32
1 Ina gi kaay tuba,“Itatiisi raw,
ana haa gimbuusa,
haa khooroo,
itatiisi gimba goy ga gimbuuse.
2 Caacaahhamisu goy yaa hiihuuiye tlubay pahha,
gimba goy yaa tihhine rau pahha,
ciiqaw pahha rawaa gu sluufaa gu naa⁄age,
wahheelimaa pahha rawaa gu baruũ gu naa⁄age.
3 Ana ha kakaama uma gu Taataa Iliitleemu,
daareesa Iliitleemu googuna, ina na didiri.
4 Taataa Iliitleemu na hhafida gu iliiba⁄aru,
yondu gosi konaaba dakoo, amamu kosi goõ guti haaki.
Ina guti lou, Iliitleemu gubasli dakoo,
ina yoóti yondiidi gimba gu hhou haa gu haaki.
5 Hida kosi hiĩ yondiidiri gimba gu ilamuree pandaa dosii,
sa ilamuree dooina, inay ti yaꞌay kosiiba kara,
ti laqwaloo da kooma tlakwaroo haa daa papa⁄adi.
6 Inkoo, haã na amoo dari buaraagoo Taataa Iliitleemu,
ye unkuray hida gwaa bawumidee haa gubasli waaway?
Ina ti Taataa googunaabaslii, tlehhidiisay googuna,
yaa ⁄isimi unkuray ma hhapee da didiri tleehhitiri?
7 Slawaw, balalu hhakira gu wakaꞌalee,
ilatahha laqwalotira da wakaꞌalee daay catidi.
Maamisa ayiĩ kokuna, inay sangu kaayiyay,
maasa gaduũ kokuna, inay sangu ilakeesiyay.
8 Qatlay, Ina gu Rawaa gu Idadu Gonge Waara,
giyaa iliideehhimi sa hida gu hhapapu aalimee dooina,
qatlay giyaa iliideehhimi hida goõ,
kila hhapee sagaa hadisi digimi kosi,
iliikoomaraa da faadoo da laqwaloo da Waisraeeli.
9 Sa gimba, Taataa Iliitleemu hindaay leehhi dandiray,
ma hida kosi tleehhidani,
ina yaay leehhi dandiray laqwaloo da Yakoobo,
ma hida kosi tleehhidani gu hiikaasee,
laqwaloo haa laqwaloo.
10 Taataa Iliitleemu, higaa slay okookoiĩ koti kongoqomeege,
hatli gubaslige idoo lensee,
goó pupukha caaqwa da dihhi.
Ina higaa ga⁄ay haa higigi iliikoomi,
hotu da ila dosi pahha.
11 Kara, tambaycira⁄a gooay doó ga⁄awa cuuru gosi,
gi tlatlayda rawaa gu haaoo dosii,
gii tlaara⁄asida hhababee kosi, magi iliiaydi,
haa gigi geregeta rawaa gu hhababee kosii.
12 Taataa Iliitleemu kilesi, nigiraa giyaadi inay,
yaa wanaaba iliitleemu gu dahaa, gwaa iliiaw inay.
13 Ina giyaa ilakhiinaaꞌadisi inay daqeemoo gwaa kangaaga⁄eege gu hhapetee,
inay gi ⁄aginiri baruũ gu qaymamu.
Sigigi hadisi dinu hhafidago,
haa du⁄iya da miseyituuni,
gwaa dinaraaraw hhapee daa koomage tle⁄eẽ.
14 Inay gi ⁄aginiri du⁄iya haa ilibaa,
raqoo gu yakwaygo haa raqoo gu aaraago,
du⁄iya da ⁄ambeenay haa da aaraa,
da gondadee gu hhoi gu Basaani,
haa ganoo da hhoi hari khisla,
gi kitahhantiri difaay da ⁄abi.
15 Hida gu Israeeli digigi ⁄aafi
yaati amoolaa wahhaahhaadiri hari khisla.
Teesaaqay see, inay gi siꞌiri Iliitleemu,
gi mayri Iliitleemu gwaa tleehhu inay,
inay gi qooqiidiri hhafida gu ilabuꞌuru gooina.
16 Inay gi ⁄isiniri Iliitleemu,
ma arimi tloomu sa iliitleemamee koina,
haa gugi ⁄isiniri ma qupidi
sa sanaamamuu koina gu slahhaaꞌasa.
17 Inay gi hadimisiri sadaaka sa gieeri,
hhaã gu Iliitleemu gooba,
iliitleemamee gi hhidinee,
iliitleemamee gungaanii ca⁄asee baalahhanki kilesi,
iliitleemamee hhaã ayiĩ kokuna giyaa tlaꞌamuudiriiba.
