Boaasi haa Ruuti biiraa gu difooge
3
1 Letu waka, Naoomi gi kaadi sa kumboꞌoo dosi Ruuti tuba, “Hotoy, ana haã ilatahhi ambee, ana sigi slaꞌa dabiiduu danaꞌa googi, igi see na ibinaa kaydi hhoinay mara googii. 2 Inkoo, Boaasi gwaa kwahhasuusu igi, ma slaarahhuumisidi aluũ gu yondimiisee dosaa, ina na hiidayuumoo goori gu coomoo. Itatiisi sigi kaay, letuti hari khwayaiĩ, ina yoo heeleꞌemisu kay wee⁄oo biiraage. 3 Inkoo, hotoy la yondita idoo sigi kaawe. Laay ooda maꞌay, langi hhuncidaa, langi maakhada hari du⁄iyataꞌa da kooma tafu gu cuua, la daamisida qayroo hhakaꞌa koki gu hhoi. Goo hheꞌeside la hada kayda biiraage. Hagoo daadaauuside teꞌesii, loo nahhata, ina see digoo hhanti arina. Looti baqata ina yooti gesaa hheꞌesiye ⁄agoo dosi. 4 Qatlay Boaasi giyoo ilii qata kaye, igi looti khuꞌunta naraꞌa daqa giyoo ilii qaatiye. Goo hheꞌeside loo hada kayda daqateesii, goo daade la fiiqida qayru yeꞌeeroo kosaa, la qata teꞌesii. Loo baqata teꞌesii, ina sigoo kaay idoo hagoo laqade.”5 Da hheꞌesi, Ruuti gi kaadi sa kumboꞌoo dosi tuba, “Naraꞌa! Ana ha yondiida gimbakee goõ siniĩ gimbuusidi.” 6 Qatlay daa ilii amasuudi, Ruuti yaa hada kaydi biirakiray. Ina gi yonditi gimbakira goõ, idoo sagaani ilii gimbuusi gooay ha kumboꞌoo dosi Naoomi.
7 Qatlay Boaasi giyaa ilii hheꞌesi ⁄agoo, yaa arimi slaqwa dosi hiĩ boo⁄odi hari khisla. Da hheꞌesi, ina gi waaudi qatage, gi tosaa qaati coomoo haa tanka gosi gu baruũ. Qatlay ina dugwaa ilii ooy guꞌudee, Ruuti ginaa ilii khocidi aslaaꞌamee daqatee naqatloo, gi daadi, gi fiiqidi qayru yeꞌeeroo gu Boaasigo, gi tosaa qati teꞌesii. 8 Hari amasi diira, Boaasi yaa iladahhi yadaa guꞌudeego, gi waratlay, gi slaapaaꞌasi, daa khay, haã na hadee hiĩ qati yeꞌeeroo kosii.
9 Da hheꞌesi, Boaasi gi maasi tuba, “Igi na miyaa diĩ qati tiꞌii?” Yaa ilaki⁄isidi tuba, “Ana na Ruuti, tongitoꞌoo doogu. Inkoo, kwahhaayuu somborokimoo gu qayru googu daqa dooii,a sa gimba ugu na hiidayuumoo gu coomoo, gu kooma ⁄uuru gu aalimee ana.”
10 Boaasi gi kaay sa Ruuti tuba, “Hotoy, digi ⁄aafiye ha Taataa Iliitleemu. Ana haã arimi hhoinay googi, gaã laqanti inkoo sa afamaraa goori, guti didiri hari khisla, hikira see gaa laqanti sa kumboꞌoo doogi ba⁄i, sa gimba igi haa slahhaaꞌadiiba qaraiya wakinay da hindaqeeri, haã da kwaeeli see digima khabimi ha inay. 11 Inkoo, hotoy muuna gwi⁄e, kara hhanti tlaꞌamuta. Ana ha yondiida sa igi gimbakee goõ, gaã idaruusidi sa ana. Yuꞌudiyaa, hida sliimaa tiꞌii Beteleheemuge hiti khuiyay tuba, igi ti hadee da kooma muree. 12 Kara gu lou, ana na heedi gu coomoo gu aalimee doogi. Inkoo yuꞌudiyaa, wana heedi waku gu coomoo hari khisla, ina na aalimiisay googi ana see ba⁄a. 13 Ibiidi tiꞌii inkoo hiti amasi. Heetlaalee hari heetlawaa, ana hoo ilatlawa kaw gimbakee sa ina, magoo akhasi ina idoo giyoo kaaye. Bere ina yoo ⁄imbi aalimee igi, naraꞌa, digi aaliye. Bere ina yoo siꞌi aalimee igi, ana sigi kaawa gimba gu lou tiꞌii pandaa da Taataa Iliitleemuge, ambee, ana hagi aala. Inkoo qaati tiꞌii, qatlay doo ilii pisiye naqatloo.”
14 Da hheꞌesi, Ruuti gi qati yeꞌeeroo hhakeesii gu Boaasige taaboo⁄u naqatloo. Qatlay gu taaboo⁄u, gii tlaydi, ma ilagobiti, dagama may arimaa ha heedi lensee, sa gimba Boaasi yaa slaiyaaba hida ma caahhiri tuba, “Hadee waka hiĩ guꞌudi biiraa gosii.”
15 Qatlay giyaa ilii slaꞌade waaudimoo, Boaasi ginaa ilii kaay tuba, “Tlaꞌasii qayriyatee toogi, hhafimaka hhapeege.” Ina gi tosaa hhafinti. Da hheꞌesi, Boaasi gi pihhimi wee⁄oo debabuu cada, gi tosaa hiikuꞌumisi qayriyateesii tosii. Sagagi tosaa hiitiiꞌisi pindakee, gi tosaa waauti yade ayage. Boaasi see gi waaudi yade Beteleheemuge.
16 Qatlay Ruuti giyaa ilii daadi ayage daqa kumboꞌoo dosii, Naoomi gigi maasidi tuba, “Hotoy, gimbakee hiĩ malee khoci taysi daqatee gaa dahhade?” Da hheꞌesi, Ruuti gi idaruusidi sa kumboꞌoo dosi gimbakira goõ, giyaani slaydi daqa Boaasigo. 17 Ina gi kara kaadi tuba, “Ina sinaani pihhimi wee⁄oo debabuu cada, gi kaay tuba, ‘Hubidi wee⁄oo nahaã ayage, hhanti ki⁄ida hari dabaiĩ kilesi daqa kumboꞌoo doogii.’ ”
18 Da hheꞌesi, Naoomi gi kaadi tuba, “Hotoy kaanahhasi, igi ti baqamidi kilesi, ha anta gimba gway ca⁄a. Letuti heedikee hiti ibiidiyaaba, gimbaki gunooti gesaa kereꞌesi.”