Ilabuꞌumiisee
Waisraeeli qwatlage haa Wakanaani daa meti
1
1 Qariqaaqari, Yosuuwa giyaa ilii gwaai, Waisraeeli yaa maasiri Taataa Iliitleemu tuba, “Ti kabiraa haloo na qwatla kayda gesaa haa Wakanaani?”2 Taataa Iliitleemu gigi ilaki⁄isi inay tuba, “Kabiraa da Yuuda na qwatla kayda gesaa haa Wakanaani. Gu lou, hhapetee da Kanaani hagaã taatahhi dabaiĩ koinay.”
3 Da hheꞌesi, kabiraa da Yuuda gi kaayri sa hhiee koina, kabiraa da Simi⁄ooni tuba, “Hangu ilagaasidee haa dandiray, ma qwatla kayni haa Wakanaani, ma hii⁄utlani hhapee sandaa hadisi ha Taataa Iliitleemu. Slime, dandiray see, hangumaa ilagaasana haa unkuray gamaa ilii ⁄utlakaydee hhapee sanguu hadisi ha Taataa Iliitleemu.” Teesaaqay, kabiraa da Simi⁄ooni gi ⁄imbidi mangi ilagaasidi haa kabiraa da Yuuda.
4 Qatlay kabiraa da Yuuda haa kabiraa da Simi⁄ooni giyaa iliitlairi Wakanaani haa Wapereesi, Taataa Iliitleemu gigii lu⁄i dabaiĩ koinay. Inay gi cu⁄iri hida elefu mibi taysi yaamu gu Beseekige. 5 Teꞌesii, qwatlakeesii ginaa ilii slayri Adooni-Beseeki giyaadimiisay gu yaamu, inay gi qwaatliri haa ina, haa gi kaba⁄iri Wakanaani haa Wapereesi. 6 Adooni-Beseeki gi lakidi, kabiraa da Yuuda haa kabiraa da Simi⁄ooni gugi siragusiniri, gugi ooyiri, haa gugi afakereꞌemisiri dugunimaiĩ gu dabaiĩ kosi haa yeꞌeeroo kosi.
7 Da hheꞌesi, Adooni-Beseeki gi kaay tuba, “Watemi mibeeri fanqu, daa afakereꞌemisi dugunimaiĩ gu dabaiĩ haa yeꞌeeroo, yaa hufiti ⁄agoo daa meti hari biraa gu meesaa dooi. Inkoo, Iliitleemu hininti bui, idoo gaa ilii yondiidi gooay.” Adooni-Beseeki gugi tooinaa leehhisiri yaamu gu Yerusaleemuge, gi tosaa gwaai taysi.
8 Slime, sirikaarii da Yuuda yaa iliitlairi Yerusaleemu haa gigii ⁄utliri. Inay gi cu⁄iri hida goõ hari pangaaee, haa yaamu hhakee gigi da⁄iri hari aslaa.
9 Qariqaaqari, kabiraa da Yuuda, gi qwatla kayri haa Wakanaani gwaa ibimaamidee hhapee da Negeebuge daa kooma omeeri, hhapee da Sefeela haa hhapee daa iladifaa gu omeeri guri bara da ilacindoo gu biraa waara. 10 Slime, kabiraa da Yuuda yaa iliitlairi Wakanaani, gwaa ibimaamidee yaamu gu Heburoonige, hhaã wakaꞌalee daa eteediidine na Kiriyaati-Ariiba, haa gi kaba⁄iri kabiraa da Sesaay, Ahimaani haa Talimaay.