18 Unkuray gii leehhediri mawaraa Ilabuꞌumiisay googuna,
Iliitleemu gu lou,
gwaa hadisu slafimaa sa unkuray,
hiĩ dangugi afahhami.
19 Qatlay Taataa Iliitleemu giyaa ilii arimi gimbaki,
ina gigi may inay,
sa gimba dugwaa slahhaaꞌasi ha yaꞌay kosi,
gu hhawatee haa gu tigay.
20 Taataa Iliitleemu gi kaay tuba,
‘Ana ha yakwa pandaa doy daqa dooinaa,
ma arimi hiigaasoo dooina yooti malaaꞌay,
sa gimba, inay ti laqwaloo daa papa⁄adi,
yaꞌay goóba ibinaa da loi.
21 Inay hiĩ ⁄isiniri ana ma arimi tloomu,
sa idotaꞌa da iliitleemu gooba,
haa hinigi slahhaaꞌasiri hari sanaamamuu koina.
Teesaaqay, ana hagi laqa inay, ma ariniri tloomu,
sa hida gu hhapapu gooba,
haa sa hida gu hhapapu hhakaꞌa gubasli caahhamuu.
22 Sa gimba, qupidaa koi hiĩ ooyiri aslaa pahha,
da⁄iyay hhapee waꞌay naqatloo khonsleebaage,
aslatee hhamisida khooroo haa idadu gu waaree,
slime hhamisida idadu goõ gu waaree kibeeri gu omeerige.
23 Ana ha upaima gimba wa⁄a gu tlaku daqa dooinay,
haa hagi cakhadima hari fayee koi.
24 Inay hiti slosloinay sa qori gu dihhu,
haa digiti hhamisi hari amaaiya da dihhi.
Ana haa ya⁄aba makay gu koomee ⁄atloo gu dihhi, digima iliitlai,
haa deesasee gu koomee qada gu dihhu,
goó hhumbaadee hhapeege.
25 Khooroo da maraai koinay,
fa⁄ayaa dooina cu⁄iyay inay hari pangaaee,
inay digi tawaalina ha tlaꞌamee maraai koinay.
Qaraiya dooina haa sagameeru gooina digiti cu⁄i,
slime daaqay gu ruꞌumee haa gaduũ digiti cu⁄i.
26 Ana haa kaay ambee,
Waisraeeli hangwaati aloo hhamisa sumuku,
ana haati aloo hiidahhasa ⁄isiru,
hida ma mayri hiislaslaw inay.
27 Teesaaqay see, haa ilagwaa⁄i hiiduubidu gu fa⁄ayaa,
fa⁄ayaa dooina ba⁄atii caahhiyay tlakwaroo,
haa gi kaayiyay tuba, “Dabaiĩ koti niĩ kaba⁄iri,
Taataa Iliitleemu hiĩ yondiidiiba gimbaki goõ.”
28 Hida koi gaa hiileehhi ti hida gu basli tana⁄oo,
konaaiiba waaway waꞌay koinay.
29 Bere yaati aloo konay waaway,
yaa aloo caahhiyay gimbaki,
kara yaa aloo hiidahhasiyay baraslawaraa,
hiifaakoo dooina maati malaaꞌay.
30 Heedi leẽ yaa malee hiidahhasi gusiru hida elefu leẽ,
baku hida cada yaa malee hiidahhasiri gusiru hida elefu mibi?
Ti sa gimba Ilabuꞌumiisay googuna Taataa Iliitleemu yaa may unkuray,
dangugi taatahhi unkuray sa fa⁄ayaa dooguna.
31 Fa⁄ayaa doori see inay loi hiĩ baraslayri pandataa tuba,
iliitleemu gooina konaaba ⁄uuru ti Iliitleemu googuna pahhaaba.
32 Musabiibu gooina ti musabiibu gu Sodomaa,
haa yaati qaymamu gu Gomoora dahhi.
Sabiibu gosi kona hiihhaaboosluuda,
oloꞌongay gosi see yaati haci qada.
33 Difaay dooina ti qada gu deesu pahha,
konta qada goó gaasa gu tafahhaa pahha.
34 Ana kooma gimba tay daqa dooii,
gwaati qaasii raqama,
haa gugi naacimi maraai koiige, gu iliiqamidu raqami.
35 Gimbakee ti nahiĩ, ana hoó hiislarakhasa ⁄imbu.
Ana hagimaa bua, qatlay yeꞌeeroo koina gimaa iliifacakumisiyee.
Baloo dooina da gwaaꞌaraa yaani daadaauusidi,
haa hhamisaraa dooina giyaati iliikhayda ciraai.’
36 Taataa Iliitleemu maa ilabuꞌuna hida kosi,
haa gi ⁄awaarina sa yondimiisee dosi,
qatlay gi iliiane ⁄uuru gooina hingii faaki,
kara hiti wanay angaamaka guũ meetee,
tongee baku inay gu tongee gooba.
