Malayika gu Taataa Iliitleemu Bokiimuge
2
1 Malayika gu Taataa Iliitleemu yaa waaudi Giligaaligo gi daqa waka khuꞌusi daa eteediidine na Bokiimu. Teꞌesii gi kaay sa Waisraeeli tuba, “Ana hangwaa hiica⁄asi hhapee da Misirigo, haa hanguraagi khay hhapee gaa hiifadidi hari seeliru sa ayiĩ kokuna. Ana gi kaay ambee, ‘Etaa, Ila⁄imbidu goy himaa qatliyaaba haa unkuray. 2 Unkuray hhanti qaasiday ila⁄imbidu haa yaamulooee da hhapeti, muumu⁄uma masabaahu koina.’ Inkoo, unkuray hanaa akhasidiriiba ana. Haa soꞌoy teesaaqay laqadiri? 3 Inkoo, sangu kaawa ambee, hagi gusimaaba inay gii ca⁄iyay tla⁄aã googunaa. Inay hiti leqeewaa tleehhidiyay daqa doogunay, haa iliitleemamee koina hiti hatliroo tleehhidiyay daqa doogunay.”4 Qatlay Malayika gu Taataa Iliitleemu giyaa iliihheꞌesi kaawa gimbakee sa Waisraeeli goõ, hida gi ⁄aa⁄iri hari afoo da didiri. 5 Daqatee girigi ayri uma na Bokiimu.a Teꞌesii gi hadimisiri sadaaka sa Taataa Iliitleemu.
Gwaaꞌaraa da Yosuuwa
6 Qatlay giyaa iliikahhiye gwaaꞌa, Yosuuwa yaa aareesi Waisraeeli, kila kabiraa gi waauti, daqa dosii loi sagaa iliiqay, ma aaliniri hhapee dooina. 7 Waisraeeli yaati yondiidiri sa Taataa Iliitleemu balalu sliimaa gu ibidinaa da Yosuuwa, haa ibidinaa da gaduũ gwaa koomee koraraa wa⁄a ba⁄ay da Yosuuwa, hhaã gwaa arimee gimba gu bakaꞌasa, daa yondiidi ha Taataa Iliitleemu sa Waisraeeli.
8 Yosuuwa nanku Nuuni, yondimiisay gu Taataa Iliitleemu, yaati gwaai kona koraraa mibeeri mibi haa mibi. 9 Inay gugi qaasiri hhapee giyaa aalimige gi tosi tleehhiti taysi Timunati-Hereesige, hhapee da koomage omeeri da Efurayiimu, hari bara da goraa gu oõ gu Gaasi.
10 Qariqaaqari, laqwaloo dosi goõ giyaa iliikaka⁄adi, daagii ca⁄i laqwaloo waka daa hhidima Taataa Iliitleemu ma yondu giyaa yondiidi see sa Waisraeeli.
Waisraeeli siaraa da Taataa Iliitleemu
11 Inkoo, Waisraeeli gi yondiidiri tlakwaroo pandaa da Taataa Iliitleemuge haa gi yondiidiri sa iliitleemamee Mabaali. 12 Inay gi mayri firiiriru Taataa Iliitleemu, Iliitleemu gu ayiĩ koina, hiĩ gwaa hiica⁄asu inay hhapee da Misirigo. Inay gi tlaatleesiri sirakomamidu haa firiiriru iliitleemamee waka, daa firiirine ha hida gwaa ibimaamidee ilaciyaa haa hhapapu gwaa niini⁄idee inay. Inay gi keebeeꞌemidiri haa gii gupu⁄umisiri sagaiĩ koina sa Iliitleemametee, gi slahhaaꞌasiri hari khisla Taataa Iliitleemu. 13 Inay Taataa Iliitleemu gugi mayri, gi yondiidiri sa iliitleemamee Mabaali haa iliitleemitoꞌoo Maasihirooti. 14 Teesaaqay, Taataa Iliitleemu gi qupidi hari khisla sa Waisraeeli, ina gigii lu⁄i dabaiĩ gu afii⁄utlidiisee da khooslay gooina. Slime, ina gigi taatahhi inay dabaiĩ gu fa⁄ayaa dooinay, daa niini⁄iti inay. Teesaaqay, inay yaa hiidahhasiriiba kara kanisaraa fa⁄ayaa dooina. 15 Daqeemoo goõ Waisraeeli giyaa ilii qwatla kayri, daba gu Taataa Iliitleemu yaa sliimaa wanaaba haa inay, ina yaati ⁄isimi digima kaba⁄i, idoo giyaa ilii seelimi gooay sa inay. Inay gii guniri maana da didirige.
16 Da hheꞌesi, Taataa Iliitleemu gii tlaysi ilabuꞌumiisee, gwaa ilabuꞌumee inay dabaiĩ gu hida hhakeesaa, gwaa hii⁄utlee inay haa khooslay gooina. 17 Teesaaqay see, Waisraeeli yaa itatiisiriiba gimba gu ilabuꞌumiisee dooina. Inay yaati yondiidiri slipalauuma, hari amoo da sirakomamidu iliitleemamee waka haa gigi firiiriniri inay. Inay yaati cira hiifookidiri gi mayri amamu daa sirakomaamidiye ayiĩ koina, yaꞌaani amamu gu akhamisu ilakaawa da Taataa Iliitleemu. 18 Qatlay sliimaa Taataa Iliitleemu giyaa iliitlaysi ilabuꞌumiisay sa inay, ina yaa sliimaa wana haa ilabuꞌumiisaykee. Qatlay sliimaa gu ibinaa da ilabuꞌumiisaykee, ina gi ilabuꞌumi Waisraeeli dabaiĩ gu fa⁄ayaa dooinaa. Taataa Iliitleemu yaa ⁄awaarimi sa inay, sa gimba yaa akhasi ⁄aa⁄imu gooina sa hida hhakira gwaa labaꞌasee inay haa gwaa qawee maana sa inay. 19 Qatlay sliimaa daa ilii gwaai ilabuꞌumiisay, hida yaatii ki⁄iri amamu koinay gu wakaꞌalee gu tlakwige, ba⁄ay da ayiĩ koina see. Inay gi tlaatleesiri kara sirakomamidu iliitleemamee wakinay gi yondiidiri haa gi keebeeꞌemidiri sa firiiriru inay. Slime inay gi siꞌiri mawaraa yondu gooina gu tlaku ma amamu koina see gu atana.
20 Inkoo, Taataa Iliitleemu gi qupidi sa Waisraeeli hari khisla, gi kaay tuba, “Sa gimba hida gu hhapeti hiĩ mayri ila⁄imbidu gaa qaasi haa ayiĩ koina haa hinaa akhasiriiba ana, 21 ana see gusimaaba hida gu hhapee lensee, haã daa may ha Yosuuwa giyaa ilii gwaai. 22 Ana yondiida sa hhapapu hhakee, ma ilatahhi Waisraeeli, haa ma arimi, bere ooyay amoo dooi, haa inay gi ibiidiyay amoteesii ayiĩ koina gooay giyaa ilii laqiri.” 23 Taataa Iliitleemu gigi may hida gu hhapapu hhakee, gusiru see giyaa cira gusimiiba, ma hiilu⁄a see giyaa hiilu⁄iiba dabaiĩ gu Yosuuwage.