11 Da hheꞌesi, teꞌesaa yaamu gu Heburoonigo, kabiraa da Yuuda gi gau kayri haa hida gwaa ibimaamidee yaamu gu Debiirige, hhaã wakaꞌalee daa eteediidine na Kiriyaati-Sefeeri. 12 Inkoo, teꞌesii yaa wana heedi waku daa eteediidine na Kaleebu. Ina gi kaay tuba, “Heedi gu qwaatla haa gi hii⁄utli yaamu gu Kiriyaati-Sefeeri, sugu hadisa hotoy Akisa, ma hadee dosi tleehhiti.” 13 Inkoo, Otiniyeeli nanku Kenaasi, nankooina gu coko⁄u gu Kaleebu, gii ⁄utli yaamu hhakee. Teesaaqay, Kaleebu gi hadisi sagameeriya dosi Akisa, dagama khabimi ha Otiniyeeli.
14 Letu waka, Akisa dagaa iliikhabimi ha Otiniyeeli, gi tlaatlaqasidi Otiniyeeli, ma firimi qaymoo daqa taataa gosii, Kaleebu. Qatlay giyaa ilii⁄eti danda gu daqway gosaa, Kaleebu gi maasi Akisa tuba, “Mala slaꞌada, ma sigi hadisi?”
15 Akisa gi ilaki⁄isidi tuba, “Sini qayde sawaadi! Haã firimi, sini qayde hhaahhiyoo gu maꞌay, sa gimba siniĩ qaydi qaymoo yade hhapee da Negeebuge ti kaaruu hari khisla.” Da hheꞌesi, Kaleebu gi hadisi sa sagameeriya dosi Akisa, hhaahhiyoo guraa bara dari rawaa haa bara dari biraa waaree.
16 Qatlay kabiraa da Yuuda giyaa iliiwaauti yaamu gu Yeerikogo, laqwaloo da Mukeeni, kumbaꞌa gu Musaa hingaa sirakomamidiri haa inay. Teꞌesaa yaamu gu Mitendego yaꞌaani yaamu gu Yeerikogo, gi ibinaa kayri tla⁄aã gu hida gwaa kongoqomee da Yuudage waaree taysi Negeebuge ilaciyaa haa yaamu gu Araadi.
17 Kabiraa da Yuuda hingaa ilagaasidi haa hhiee koina, kabiraa da Simi⁄ooni, gi iliitlairi Wakanaani gwaa ibimaamidee yaamu gu Sefaatige. Kabiratee da cada gi hhamisidi sumuku idadu sliimaa yaamu hhakeesii. Da hheꞌesi, inay gii fookiri uma gu yaamu hhakee na Horimaa. 18 Kabiraa da Yuuda, slime gii ⁄utliri yaamu gu Gaasa haa tongagu kosi, yaamu gu Asikelooni haa tongagu kosi, haa yaamu gu Ekirooni haa tongagu kosi.
Waisraeeli harislanqada hiigaasa kaba⁄amuu gu Wakanaani
19 Taataa Iliitleemu yaa sliimaa wana haa kabiraa da Yuuda, inay gii ⁄utliri hhapee da kooma omeeri. Teesaaqay see, inay yaa hiidahhasiriiba kaba⁄a yaamulooee da hhapee daa kooma raqamaauu, sa gimba gaararuu gu sikhima ginaa konay. 20 Musaa gooay idoo giyaa iliifadidi, Kaleebu sugugi hadisi yaamu gu Heburooni. Teꞌesaa, Kaleebu gi gusimi yaꞌay tami gu Anaaki.
21 Teesaaqay see, kabiraa da Benyamiini hiraa slanqadiri gusiru Wayebuusi, gwaa ibimaamidee yaamu gu Yerusaleemuge. Haã na idoo Wayebuusi siginoó ibiidiyay sliimaa haa kabiraa da Benyamiini, yaamu gu Yerusaleemuge letuti naqatloo.
