Yoona
Gimba guri giyaada
Heedi gwaa handikimu
Maarimamaa wa⁄a yaati kaadi tuba, kitaabuki ha Yoona loi nugwaa handikimi.
Kori dugwaa ilii handikimi
Maarimamaa wa⁄a yaati kaadi tuba, angamalee kitaabuki dugwaa qatlay gu tawaaloo da mutemi gu didiru Yeroboaamu gu cada handikimi. Ina naa mutemi gu didiru gu hhapee da Israeeli kori gu 793 - 753, daa ilii kahhiye laqwaloo Kristu. Qatlaykii Yoona yaa Yoopage ibimaamidi, teꞌesii hhapee da Israeelige.
Daqa dugwaa ilii handikimi
Kitaabuki dugwaa hhapee da Israeelige handikimi.
Ilahudaa gu didiri
Kitaabuu gu Yoona dugwaati handikimi sa ilakeesaraa, idoo Iliitleemu giyaa ilii ya⁄abi Yoona, ma hada kay yaamu gu Ninaawige sa kakaaru gu Gimba gosi gu slaꞌamuu gu didiru. Ninaawi ti hhapee da Asiiriyage waaree, inkotii doó eteedine na hhapee da Iraaki. Kara hida hhanki Waasiriiya yaati fa⁄ayaa daa tlaꞌamuudi hari khisla ha Israeeli.
Sa gimbakee Yoona saganaa hii⁄ipi ya⁄aboo da Iliitleemu haa gi tlaatleesi quru⁄umoo. Teesaaqay see, yaa hiidahhasiiba hii⁄ipa Iliitleemu. Kara sanditi laqaaqana, idoo ina loi Iliitleemu giyoó ilii giyaadisiye yondimiisee dosi, inay gimati slaiyaaiiba see.
Kitaabuki slime sandintii tlaaꞌasi tuba, gimati Yoona see tletimiisay gu Iliitleemu hiidahhasidaaba qaasaraa digimaa gu slaꞌamuu gosi daqa hida gu Israeeli. Kitaabuki ti laqaaqana hhoinay gu didiru gu Iliitleemu, kara hiti laqaaqana tuba, gimba gu ilabuꞌuruu ti sa hida goõ, hida gu Eburaaniya haa hida wakinay hhaã gu Eburaaniya gooba, maꞌaana gimati dandiray see Burungee.