Ruuti
Elimeleeki haa Naoomi lakidimoo gooina Moaabuge
1
1 Qatlay ilabuꞌumiisee giyaa ilii tawaaliilinee hhapee da Israeelige, kori waku qori gu didiru yaay ca⁄i hhapeteesii. Inkoo, heedi waku yaa wana gu tongoo da Beteleheemu, hhapeteesii da Yuudage. Heedikee haa hadee dosi, haa yaꞌay kosi cada gu hhawatee, yaa lakidiri sa qori, gi ibinaa kayri hhapee da Moaabuge. 2 Heedikee uma gosi naa Elimeleeki, uma gu hadee dosi naa Naoomi, yaꞌay kosi umaiĩ koina niĩ Makhalooni haa Kiliyooni. Hida hhanki yaa tongee Efurayiimu yade Beteleheemuge, hhapee da Yuudage. Teꞌesaa gi waaudiri, gi ibinaa kayri yade hhapee da Moaabuge.3 Qariqaaqari, Elimeleeki hhawata gu Naoomi gi hhami yade Moaabuge. Naoomi dagaati may mogombitoꞌoo, ina haa yaꞌay hhakee kosi gu cada. 4 Qaraiyatee tosi ginaa ilii khabiibinti yade sagameeru gu Moaabu. Waku gi khabimi sagameeriya, uma gosi na ⁄oripaa, kara gu caduu gi khabimi sagameeriya, uma gosi na Ruuti. Gonkoinaa yaa ibiidiri yade koraraa mibi. 5 Kara, Makhalooni haa Kiliyooni gi kaka⁄iri. Gimbaki giyaa ilii ca⁄i, Naoomi yaati meti mogombitoꞌoo ina lenkosi kilesi.
Naoomi haa Ruuti ki⁄eemoo gooina Beteleheemuge
6 Qariqaaqari, hhapetiraa da Moaabugo, Naoomi ginaa ilii akhasidi tuba, yade hhapee da Yuudage, Taataa Iliitleemu hiĩ ⁄aafi hida kosi hari baruũ qaymamu koinay. Teꞌesii, Naoomi haa kumbaee kosi, gi tlaatleesiri ilakhuukhuꞌumisuu gu ki⁄eemoo hhapee dosii. 7 Da hheꞌesi, ina haa kumbaee hhakee kosi gu cada, ginaa ilii waaudiri teꞌesaa, hhapeteesaa giyaa ilii ibimaamidiyeei. Yaati tafaꞌasiri amoo daa fucuqusidi yade hhapee da Yuudage.
8 Qatlay giyaa ilii amooge wanee, Naoomi gi kaadi sa kumbaee hhakee kosi tuba, “Taa⁄amida ki⁄a yade yaamu kokunay sa hida kokunay. Taataa Iliitleemu sangu qaye hhoinay gu didiru, idoo gaa ilii laqantiri gooay hhoinay sa hhawatee kokuna haa sa ana see. 9 Kara ina, Taataa Iliitleemu dangu iliiaye, ma dangu khabiibimi kara, na ibinaa kaydiri hari qasaw.” Teꞌesii ina gi humbaꞌamiti kumbaee hhakee kosi, gonkoinaa na paã ⁄aa⁄imu sa gimbakee. 10 Kara kumbaee hhakee kosi gi kaayri tuba, “Suti! Dandiray ki⁄anaaba yade yaamkotii, sliimaa hada kayna haa igi daqa hida kokii.”
