Ruuti
Gimba guri giyaada
Heedi gwaa handikimu
Maarimamaa wa⁄a hhidinay heedi gwaa handikimu kitaabukii gu Ruuti. Yahuudi hari amoo da qocay gooina yaati kaari tuba, angamalee Samweeli naa handikimi, hiĩ gwaa gwaau qatlay Dawdi giyaa ilii kahhiye mutemi tleehhida (yuꞌudii kitaabuu gu 1 Samweeli 28:3). Kara mutemi Dawdi dugwaa khui hari khisla. Yuꞌudii kitaabukii 4:17, 22.
Kori dugwaa ilii handikimi
Maarimamaa wa⁄a yaati kaadi tuba, angamalee kitaabuki tla⁄antla⁄a gu kori gu 1011 - 931 handikimi, daa ilii kahhiye laqwaloo Kristu. Dugwaa qatlay gu tawaaloo gu Ilabuꞌumiisee handikimi. Hhapee da Israeeli giyaa ilii kahhade slawaraa mutemi.
Daqa dugwaa ilii handikimi
Kitaabuki dugwaa hhapee da Israeelige handikimi.
Ilahudaa gu didiri
Kitaabukii gu kooma uma gu hadee na Ruuti, Moaabitoꞌoo, gimba gu catimisu dugunaa handikimi. Catimisuki ti tla⁄aã gu hadee haa kumbaee kosi, idoo giyaa ilii ibidiri hhoinay haa hari slaꞌamuu. Sinditi slai laqaruu ibinaa da kooma slaꞌamuu, da kooma gwaa⁄amee da Iliitleemu haa slaꞌamuu hari muunaiĩ koti goõ, hida gu ilaciyaa kotii ibiidee.
Qatlay hhawata gu Ruuti giyaa ilii hhami, ina gi laqanti hhoinay gu didiru daqa kumboꞌoo dosi Naoomi da kabiraa da Israeeli. Kara, ina yaa konta slaꞌamuu hari khisla daqa Iliitleemu gu Israeelige. Hiifaakooge dagaga aalimi sliimaa haa khooslay gosi ha hhawata waku tla⁄aã da hiidayuuma da hhawata gosii gu pandaa, gwaa hhamu. Hari amoo da khaboo dosi gi amaamaa da didiri tleehhiti da Dawdi, mutemi gu didiru gu Israeeli. Ruuti gi laqaaqanti hhoinay gu didiru, gwaa khaw daqa hida gwaa ibimaamidee dahaa pahha, gwaay fookidee daqa Iliitleemu gu Israeelige. Teesaaqay, hida gu hhapapu wakinay gi hida kosi tleehhidiri gu koomee iliipaꞌaruu.
Aaliruki ti hiĩ koori pahha gu qocay gu Burungee, baloo da kwasluuma, idoo gaduũ giyoó ilii maasiyee tigay tuba, miyaa nayii oy ye⁄eeto haa ga⁄aree da mariki.
Kitaabukii slime sanditi slai laqaruu, idoo kwaeeli gu hhapee da Israeeli giyaa ilii slaarahhuuhhumisiye qaymamu gu hindaqeerige (\xt Yuꞌudii kitaabuu gu Gimba gu Walaawi 19:9-10; 23:22).
Slime kitaabuki sanditi slai laqaruu tuba, Iliitleemu yoóti ⁄aafi kilesiiba hida gu Israeeli, yoó ⁄aafi hida sliimaa gu hhapapu goõ. Kara ina ti Iliitleemu gu Israeeli kilesiiba, ti Iliitleemu gu hida gu hhapapu goõ.