu miseyituuni,
da hheꞌesi, inay slayee du⁄iya wa⁄a.
25 Yaamu koina digi ga⁄ay ha bi⁄inaa gu tleedu
haa afamaraaee gu sikhimi haa gu ⁄aray,
inay maa konay ⁄uuru haa digimaa ga⁄ay
qatlay goõ gu ibinaa dooina.”
26 Musaa giigaasi hari gimbaki tuba,
“Ye hida gu Israeeli, wanaaba waku gu Iliitleemu googuna pahha,
goó hii⁄eeta rawgo gi iliiaꞌay unkuray,
hari amoo da tlonga hari wanqamee dosi.
27 Iliitleemu gu koraraa haa koraraa goóba hiifaakoo na daqa doogu da ilii ibinaa,
dabaiĩ kosi noó geregediyay ugu balalu sliimaa.
Ina ila⁄upi fa⁄ayaa dooguna pandaa doogunaa,
haa gi kaay tuba, ‘Hhamisakini inay gonkoinaa!’
28 Teesaaqay, unkuray hida gu Israeeli ibitay hari hhoinay,
Yakoobo dugu tlakweemisiyaaba ha wakinay,
hhapee daa hacidige baruũ haa difaay da ⁄abi,
daqa haã raw giyoó ilii tihhimisiye rau.
29 Ye hida gu Israeeli, unkuray dangwaa ⁄aafi.
Ti miyaa gu unkuray pahha,
hida daa ilabuꞌumi ha Taataa Iliitleemu.
Ina na imbagoo doó iliiawa unkuray,
haa pangaa guroó khawa kaba⁄amuu.
Fa⁄ayaa dooguna dakhadakhiyay pandaa doogunay,
unkuray hagitii kala⁄aday inay hhapeege.”