Hii⁄abeesa da Ila⁄imbidu Moaabuge
29
1 Hiĩ na gimba Waisraeeli kwanda gi yondiidiyee sa iliikooma ila⁄imbidu, hiĩ Taataa Iliitleemu gi ⁄isiisine haa inay hhapee da Moaabuge. Hiĩ ti hiiroogisa ila⁄imbidukiray, Taataa Iliitleemu giyaa ⁄isimi haa inay oõ gu Horeebuge.2 Teesaaqay, Musaa gi eteedi Waisraeeli goõ, sigigi kaay tuba, “Unkuray loi haa antiri hari ilaa kokuna, idoo Taataa Iliitleemu giyaa yondiidi daqa mutemi gu Misirige, daqa yondimiisee dosii goõ haa daqa hida goõ gu hhapee dosi. 3 Hari ilaa kokuna loi haa antiri gimba gu denu gu bakaꞌasa, Taataa Iliitleemuu giyaa yondiidi. 4 Teesaaqay see, letuti naqatloo Taataa Iliitleemu, sangu kahhi hadisa unkuray hiidahhasa da caahharaa, ilaa guri arimaa, gimati eaa guri akhamisu see. 5 Hari qoomay gu koraraa mibeeri cigahha, ana hanguraa ilii giyaadi unkuray kongoqomeege, qayroo kokuna yaa faakiriiba, ma ye⁄eetoo kokuna see, yaa faakiriiba yeꞌeeroo kokunaa. 6 Unkuray haa ⁄agintiriiba mukaatee, haa kitahhantiriiba difaay, gimati idoo lensee doó ooniidisa, ma caahhadiri tuba, ana na Taataa Iliitleemu, Iliitleemu googuna.
7 Qatlay gaa iliidaadiri daqatii, Sihooni mutemi gu Hesibooni haa Oogu mutemi gu Basaani yaa khayri, ma gauusiri haa dandiray. Teesaaqay see, hagigi kaba⁄ani inay. 8 Dandiray hagii owani hhapee dooina haa hagagi deehhini sa kabiraa da Rubeeni, kabiraa da Gaadi, haa nusuu gosi sa kabiraa da Manaase, ma aalimee dooina tleehhiti.
9 Teesaaqay, oowa haa iliikoomaw gimba goõ gu ila⁄imbiduki, ma dangu pihhi yondu googunay goõ, ga yonditee. 10 Letuti unkuray goõ haã qadimitiri pandaa da Taataa Iliitleemuge, Iliitleemu googuna, giyaadimiisee goõ da kabiraa, hida kokuna gu deni, gaduũ kokuna, maꞌafiisa dooguna, hhawatee goõ gu Israeeli, 11 yaꞌay kokuna, tigay kokuna haa hhakaꞌa gu yaamulooee gooba goó ibiidee tla⁄aã googunay, goó magiidee magiiduu haa goó hheekee maꞌay sa unkuray. 12 Unkuray haã qadimitiri tiꞌii, ma hiiguntiri hari seeliru ila⁄imbiduge, hiĩ Taataa Iliitleemu, Iliitleemu googuna gi ⁄isiisine haa unkuray letuti, haa gigi iliiqaasi chapaa hari seeliru gosi, 13 mangu qaasi letuti ma hida kosi tleehhitiri, ina Iliitleemu googuna tleehhidi, idoo giyaa iliifadidi gooay haa giyaa ilii seelimi sa ayiĩ koti Aburahaamu, Isaaka haa Yakoobo. 14 Ina hiti qamaamidi ila⁄imbiduki hari seeliru gosi, ti haa unkuray kilesiiba gu waaree letuti tiꞌii. 15 Ina hiti qamaamidi ila⁄imbiduki haa dandiray gu waaree letuti tiꞌii, slime haa laqwaloo doori haã da kahhiye laqwaloo.
