Ruuti haa Boaasi slaslaw gooina
2
1 Inkoo, teꞌesii Beteleheemuge, Naoomi yaa konta hiidayuumoo, gwaa tongee leẽ haa heedi gosi Elimeleeki. Heedikee yaa hindaqaru gwaa uma hiica⁄u, daa ⁄imbi, uma gosi naa Boaasi.2 Letu waka, Ruuti Moaabitoꞌoo gi maasidi kumboꞌoo dosi Naoomi tuba, “Ana slaꞌa slaarahhuumisu kawa qaymamu hhankii da buꞌuuꞌunege, daqa goo ilii slawe heedi gu muuna hhou, goo ana kwahhasuusa.” Naoomi gi kaadi tuba, “Hotoy, taa⁄a.” 3 Da hheꞌesi, Ruuti gi waauti qaymamu hhakeesii, gi tlaatleesidi hufiduu gu baruũ gwaa huhuꞌu, aluũ gu hida hhakiraa gwaa buꞌuuꞌumeego. Kaslenkwaa, qaymotee giyaa ilii slaarahhuuhhumiside, yaa qaymoo da Boaasi, gwaa afamaraa leẽ haa Elimeleeki.
4 Qatlay Ruuti giyaa ilii qaymoteesii wante, Boaasi yaagi khay Beteleheemugo, gi cehheemisi yondimiisee dosi tuba, “Dangu deꞌene ha Taataa Iliitleemu.” Inay see yaa ilaki⁄isiri tuba, “Ugu see dugu ⁄aafiye ha Taataa Iliitleemu.”
5 Da hheꞌesi, Boaasi gi maasi heedikee gwaa warii qadiidimida yondimiisee dosi tuba, “Sagameeriyataꞌa, diĩ qaditi yaqay da kaa?” 6 Heedikee gi kaay tuba, “Sagameeriyataꞌa, Moaabitoꞌoo, yaa sliimaa khaydi haa Naoomi yadaa hhapee da Moaabugo. 7 Qatlay giyaani ilii khaydi tiꞌii, hiĩ firinti tuba, ‘Ana slaꞌa slaarahhuumisuu aluũ gu hida hhankaa, hari tla⁄aã gu upaiĩ daa khiidimi.’ Qatlay giyaani ilii khaydi hari heetlawaa, sagameeriyati hiĩ yonditi hari khisla inkoo naqatloo. Hingii fiifisidi coko⁄o kilesi yaqay, kitarataꞌay.”
8 Boaasi gii wanqudisi daqa giyaa ilii wante, gi kaay sa Ruuti tuba, “Hotoy, taatli bere eea doogi! Ta⁄ameesaa hhanti slaarahhuumisuu kakayda qaymamu wakinayge, igi tiꞌii kilesii slaarahhuumisi! Ibiidi sliimaa haa tigay hhanki gu yondimaamidee tiꞌii. 9 Khuꞌumi hida hhanki gu buꞌuuꞌumee tiꞌii. Daqa giroo buꞌunee, igi see laroo teꞌesa slaarahhuumisida aluũ gu tigay hhakeesaa. Kara hhawatee hhanki see gu tiꞌii waaree, ana hagiĩ ilii⁄oo⁄i, ambee, hhanti ilahufidiyay igi. Yuꞌudiyaa maꞌay nahhakaꞌa, daani hheeki ha qaraiyati wa⁄amuugo. Bere haã anti wakhaa, taa⁄a eesii maꞌay yaqay sibeedoo hhakaꞌaa, laa kitahhada.”
10 Da hheꞌesi Ruuti gi keebeeꞌeti pandaa da Boaasige, gi kaadi tuba, “Ugu haniĩ malee ilamuriti, nagi kwahhasuusidi hari cabuuma, kara ana ti daaoo tiꞌii yaamu hhankii?” 11 Boaasi yaa ilaki⁄isi sa Ruuti tuba, “Ana sinaani catimisi gimba googi goõ, idoo gaa ilii ibitiri hhoinay haa kumboꞌoo doogi, qatlay daa ilii hhami heedi googi haa inkoo naqatloo. Kara sinaani idaruusi, idoo gaa ilii maydi hhapee da hiidayuuma doogi, taataa googi haã iyoo doogi, haagi ibinaa kaydi tay haa hida gaa hhidinte sumuku. 12 Digi buiye hari khisla ha Taataa Iliitleemu, sigi qaye caaciya da hhoi, sa gimbakee goõ gaa yonditi. Digi deꞌene ha Taataa Iliitleemu, Iliitleemu gu hida gu Israeeli, hiĩ gaani ilii lakiti.” 13 Teꞌesii, Ruuti gi kaadi tuba, “Taataa, ana kara haã slay ila⁄imbaraa pandaa dooguu. Haã ⁄imbi, haniĩ tlaatlaqasidi hari khisla, haã cocoꞌodi hhoinay hari muuna gu cabuuma daqa dooii, ana gimati yondimiisoꞌoo dooguuba.”
