Hhapapu gwaa meetee
3
1 Taataa Iliitleemu yaa meesi khoorooge hida gu hhapapu hhanki, ma ilatahhi Waisraeeli goõ, hhaã gwaaba qwatla gau lensee hhapee da Kanaanige. 2 Ina yaati teesaaqay laqi, ma caacaahhamisi laqwaloo da Waisraeeli, caahhamuu gu qwatla gau, hhakaꞌa loi gwaa hhidimee gau wakaꞌalee. 3 Haã na faadoo da kabiraa, Taataa Iliitleemu giyaa meesi Kanaanige, Watemi kooani gu Wafiliisiti, Wakanaani goõ, Wasidooni haa Wahiifi gwaa ibimaamidee omeeri gu Lebanoonige, tlaatleesi yadaa oõ gu Baali-herimoonigo Leebo-Hamaati naqatloo. 4 Taataa Iliitleemu giyaati may hida gu hhapapu hhakee, ma koimisi Waisraeeli, magi arimi, bere akhamisiyay ilakaawa dosi, giyaa hadisi sa ayiĩ koina hari amoo da Musaa. 5 Inkoo, Waisraeeli gi ibiidiri tla⁄aã gu Wakanaanige, Wahiitige, Waamoorige, Wapereesige, Wahiifige haa Wayebuusige. 6 Waisraeeli gi khabiibiniri sagameeru gooina, inay see gi ⁄imbiri sagameeru gooina duguma khabiibimi ha qaraiya da hida gu hhapapu hhakee, haa gi yondiidiri sa iliitleemamee koina.Otiniyeeli
7 Waisraeeli gi yondiidiri tlakwaroo pandaa da Taataa Iliitleemuge, digigi afahhami Taataa Iliitleemu, Iliitleemu gooina, inay gi yondiidiri sa iliitleemamee gu hhawatee Mabaali haa iliitleemamee gu tigay Maaseera. 8 Inkoo, Taataa Iliitleemu gi qupidi hari khisla sa Waisraeeli, ina gigii lu⁄i dabaiĩ gu Kusihaani-Risihatihayiimuge, mutemi gu Araamu-Naharayiimu.a Inay sugugi yondiidiri koraraa cigahha. 9 Waisraeeli gi ilii⁄aa⁄iri Taataa Iliitleemu magi iliiay, ina sigigi hadisi ilabuꞌumiisay, Otiniyeeli nanku Kenaasi, hhia gu coko⁄o gu Kaleebu, naa ilabuꞌumi inay. 10 Muuna gu Taataa Iliitleemu yaagi iliikhay Otiniyeeli, ina gi ilabuꞌumiisay gu Waisraeeli tleehhidi. Otiniyeeli gi gau kay, Taataa Iliitleemu gii lu⁄i Kusihaani-risihatihayiimu mutemi gu Mesopotaamiya dabaiĩ gu Otiniyeelige. 11 Teesaaqay, qatlay gu koraraa mibeeri cigahha, hhapetee gi ibiti hari qasaw. Da hheꞌesi, Otiniyeeli nanku Kenaasi, gi hhami.
Ehuudi
12 Kara, Waisraeeli gi yondiidiri tlakwaroo pandaa da Taataa Iliitleemuge. Taataa Iliitleemu gi qay ⁄uuru sa mutemi Egilooni gu hhapee da Moaabu, ma iliitlai Waisraeeli, sa gimba gu tlakwarotee toina giyaa yondiidiri. 13 Egilooni gi ilagaasi daqa lenge Waamooni haa Waꞌamaleeki, gi qwatla kay gau haa Waisraeeli, haa gigi kaba⁄i. Ina gii ⁄utli yaamu gu Mitende, doó eteedine Yeeriko. 14 Waisraeeli sugugi yondiidiri Egilooni, mutemi gu hhapee da Moaabu, koraraa mibi haa cigahha.