11 Naoomi ginaa ilii kaadi sa kumbaee hhakee kosi tuba, “Yaꞌay koi, taa⁄amida ki⁄a yaamu kokunay. Inkoo na soꞌoy slaꞌaday sirakooma ana? Ga ilatahhadeei ana caba ti gaduwaa? Kara slawaaba yaꞌay gu hhawatee, danguma khabiibimi unkuray! 12 Yaꞌay koi, taa⁄amida ki⁄a! Yuꞌudaa, ana ti gaduwaa haay loay, kara dini khabiyaaba. Gamati iliipaꞌami see, ambee, slaw hhawata sa slawaraa da yaꞌay gu hhawatee letuti, 13 gu louu hagi baqamitay? Kara ha ibitaaii danguba khabiibiru, hangi ga⁄aydaaii diireemoo dooina naqatloo? Teesaaqay gooba yaꞌay koi! Ilatahha bere, ana see hati kooma slahhaaꞌamee hari khisla, toogunaa see ba⁄ada. Yuꞌudaa, hhadaa da Taataa Iliitleemu, idoo dinaa ilii maahhasi ana.”
14 Gonkoinaa gi tlaatleesiri kara na paã ⁄aa⁄imu. Teꞌesii ⁄oripaa gi humbaꞌati kumboꞌoo dosi, gigi tosaa aareesidi. Danaoo dosi Ruuti ginaa ilii ⁄uuruti, ma meti haa kumboꞌoo dosi. 15 Kara Naoomi gi kaadi sa kumboꞌoo dosi Ruuti tuba, “Yuꞌudiyaa, hhiyoo doogi hiĩ ki⁄idi yaamu koinay, daqa hida kosii haa daqa iliitleemamee kosii. Taa⁄a igi see sirakoomaka.”
16 Ruuti ginaa ilii ilaki⁄isidi sa kumboꞌoo dosi tuba, “Hani hhanti tlaatlaqasida, ana nangi deehhiihhini haa igi. Daqatee ga kayde, ana see gani ilii ibinaa kaw, hida koki see hiti hida koi tleehhidiyay, kara Iliitleemu googi see hiti Iliitleemu goy tleehhida kay. 17 Daqa gamaa ilii gwaꞌate, ana see hamaa teꞌesii gwaaꞌa, kara dinimaa teꞌesii qaasi. Taataa Iliitleemu hinimaa ⁄agitine hari khisla, bere ana hangimaa deehhiihhina haa igi. Gwaaꞌaraa kilesi namaa dandi hiideehheda!” 18 Naoomi giyaa ilii anti teesaaqay, kumboꞌoo dosi hiĩ kana⁄adi sa waaudimoo haa ina, gi tosaa maydi tlaatlahhamisu ina.
19 Da hheꞌesi cada koinaa, Naoomi haa kumboꞌoo dosi, gi waaudiri, ginaa ilii dayri Beteleheemuge. Qatlay giyaa ilii dayri tongoteesii, hida goõ yaati bakairi sa inay. Tigay goõ gu teꞌesa hingaa tlaatleesiri maamisu inay haa inay tuba, “Gu louu hanti Naoomi?”
20 Teꞌesii, Naoomi gi ilaki⁄isidi hida hhakee tuba, “Hani hhanti eteedintay kara ana na Naoomi.a Inkoo ana na Maaraab eteedintee, sa gimba Taataa Iliitleemu gu kooma ⁄uuru goõ, siniraa khay qada wa⁄a ibinaa dooii. 21 Inkoo ana na soꞌoy eteedintay Naoomi, kara ana naa labaꞌasi ha Taataa Iliitleemu. Ina gu kooma ⁄uuru goõ hinaa tongagaisi ana hari khisla. Qatlay ana gaa ilii waaudi tiaa, mara goy gwaa hhou! Inkoo yuꞌudaa! Taataa Iliitleemu nanti ki⁄isi hari ihiĩꞌi, mara goy yaani qeemidi.”
22 Naoomi yaa teesaaqay ki⁄idi yadaa, hhapee da Moaabugo, haa Ruuti kumboꞌoo dosi, Moaabitoꞌoo. Qatlay giyaa ilii dayri Beteleheemuge, yaa slehheẽ gu tlaatleesoo gu buꞌuuꞌuru gu baruũ waku, gu wee⁄oo slaqamisa.