14 Letutee qatlay gu fa⁄a da tleemaa, Boaasi gi kwahhasuusi Ruuti tuba, “Kwahhasi, ibiidi tiꞌii! Oyii mukaatimoo naykee, tika⁄amii teꞌesii ilibaa hhakeesii gu mahhaaeege, lugu ⁄aginta.” Kara qatlay giyaa ilii ibiti haa yondimiisetee, Boaasi gii oy baruũ waku daa khwereꞌesi, gi tosaa haysi sa Ruuti, gi ⁄aginti, gi ankhadi naraꞌa, waku giyaati amoo meesidi. 15 Ruuti giyaa ilii tlaydi sa slaarahhuumisuu, alungo Boaasi yaa ilakaay yondimiisee dosi tuba, “Bere hagoo antay see, ina hufita hari tla⁄aã gu upaiĩ, mawakana, hagoo hhanti muriidisiday. 16 Teesaaqay, ba⁄ay sagooti slootimisidee teꞌesaa, daqa upaiĩ hhakeesaa daa khidiidimigo, toogunaa mamayday hhapeege sa ina ma hufiti, hagoo hhanti ilii⁄oo⁄oday.”
17 Teesaaqay, Ruuti ginaa ilii slaarahhuumisidi qaymoteesii sa tlupu khwayaiĩ naqatloo, gii kurunkuridi wee⁄otee tosi, gi tosaa difidi, gi slaydi debabuu cada. 18 Qatlay giyaa ilii hheꞌesidi difoo, gii tiiꞌidi, gi tosaa waauti ayage. Ina giyaa ilii daadi ayage, yaa laqanti sa kumboꞌoo dosi wee⁄otee goõ giyaa slaarahhuumisidi. Kara gii ca⁄asidi ⁄agotira, giyaa meesidi yadaa qaymotiraa, gi tosaa hadisidi sa kumboꞌoo dosi.
19 Teꞌesii kumboꞌoo dosi gi maasidi tuba, “Hotoy, letuti qaymoo da miyaa ganaani ilii slaarahhuumisidi wee⁄oti dati wa⁄a taqay dee, haani kaalaa yonditi taqay? Heedikee gwaani iliiaw igi, dugu ⁄aafiye hari khisla!” Teꞌesii Ruuti ginaa ilii catimisidi sa kumboꞌoo dosi gimba goõ gu looimoo gu qaymotira, giyaa ilii slaarahhuusidi, gi kaadi tuba, “Heedikee gaani ilii yondiidi letuti, uma gosi na Boaasi.” 20 Da hheꞌesi, Naoomi gi kara kaadi tuba, “Heedikee dugu ⁄aafiye ha Taataa Iliitleemu! Ina sanditi laqaaqana hhoinay gosi sa dandiray haã hhawatee hhakira koti see gwaa kaka⁄ee. Heedikee ti hiidayuumoo goori gu coomoo, kara ina na kona ⁄uuru gu iliikooma dandiray haã aalimee doogi see.”
21 Da hheꞌesi, Ruuti Moaabitoꞌoo gi kaadi sa kumboꞌoo dosi tuba, “Kara Boaasi sinaani kaay tuba, ‘Laa ki⁄ida, mangi ilagaasidi haa hida koi hiifaakoo da buꞌuuꞌuru gu baruũ goy naqatloo.’ ” 22 Naoomi gi kaadi sa Ruuti tuba, “Hotoy, teesaaqay hhoinay hari khisla! Yondiidi, idoo sigaani ilii kaay gooay ha ina. Inkoo, igi hangu ilagaasa kayde haa tigay hhakee gu yondimaamidee qaymoteesii tosii. Hotoy naraꞌa, ana goo ilatahhe, bere haã qaymamuu wakinayge slaarahhuumisuu kayda, digaani aloo idoo waka laqi.” 23 Da hheꞌesi, Ruuti ginaa ilii slaarahhuumisidi aluũ gu tigay hhakeesaa gwaa yondimaamidee qaymamuu gu Boaasige, hiifaakoo da buꞌuuꞌuru gu wee⁄oo haã ganoo naqatloo. Balalu hhakee sliimaa, ina haa kumboꞌoo dosi naa ibimaamita.