37 Teꞌesii, Taataa Iliitleemu maa maasi inay tuba,
‘Inkoo, iliitleemametira tokuna kaanokina,
hhafida gaa iliilakitiri ma ba⁄antiri?
38 Kaanokina iliitleemamee hhakee,
gwaa ⁄agimee wahhana gu kuꞌunaanay googuna gaa hadimisidiri sadaaka,
haa gi kitahhaniri difaay da sadaaka dooguna da kitahhu?
Inkoo, yaay tlayee, mangu iliiayri
haa mangu ga⁄ayri unkuray!
39 Teesaaqay baraslaw tuba, Ana, Ana Naina!
Wanaaba Iliitleemu waku ti Ana kilesi.
Ana hoó gaasa haa hoó slafisa,
hoó ilaqaꞌa haa hoó hhoeesa,
gimbakeesii, hhaku heedi lensee
gu hiidahhasa tlaatlahhasa ma may yondiidu.
40 Inkoo, ana ha waratlaysa daba goy rawge, haa gi kaawa,
Gu lou, idoo goó ilii ibiide gooay koraraa haa koraraa goóba hiifaakoo,
41 ana ha bua ⁄imbu daqa fa⁄ayaa dooii,
haa gi bua ⁄imbu daqa hhakaꞌay guni wakee,
qatlay ana ga ilii duuqe pangaa goy goó wanqawanqa,
haa gugi oowa daba gooii, ma hukumi.
42 Ana ha cu⁄a fa⁄ayaa wa⁄a, fayee koi hiti naa⁄iyay ceedee,
haa pangaa goy gi iliikerekereꞌemisiye slaqoo koina,
hiti naa⁄i ceedee da hida hhakaꞌa daa cu⁄i haa daay ⁄utli gaugo,
sliimaa haa sagaiĩ gu giyaadimiisee da fa⁄ayaa.’
43 Ye unkuray, hida gu hhapapu goõ,
hhaꞌaleesa Taataa Iliitleemu sliimaa haa hida kosi,
sa gimba ina bui ⁄imbu,
sa ceedee da yondimiisee dosi daa tuutuquti,
ina bui ⁄imbu daqa fa⁄ayaa dosii,
haa gi ilabuusli hhapee da hida kosi.”
44 Teesaaqay ginaa iliikhayri Musaa haa Yosuuwa nanku Nuuni, haa gi sominiri gimba goõ gu raaꞌameti, tay hida gi tooinaa akhamisiyay. 45 Musaa giyaa iliihheꞌesi somaa gimba goõ gu raaꞌameti, sa Waisraeeli goõ, 46 sigigi kaay tuba, “Qaasa muunaiĩ kokunay, gimbaki goõ sanguũ ilatlay letuti, unkuray ma hiidahhasidiri ilakaawa yaꞌay kokuna, ma ilakoniri naraꞌa gimba goõ gu ilakaawatee haa caacaahhamisukee. 47 Gimba gu sariyati ti gimba gu diitiray kilesiiba daqa doogunay, ti gimba guroó khawa slafimaa. Teesaaqay, hari sariyati ha ibitay ibinaa da tleedi hhapetiray ga hii⁄utla kaydeege, tlo⁄osaa gu Yoridaanige.”
Ilakaawa da gwaaꞌaraa da Musaa
48 Baloteesii lenge Taataa Iliitleemu gi kaay sa Musaa tuba, 49 “Taa⁄a ilakhiinaaꞌadi oõ gu Abariimuge, cina da oõ gu Neebo naqatloo, gu hhapee da Moaabuge waara, bara da ilacindoo gu rawaa khuꞌusa gu yaamu gu Yeeriko. Teꞌesaa, la yuꞌuta hhapee da Kanaani, hhapee ga hadise sa Waisraeeli, magi aaliniri. 50 Okiray ga ilii ilakhiinaꞌada kayde, ugu ha gwaꞌata haa hangigi ilagaasida haa hida koku. Idoo goo iliigwaꞌate yooti hhia googu pahha Haruuni, giyaa iliigwaai oõ gu Hoorige, ina hingigi ilagaasi haa hida kosi gwaa giyaadee kaka⁄u. 51 Sa gimba, unkuray cada kokuna hanaa siꞌidiri pandaa da Waisraeelige, yade maꞌay gu Meeriiba-Kadeesige, kongoqomee da Siniige, sa gimba haa lanqatiriiba muree dooi tuba, ana ti Iliitleemu, tla⁄aã gu Waisraeelige. 52 Inkoo, ugu loi haga arinta hhapetee da pandaa dooguu waara. Teesaaqay see, ugu hiiguntaaba hhapeteesii ga hadise sa Waisraeeli.”