Boaasi aalimee dosi Ruuti
4
1 Cirakiray lenge, Boaasi gi day kaꞌafu gu Beteleheemuge, daqa daa ilii wane tlahhay, gi ibiidi teꞌesii. Yuꞌudiyaa, ina gugi arimi aalimiisaykee yaa khoci. Boaasi gugi ⁄oo⁄i tuba, “Hiiye, slakhadaayuu hari tia, ibiidi, ana kooma idara haa ugu.” Heedikee gii slakhadi, gi ibiidi.2 Boaasi ginaa ilii eteedimi gaduũ mibi gu tongotee, sigigi kaay tuba, “Ibiida tiꞌii, hani ilaꞌakhasideei gimba nahiĩ.” Inay gi ibiidiri tlahhaykeesii, ma itatiisiri gimbakee sigaani ⁄oo⁄i. 3 Boaasi gi kaay sa aalimiisaykee tuba, “Naoomitira daani ki⁄idi baala hhanki yadaa hhapetiraa da Moaabugo, slaꞌada naadiru qaymotira da hhia goori Elimeleeki. 4 Ana haani taqay ilahudeesi ambee, ba⁄ay gimbaki haguti cocoana. Inkoo, bere ugu qaymotee haga slaꞌada afiigweeda dabaiĩ gu Naoomigo, kirigaka pandaa da gaduũ hhankii gu tongotii haa hida hhanki gu tiꞌii waaree. Bere haga slaꞌadaaba afiigweeda, sini kaade ana tiꞌii letuti, ma akhasi, sa gimba lensee hhaku gu kooma ⁄uurukee, ugu kilesi na heedi gu ciyoomoo, kara ana ti aluũ kokaa waara afiigweedateesii.” Heedikee ginaa ilii kaay tuba, “Naraꞌa, ana qaymotee haga afiigweeda.”
5 Da hheꞌesi, Boaasi gi kaay sa ina tuba, “Naraꞌa, baloo goo ilii kirigide qaymotee daqa Naoomigo, caahhi, hatee noo baloo doogu da aalimee da Ruuti Moaabitoꞌoo, kwaꞌalitoꞌotee, ma slaydi naw haa ina sa Makhalooni, qaymotee ma meti dabaiĩ gu tongee Elimeleekige.” 6 Aalimiisaykee yaa ilaki⁄isi sa Boaasi tuba, “Bere teesaaqay, qaymotee ana hagay dahhasaaba afiigweeda dosi, sa gimba goo ilatahhe pandaage, gimbaki harimaa khay cokhoriima aalimee da khooslay gooi.” Asunkuilee ginaa ilii kaay tuba, “⁄uuru koy gu afiigweeda da qaymotee oyii sa ugu, ana hagay dahhasaaba afiigweeda dosi.”
7 Wakailetiray, hhapee da Israeelige, bere heedi slai hadisa ⁄uuru gosi gu afiigweeda daqa heedi wakuu, heedikee ti baci ya⁄atiya dosi, gi tosaa hadisi sa danaꞌakee kosi. Hatee naa amoo dari laqaruu ila⁄imbidu pandaa da hidage. 8 Hari amotee aalimiisaykee see ginaa ilii baci ya⁄atiya dosi, gi kaay sa Boaasi tuba, “Hay dahhasaaba, qaymotee kirigaka sa ugu.”
9 Boaasi gi kaay sa gaduũ hhakee haa hida sliimaa gwaa waaree teꞌesii tuba, “Letuti unkuray haã arintiri, ana idoo gaã ilii kirigi daqa Naoomigo khoosliki goõ gu Elimeleeki haã gu yaꞌay hhakira kosi see, Kiliyooni haa Makhalooni. 10 Kara, siniĩ hadimisi Ruuti Moaabitoꞌoo, hadetira da Makhalooni, maga aalimi, ma hadee dooi tleehhiti, ma slayni naw haa ina, uma gu Makhalooni namay hhama. Slime, khooslay gooina see goõ na meeti dabaiĩ gu nakeesii tiꞌii Beteleheemuge. Letuti, unkuray haã antiri gimbaki, idoo giĩ ilii faaki tiꞌii!”
11 Da hheꞌesi, gaduũ hhakee haa hida sliimaa gwaa kaꞌafukeesii waaree, gi kaayri tuba, “Gu lou, dandiray haã arini gimbaki, idoo giĩ ilii khoci. Hadetee toku gaã aalinti, daga iliiaye ha Taataa Iliitleemu, mangi slaaslaaqasidi haa Raheeli haa Leyaa,a gwaa laqwalee yaꞌay wa⁄a, gi hida gu Israeeli tleehhidiri. Ugu see dugu ⁄aafiye, ma hindaqaruti tiꞌii Efuraatage, uma googu may ca⁄i Beteleheemuge. 12 Qatlay sugumaa ilii qaye yaꞌay ha Taataa Iliitleemu haa hadetee, laqwaloo doogu see maay tlakhwaydi, ma hatira pahha tleehhiti da okookoo goori Pereesi, nanku Yuuda haa Tamaari.”b
Booasi khaboo dosi Ruuti
13 Asunkuilee, Boaasi gi aalimi Ruuti, gi cubuquniri, gi hadee dosi tleehhiti. Taataa Iliitleemu gi iliiay Ruuti, gii loaydi, gii daadi naw. 14 Tigay gu tongotee gi kaayri sa Naoomi tuba, “Taataa Iliitleemu dugu hhaꞌaleesiye, hiĩ gwaani hadisu letuti ilabuꞌumiisay sa igi. Nakee dugu ⁄aafiye, ma diiray, uma gosi may ca⁄i Israeelige. 15 Gu lou, ina hii⁄abeesi ibinaa doogi, kara higi omi gaduumaa doogi sliimaa. Sa gimba nakee ti nanku kumboꞌoo doogi, digi slaꞌa hari khisla. Ina da kaari daqa doogii hari khisla, ba⁄ay yaꞌay fanqu gu hhawatee, gaa aloo konte.”
16 Da hheꞌesi, Naoomi ginaa ilii geregeti kookokee kosi kwaahha dosii, gugi tlaatleesidi omidoo ubee nankosi pahha. 17 Tigay gu teꞌesa gwaa ilaciyaa ibimaamidiyeei haa Naoomi, gi kaayri tuba, “Naoomi konta naw kara.” Nakee gurigi ayri uma gosi na Obeedi. Obeedi yaa taataa gu Yeese, kara kookoo gu Dawdi.
Mutemi Dawdi haa laqwaloo dosi
18 Haã na asu cina da Dawdi daqa Pereesigo:
Pereesi yaa taataa gu Khesirooni,
19 Khesirooni yaa taataa gu Raamu,
Raamu yaa taataa gu Aminadaabu,
20 Aminadaabu yaa taataa gu Nakhasooni,
Nakhasooni yaa taataa gu Salimooni,
21 Salimooni yaa taataa gu Boaasi,
Boaasi yaa taataa gu Obeedi,
22 Obeedi yaa taataa gu Yeese,
kara Yeese yaa taataa gu Dawdi.