16 Unkuray loi ha khuꞌuday, idoo gaa ilii ibiidani hhapee da Misirige haa idoo gaa iliicatani hari tla⁄aã gu hhapapu wakinay, haati amoo daani tia naqatloo. 17 Unkuray haa antiri tla⁄aã gooinay iliitleemamee gu slahhaaꞌasa daa boo⁄imisi hari khai, tle⁄eẽ, hari feesa haa hari sahaabu. 18 Unkuray khuꞌuma naraꞌa, da hhanti wana hhawata baku hadee tla⁄aã googunay, motoliya baku kabiraa lensee diĩ qaditi letuti tiꞌii, muunaiĩ koina gumaa mawee Taataa Iliitleemu, Iliitleemu goori, haa gi firiirinay iliitleemamee gu hhapapu hhakee. Laqaraa teesaaqay maati gamaã gu khaimoo pahha, gu diirawa haa gi ⁄amuudi ⁄aamu gu qada tla⁄aã googunay. 19 Qatlay heedi gu taqay gi ilii akhasiye gimba gu ila⁄imbiduki, Iliitleemu giyaa seelimi hiitlaaꞌasa, ina hingigii duubi tuba, ‘Ana hhoinay waaraa, bere hagamati ibiidi see idoo ga iliislae gooay ana.’ Bere ina laqi teesaaqay, hiica⁄amuu gu gimbaki hiraati khay gwaaꞌaraa daqa hida gu hhoige haa daqa hida gu tlakwige see. 20 Taataa Iliitleemu etaa gu ilamooyinaaba heedikee, qupidaa haa tloomu gu Iliitleemu ooyiyay aslaa pahha sa heedikee. Ilawaamisu goõ daa handikimi kitaabukii gwaati iliikhayay heedikee, kara, Taataa Iliitleemu hiti tlakweemisi heediki haa hida goõ gu mara gosi. 21 Taataa Iliitleemu, guti paslisi heedikee tla⁄aã gu kabiraa gongo da Israeeli, ina ma slay maana wa⁄a, sa gimba dugwaati iliikhay ha ilawaamisu goõ gu ila⁄imbidu, daa handikimi kitaabukii gu sariyaage.
22 Qariqaaqari, laqwaloo dooguna damaa khawa, haa hhakaꞌa gu yaamulooee gooba gumaa khawee hhapapu gu segengo, maa arinay gwaaꞌaraa daa iliikhawa khooroo haa ga⁄ay hiĩ Taataa Iliitleemu giraa khay khoorooge. 23 Inay maati arinay hhapee dooguna goõ, daga hhamisi hari aslaa da tle⁄eẽ doó eteedine na sulufa haa cakhasaa. Wantaaba idoo lensee damaa tiꞌida haa damaa ilanihha rawaa kosii. Maati hhamisa da Sodomaa haa Gomoora haa Adimaa haa Seboyiimu pahha, daa hhamisi ha Taataa Iliitleemu hari qupidaa kosi gu dihhi. 24 Hida gu hhapapu goõ maa maasiyay tuba, ‘Taataa Iliitleemu yaa soꞌoy laqi taqay daqa hhapetii? Qupidaa hhanki gu dihhi amoo dooina na mala?’
25 Teꞌesii, inay sigimaa ilaki⁄isi tuba, ‘Ti sa gimba hida hhanki yaa mayri ila⁄imbidu gu Taataa Iliitleemu, Iliitleemu gu ayiĩ koina, ila⁄imbidu giyaa qaasi haa inay, qatlay giyaa iliica⁄asi inay hhapee da Misirigo. 26 Inay gi firiiriru kayri haa gi hhaꞌaleemisiri iliitleemamee wakinay, iliitleemamee gi hhidinee, hhaã sigaa hadisiiba ha Iliitleemu. 27 Teesaaqay, Taataa Iliitleemu gi qupidi hari khisla sa hida gu hhapetee, haa hiraagi khay hhapeteesii ilawaamisu goõ daa handikimi kitaabukii. 28 Taataa Iliitleemu hari qupidaa gu dihhi haa hari slahhaaꞌamee da didiri, gigi tu⁄i inay hhapee dooinaa haa gigi ila⁄upi hhapee wakayge, da iliiwane gooay inkoo.’
29 Gimba daa yakwi guti Taataa Iliitleemu, Iliitleemu goori. Teesaaqay see, gimba daay tlaaꞌasi ti koori haa laqwaloo doori, koraraa haa koraraa goóba hiifaakoo, ma yondiidani gimba goõ gu sariyati.”