22 Inkoo, laqwaloo da Yoseefu, Efurayiimu haa Manaase gi iliitlaꞌadi hida gu yaamu gu Beteeli, Taataa Iliitleemu gigi iliiay inay. 23 Inay yaa ya⁄abiri cangicangimisee, ma cangicangimisu kayri yaamu gu Beteeli (yaamu daa eteediidine wakaꞌalee na Luusu). 24 Cangicangimisetee yaa aniri heedi leẽ yaa booma dahhi, gugi maasiri tuba, “Sandi laqante amoo darii guuma boomage, dandiray sugu yondiidani hhoinay ugu.” 25 Teesaaqay, ina sigigi laqami amotee. Inay gii guniri boomage haa gi cu⁄iri hida goõ hari pangaaee yaamu hhakeesii. Teꞌesii heedikee kilesi ginaati mayri gaasa haa hida goõ gu mara gosi. 26 Teꞌesaa, heedikee gi looy hhapee da Wahiitige, taysi gi tleehhi yaamu haa girigi ayi uma na Luusu, letuti naqatloo, nama uma gosi.
27 Inkoo, kabiraa da Manaase yaa gusiniriiba hida gwaa ibimaamidee yaamu gu Beeti-Seyaanige, Taanakige, Nafooti-Doori, Ibileyaamu, haa Megiido sliimaa haa tongagu gu yaamu hhakee goõ. Teesaaqay see, Wakanaani yaa ⁄imbiriiba mawaraa hhapetee. 28 Waisraeeli giyaa iliislayri ⁄uuru, gi ⁄uureemisiri Wakanaani, ma yondiidiri sa inay tongee dooina pahha. Teesaaqay see, etaa Waisraeeli yaa gusiniriiba Wakanaani, ma hiica⁄iri sumuku hhapee dooinaa.
29 Slime, kabiraa da Efurayiimu yaa gusiniriiba coko⁄o see Wakanaani gwaa ibimaamidee Geseerige. Wakanaani gi ilakoniri ibinaa sliimaa haa inay.
30 Nama teesaaqay, kabiraa da Sabulooni yaa gusiniriiba Wakanaani gwaa ibimaamidee taysi yaamu gu Kitiroonige haa Nahaloolige. Inay yaati ilakoniri ibinaa haa inay, gigi ⁄uureemisiri inay, ma yondiidiri tongee dooina pahha.
31 Kabiraa da Aseeri yaa gusiniriiba yaamulooee daa ibimaamida yaamu gu Aakoge, Sidoonige, Alaabuge, Akisiibuge, Helibaage, Afeekige haa Rehoobuge. 32 Kabiraa da Aseeri yaa sliimaa ibimaamidiyay haa Wakanaani, hhaã naa yaamulooee da hhapetee, inay giyaa gusiniriiba Wakanaani.
33 Kabiraa da Nafutaali yaa gusiniriiba yaamulooee da yaamu gu Beeti-Semeesi ma yaamulooee gu yaamu gu Beeti-Anaati, yaa sliimaa ibiidiri haa inay. Teesaaqay see, kabiraa da Nafutaali gi ibiidiri tla⁄aã gu Wakanaanige, yaamulooee da hhapetee. Kabiraa da Nafutaali gi ⁄uureemisiri Wakanaani, ma yondiidiri hari amoo da ⁄uureesa sa inay.
34 Waamoori gi gusiniri hari ⁄uuru kabiraa da Daani, ma ibinaa kayri omeerige. Inay yaa ⁄imbiriiba kabiratee maa hii⁄eti, gi ibita daqeemoo gu koomee raqamaauu. 35 Slime, Waamoori gi ilakoniri ibinaa oõ gu Hereesige, yaamu gu Ayiyaloonige haa yaamu gu Saalibimuuge. Gimati teesaaqay see, digigi iliiloay ha daba gu hida gu mara gu Yoseefu. Teꞌesii, Waamoori digigi tawaalimi ha kabiraa da Manaase haa kabiraa da Efurayiimu, haa gigi ⁄uureesiri ma yondiidiri sa inay tongee pahha. 36 Digimaa gu Waamoori yaa hari hiicataraa da Akirabiimu tlaatleesi, gi ilakoomi yade naqatloo yaamu gu Seelage haa gi ilakhiinaaꞌadi rawaa gu oõ khuꞌusa.