Yosuuwa hiioy daqa da Musaa
(Faadoo 27:12-23)
31
1 Da hheꞌesi, Musaa gi gimbakay gimbaki daqa Waisraeeli gonge, 2 sigigi kaay tuba, “Inkoo, ana kooma koraraa miyaa leẽ haa mibeeri cada, ana hangii loay. Kara, Taataa Iliitleemu siniĩ kaay tuba, ‘Ugu tlo⁄osidaaba duuduki gu Yoridaani.’ 3 Taataa Iliitleemu, Iliitleemu googuna, ina loi na giyaadi tlo⁄osa duudukee gu Yoridaani pandaa doogunay, ma hhamisi hida goó ibiidee hhapapu hhakeesii. Teꞌesii unkuray asu aalintay hhapee dooina. Slime, Yosuuwa na giyaadi tlo⁄osa pandaa doogunay, idoo Taataa Iliitleemu giyaa iliikaay gooay. 4 Taataa Iliitleemu, maa hhamisi hida gu hhapapu hhakee, idoo giyaa ilii hhamisi gooay Sihooni haa Oogu, watemi da Waamoori, sliimaa haa hhapee dooina goõ. 5 Taataa Iliitleemu sangu qay unkuray ⁄uuru gu kaba⁄araa inay, unkuray kwanda gi yonditee inay, idoo hingwaa ilii ilafahhi gooay. 6 Khamaslaslaa tleehhida haa kooma muunaiĩ gu ⁄atlimaa. Hhanti tlaꞌamutay gimati li⁄eemoo see sa inay, sa gimba, Taataa Iliitleemu, Iliitleemu googuna hadakay haa unkuray, ina hangu iliiay unkuray balalu sliimaa haa hangu mayaaba.”7 Da hheꞌesi, Musaa gi eteedi Yosuuwa, sugugi kaay pandaa da hida gonge gu Israeeli tuba,
“Khamaslu tleehhidi haa koomi muuna gu ⁄atlimaa, sa gimba, ugu hadakayda sliimaa haa hida hhanki hhapetira naqatloo, Taataa Iliitleemu giyaa seelimu sa ayiĩ koina tuba, sigi hadisi, ugu sigi hadisida magi aaliniri. 8 Taataa Iliitleemu ina loi sangu giyaadi unkuray, ina maa sliimaa wana haa unkuray, ina hangu iliiay unkuray balalu sliimaa haa hangu mayaaba. Hhanti tlaꞌamutay ma simbariigwaꞌa see.”
Somiru gu sariyaa hiifaakoo da kila kori gu fanqu
9 Teesaaqay, Musaa gi handikimi ilakaawatee haa caacaahhamisukee haa gigi hadisi sa hhapalooee yaꞌay gu Laawi, sliimaa haa gaduũ goõ gu Israeeli. Motoliya da Laawi, inay naa geregediri Sandikoo da Ila⁄imbidu da Taataa Iliitleemu. 10-11 Musaa gi kaay sa hhapalooee haa giyaadimiisee tuba, “Kila kori, Waisraeeli kwanda giyaa hiikurunkuridiyee daqa lenge, sa losonuusa losona gu cuuraiĩ daqa daa hiileehhige ha Taataa Iliitleemu, Iliitleemu googu da iliifiroo. Unkuray, kwanda ga somintee ilakaawatee haa caacaahhamisukee sa hida, qatlay gu losonage kila kori gu fanquge, kori da iliislaiye gooba iinanu digima buꞌudi. 12 Teꞌesii, ugu kurunkurii hida hhakee goõ, hhawatee, tigay, daaqay haa hhakaꞌa gu yaamulooee gooba gu waaree yaamu kokunay, ma akhasiri haa mangi caacaahhamisiri, gwaa⁄amee Taataa Iliitleemu, Iliitleemu googuna, haa gi khuꞌunay naraꞌa yondiidu gimba goõ gu Sariyati. 13 Yaꞌay koina see gu hhidimee ilakaawatee haa caacaahhamisukee, kwanda gi akhasiyee haa hingi caacaahhamisiyee gwaa⁄araa Taataa Iliitleemu, Iliitleemu googuna, qoomaay goõ ga iliiꞌibitee hhapee ga hii⁄utla kaydee, tlo⁄osaa gu duudu gu Yoridaanige.”
Ilakaawa da hiifaakoo da Taataa Iliitleemu sa Musaa
14 Da hheꞌesi, Taataa Iliitleemu gi kaay sa Musaa tuba, “Baloo doogu da gwaaꞌaraa yaani daadaauusidi. Inkoo, eteedi Yosuuwa, khawaa sliimaa Hemaa da Iliislaslawge, ina ma sugu hadisi ilakaawa da yondu.” Teesaaqay, Musaa haa Yosuuwa gi hadakayri Hemaa da iliislaslawge.
