Hiifookida daqa Iliitleemuge haa ilamooyiru
30
1 Musaa gi kaay sa Waisraeeli tuba, “Qatlay ⁄aafati goõ haa ilawaamisu gaã qaasi pandaa doogunay, gimaa iliikhaye unkuray, unkuray hagumaa ilahudeemisiday muunaiĩ kokunay, hhapapu dangumaa iliipasidisiye ha Taataa Iliitleemu, Iliitleemu googuna. 2 Teꞌesii, unkuray haa yaꞌay kokuna gamaa iliifookitee daqa Taataa Iliitleemu, Iliitleemu googunay, haa gugi akhamisiday hari muunaiĩ kokuna goõ haa hari ilahudaa kokuna goõ, idoo hanguũ ilii ilafahhi gooay letuti, 3 da hheꞌesi, Taataa Iliitleemu, Iliitleemu googuna maa ⁄awaarina haa dangwaagii kurunkuri, hhapapu gongo giyaa iliipasidisi unkuray. 4 Unkuray dangwaamati pasidisi see hhapapu gu segenge khoorotii, Taataa Iliitleemu, Iliitleemu googuna, hangumaay kurunkuri haa hangumaa ki⁄isi kara. 5 Ina hangumaa ki⁄isi hhapee da ayiĩ kokunay, unkuray hagagi aalintay. Kara ina hangu pihhi unkuray haa hangu hiitlakhweesi hari khisla ba⁄ay da ayiĩ kokuna see. 6 Taataa Iliitleemu, Iliitleemu googuna maa ⁄isina unkuray haa laqwaloo dooguna, ma kontiri muunaiĩ daa ilabuusli, magu slaꞌadiri ina hari ilahudaa kokuna goõ haa hari ibinaa dooguna goõ haa ma ibitiri. 7 Taataa Iliitleemu, maa qaasi ilawaamisuki goõ daqa fa⁄ayaa doogunay, gu wakee unkuray haa goó labaꞌasee unkuray. 8 Unkuray, kara akhamisiday Taataa Iliitleemu haa ha ooday ilakaawa dosi goõ sanguũ ilafahhi unkuray letuti. 9 Da hheꞌesi, Taataa Iliitleemu, Iliitleemu googuna, maa pihhi unkuray hari khisla, yondu googunay goõ, laqwaloo da guraiĩ kokuna, kuꞌunaanay wa⁄a haa baruũ qaymamu kokunay. Taataa Iliitleemu, maa hhaꞌaluudi pihharaa kara unkuray, idoo giyaa ilii hhaꞌaluudi gooay pihharaa ayiĩ kokuna. 10 Ina hangu ⁄aafi unkuray, bere unkuray ha akhamisiday Taataa Iliitleemu, Iliitleemu googuna, haa bere iliikontay sariyaa haa ilakaawa dosi daa handikimi kitaabukii gu sariyaage, haagii fookitay daqa Taataa Iliitleemuge, Iliitleemu googuna, hari ilahudaa kokuna goõ haa hari slafimaa kokuna goõ.”Slafimaa haa gwaaꞌaraa
11 Musaa gi ilakoomi gimba sa hida gu Israeeli tuba, “Ilakaawati hanguũ ilafahhi unkuray letuti, yaati karahhadiiba daqa doogunay oowaraa, kara ti segeẽ gooba haa unkuray. 12 Ilakaawati rawge wantaa hagi kaaday tuba, ‘Ti miyaa na day rawaa gu raw naqatloo, ma sandiraa khay haa gigi kakaana sa dandiray, maga itatiimisani haa maga yondiidani?’ 13 Kara, tlo⁄osaa gu tlawa da didirige wantaaba, hagi kaaday tuba, ‘Ti miyaa na hiidahhasi tlo⁄osa tlawa da didiri, ma sandiraa khay haa gigi kakaana sa dandiray, maga itatiimisani haa maga yondiidani?’ 14 Teesaaqay gooba! Gimbaki ti ilaciyaa kokuu wana hari khisla haa unkuray, muunaiĩ kokunay wana haa afaiĩ kokunay wana, magu yonditiri.
15 Yuꞌudiyaa, letuti ana haã qaasi pandaa doogunay hiileehha, leehhaw hhoinay ma slaydiri slafimaa, baku tlakwaroo ma slaydiri gwaaꞌaraa. 16 Inkoo, ana hangu ilakaawa unkuray letuti ambee, slaꞌa Taataa Iliitleemu, Iliitleemu googuna, ibiida amoo dosii idoo gi iliislaiye gooay ina, haa iliikooma ilakaawa dosi haa sariyaa dosi goõ. Teesaaqay, unkuray dangu pihhi haa hiitlakhweesiday, kara ina loi, Taataa Iliitleemu, Iliitleemu googuna, ⁄aafi unkuray hhapeteesii ga iliiguuma kaydee haa hagagii ⁄utliday.
17 Teesaaqay see, bere ha hiifookitay segenge daqa Iliitleemugo, gugi mayday akhamisu, haa dangugii dafidi firiiriru iliitleemamee wakinay gigi hhaꞌaleesiday, 18 ana sangu kaawa letuti loi ambee, guti lou danguti hhamisi. Unkuray ha ibitaaiiba ibinaa da tleedi, hhapeteesii ga hii⁄utla kaydee, hari tlo⁄osaa gu duudu gu Yoridaani.
19 Letuti ha eteeda raw haa hhapee, ma masaydii tleehhidiri daqa doogunay tuba, yuꞌudiyaa, letuti ana haã qaasi pandaa doogunay hiileehha, leehhaw ⁄aafaraa ma slaydiri slafimaa, baku leehhaw ilawaasa ma slaydiri gwaaꞌaraa. Inkoo, leehhaw slafimaa unkuray haa yaꞌay kokuna, ma ibitiri ibinaa da tleedi. 20 Unkuray leehhaw slaꞌamuu Taataa Iliitleemu, Iliitleemu googuna, akhamisakuna haa nakafaw daqa dosii, sa gimba ina na slafimaa kokuna haa tledaruũ gu ibinaa dooguna. Teesaaqay, hagani ilii ilakontay ibinaa hhapee giyaa seelimi sa ayiĩ kokuna, Aburahaamu, Isaaka haa Yakoobo tuba, sigi hadisi inay.”