15 Kara, Waisraeeli gi ilii ⁄aa⁄iri Taataa Iliitleemu, ina sigigi qay ilabuꞌumiisay. Uma gu ilabuꞌumiisaykee naa Ehuudi nanku Geera, heedi gu daba gu basa gu kabiraa da Benyamiini. Waisraeeli gugi ya⁄abiri, ma leehhisi sawaadii dooina daqa mutemi Egilooni gu Moaabu. 16 Inkoo, Ehuudi gi sapi pangaa gu kooma afaiĩ cada. Tledaruũ gu pangakee yaati fuuti leẽ haa nusuu. Pangakee gugii lu⁄i looboo dosii hari waꞌay gu qayroo kosi, tlaana dosii da ⁄uyage. 17 Da hheꞌesi, Ehuudi gi leehhisi sawaaditira sa mutemi Egilooni gu Moaabu. Mutemiki gwaa ⁄atlaru hari khisla. 18 Qariqaaqari, Ehuudi giyaa ilii taatahhi sawaaditee, gi kaay sa hida hhakira gwaa geregedee sawaaditee, ma waaudiri. 19 Ina loi giyaa iliiday daqa sanaamamuu gu tle⁄eẽge, daa googokhomi ilaciyaa haa Giligaali, gi iliiki⁄i mutemi Egilooni, gi kaay sa ina tuba, “Ye Mutemi, kooma ya⁄aboo da hhaaboo sa ugu.”
Mutemikee gi ilafahhi yondimiisee dosi, ma qabidi diĩ! Yondimiisetee gii ca⁄adi khoorooge.
20 Ehuudi gwaa iliisati ina, daqa giyaa ilii ibiidi ina lenkosi balasaa da waauu gosii gu kooma caaqwa gwaa gorofaage waara. Teꞌesii, ina gi kaay tuba, “Kooma ya⁄aboo doogu daqa Iliitleemugo.” Mutemi Egilooni giyaa iliitlay kitiĩ gosaa, 21 Ehuudi gi slootisi pangaa gosi hari daba gosi gu basa, tlaana dosaa da ⁄uya, gugi tosaa muti guraꞌa gosii. 22 Pangakee gii guumi waꞌay gu guraꞌage sliimaa haa hopinaa gosi, yaati amoolaa hiica⁄i hari danda gosi. Ehuudi giyaa hiiduukhiiba pangakee, du⁄iya hingigi ilaoodi pangakeesii. 23 Da hheꞌesi, Ehuudi gii ca⁄i khoorooge balasaage, gi khiidimi afamaraaee gu waaukee gu rawaa hari fungoo.
24 Ehuudi giyaa ilii waaudi, yondimiisee da mutemi yaagi khaydi, haa gi aniri afamaraaee goõ gu waauu gu rawaa, digiĩ khiidiidimi hari fungoo. Inay gi ilahudeesiri tuba, “Angamalee hinti amootlahhay kay sagayge.” 25 Inay yaa baqamidiri teꞌesii, yaati amoolaa tlaꞌamuudiri. Inay giyaa iliianiri hiĩ afiiooymiiba afamaraaee, gii oyri fungoo, ma afiiooyniri afamaraaee. Yuꞌudiyaa, qatlay giyaa ilii afiiooyniri afamaraa, inay gi aniri looimoo gooina hhapeege wana, hiĩ gwaai.
26 Inay giyaa ilii baqaaqamidiyee, Ehuudi gi tosaa lakidi, gii cati hari daqa daa iliiwane sanaamamuu hhakira gu tle⁄eẽ haa gi lakidi Seyiirage. 27 Ehuudi giyaa iliiday Seyiirage, gii fahhi paranda hhapee da kooma omeeri da Efurayiimu. Waisraeeli yaagii ⁄eetiri sliimaa haa ina yedaa rawaa gu omeerigo, ina gi giyaadi sa inay.
28 Ina gi kaay sa Waisraeeli tuba, “Nasirakontee, sa gimba Taataa Iliitleemu hingii lu⁄i fa⁄ayaa dooguna Wamoaabu dabaiĩ kokunay.” Inkoo, inay gugi sirakoniri tlo⁄osaa gu duudu gu Yoridaani naqatloo, haa gii ⁄utliri daqatee dabaiĩ gu Moaabugo, haa gi tlaatlahhasiri heedi lensee hhanti tlo⁄osi. 29 Letutee, gi cu⁄iri Wamoaabu elefu mibi taqaaqay, hida gu koomee slaqoo gu hhoi haa gu koomee ⁄uuru, hhaku heedi lensee gwaa ba⁄amu. 30 Letutee, Waisraeeli gi kaba⁄iri Wamoaabu. Qatlay gu koraraa mibeeri dagati, hhapetee gi ibiti hari qasaw.
Samugaari
31 Qariqaaqari Ehuudi nanku Anaati, Samugaari gii oy daqa dosi. Ina gi cu⁄i Wafiliisiti miyaa lahhoꞌo hari hhadaa da deꞌeẽ yakway. Slime, ina see gi ilabuꞌumi Waisraeeli.