15 Teꞌesii, Taataa Iliitleemu yaagi iliica⁄i inay hemaage, waꞌay gu tlongiya daa unguruiya pahha. Tlongiyatee gi qaditi teꞌesii afamaraa gu hemaage. 16 Da hheꞌesi, Taataa Iliitleemu gi kaay sa Musaa tuba,
“Yuꞌudiyaa, ugu dugu qaasakay aysage haa ayiĩ koku, hida hhanki hiniti mayay haa gi yondiidiyay slipalauuma haa iliitleemamee gu hhapetee gi ilii ibinaa kayee. Inay hiniti mayay ana haa gi kwahhiyay ila⁄imbidu goy gaa qaasi haa inay. 17 Baloteesii, ana maa qupida sa inay, ana hagimaa maw haa sigimaa yakwa pandaa doy, inay digimaati hhamisi. Gwaaꞌaraa haa maana wa⁄a maati iliikhayay inay. Letutee inay maa kaayiyay tuba, ‘Maanatee yanti khaydi daqa doorii, sa gimba Iliitleemu goori wanaaba sliimaa haa dandiray!’ 18 Gu lou, baloteesii ana hamaati yakwa pandaa doy, sa gimba inay hiĩ yondiidiri tlakwaroo hari tlaatleesa firiiriru iliitleemamee wakinay.
19 Inkoo, handikima raaꞌameti, caacaahhamisi Waisraeeli haa ilafahhe magi raairi, ma ilatlawa doy tleehhiti daqa dooinay. 20 Qatlay hagamaa iliihheꞌese hiiguumisa inay hhapee doó guumage ilibaa haa dinu, idoo gaa iliifadidi gooay sa ayiĩ koina, inay maa ⁄aginay gi akhaakhanay, teꞌesii inay maati iliifookidiyay iliitleemamee wakinay gigi firiirinay. Inay hinimaa qooqiidiyay ana haa gi mayay ila⁄imbidu gooi.
21 Qatlay gwaaꞌaraa haa maana gimaa iliikhayde inay, raaꞌameti maa ilatlayda daqa dooinay, sa gimba laqwaloo dooina goõ, digimaa afahhanaaba raaꞌameti. Inkoo see, ana ha khua, idoo gi ilahudeedemisiyee muunaiĩ koinay, hagi iliikahhe hiiguumisa hhapee sigaa hiifadidige hadisa hari seeliru.”
22 Da hheꞌesi, Musaa gi handikimi raaꞌameti balotee loi haa gi caacaahhamisi Waisraeeli.
23 Taataa Iliitleemu gi ilakaay Yosuuwa nanku Nuuni tuba, “Khamaslu tleehhidi haa koomi muuna gu ⁄atlimaa, sa gimba, ugu naridaada Waisraeeli hhapee sigaay fadidige hadisa hari seeliru, kara ana loi ha sliimaa waara haa ugu.”
24 Qatlay Musaa giyaa iliihheꞌesi handikiru kitaabuuge, gimba goõ gu ilakaawatee haa caacaahhamisukee tlaatleesoogo hiifaakoo naqatloo, 25 ina gi hadisi ilakaawati sa Walaawi gwaa koomee yondu gu geregediru Sandikoo da Ila⁄imbidu da Taataa Iliitleemu, 26 sigigi kaay tuba,
“Oowa Kitaabuki gu Sariyaa lugu qaasiday ilaciyaa haa Sandikoo da Ila⁄imbidu da Taataa Iliitleemu, Iliitleemu googuna, ma ilatlatlaw tleehhidi daqa doogunay. 27 Gu lou, ana khua ambee, unkuray ti kanimiisee haa gwaa muunaiĩ karaarahhee. Bere unkuray haa kanimisidiri Taataa Iliitleemu, qatlay gaa iliislafe haa gaa iliiwaare sliimaa haa unkuray, inkoo, maa kanimisiday waa maka, qatlay ana gamaa ilii hheꞌese gwaaꞌa?”
28 Musaa gi kara kaay sa Walaawi tuba, “Inkoo, kurunkuraaruu pandaa dooii gaduũ goõ gu kabiraa dooguna haa maꞌafiisa dooguna goõ, ma gimbuusi gimbaki, magu akhasiri hari eaa koina. Ana eteeda raw haa hhapee, ma masaydii tleehhidiri daqa dooinay. 29 Sa gimba, ana khua ambee, qariqaaqari goo iliigwaae, unkuray hangooti slasla⁄eedeesiday hari mawaraa amotira hangwaa ilafahhi maga sirakontiri. Balalu gwaa khoceege, dangwaa iliikhay maana, sa gimba maa yonditay tlakwaroo pandaa da Taataa Iliitleemuge, haa gugi slahhaaꞌasiday hari yondu googuna gu tlaku.”
Raaꞌamee da Musaa
30 Da hheꞌesi, Musaa gi somimi gimba gu raaꞌameti, tlaatleesoogo hiifaakoo naqatloo, pandaa da hida gonge gu Israeeli gwaa hiikurunkuridee.