Yoona
Lakidimoo gu Yoona pandaa da Taataa Iliitleemugo
1
1 Yaa wana heedi waku, uma gosi naa Yoona, nanku Amitaay. Letu waka dugwaagi ilii khay ha ya⁄aboo da Taataa Iliitleemu tuba, 2 “Taa⁄a Ninaawige, yaamu hhakiray gu didirige, hagi ilii⁄oo⁄a kayde hida gu teꞌesa, sa gimba tlakwaroo dooina yaani daadi daqa dooii.”3 Da hheꞌesi, Yoona gi amoo dosi ooy, gi lakidi pandaa da Taataa Iliitleemugo, gi Tarisiisi khuꞌusi, yaamu gwaa segenge loii waaree haa Ninaawi. Gi ooy amoo dayii condoꞌosidi Yoopage, yaamu gwaa kenga gu tlawa da didirige waaree. Teꞌesii yaa slay meeli daa slaꞌa waaudimoo yaamu gu Tarisiisige. Yoona higi bui nawri dosi, gii day meeliteesii, gi waaudiri haa yondimiisee da meelitee Tarisiisige. Yaa teesaaqay laqi, ma lakidi pandaa da Taataa Iliitleemugo.
4 Qatlay meeli giyaa ilii khociicinte tlawage, Taataa Iliitleemu ginaa ilii ya⁄abi ilafahhiya da dihhi daqa dooinay. Ilafahhiyatee yaagii ca⁄adi, gi ⁄isinti gondadee gu deni, gi tlaatleesiri tlupidu tluntlubaa gu meelitee hari ⁄uuru, daga aloo qeetimisi. 5 Hhawatee hhakee goõ, gwaa meelige yondimaamidee, yaa tlaꞌamuumuudiri hari khisla, gonkoinaa gi tlaatleesiri firoo iliitleemamee koina. Gii kwakwahhiri tlawage khooslay, gwaa waꞌay gu meeliteesii waara, sa hiislahhaslahheesa da meelitee, ma maydi hiihhama.
Qatlaykee sliimaa Yoona yaa waꞌay gu meeliteesii wana, yaa qaati, hingiraati kwakwahhi. 6 Heedikee, gwaa wariiqadiidimida meelitee, yaa hada kay daqa Yoonage, gugi maasi tuba, “Ugu haã malee qati taqay? Tlayiiye, tlaatleesi firoo iliitleemu googu! Tegeesaa firoo doogu daga akhasi, dandi gi ilamuriidi, ma mayni kaka⁄u.”
7 Teꞌesaa da hheꞌesi hhawatee hhakee, goó yondiidee meelige, hinginaa ilii kaayri inay haa inay tuba, “Khocaa tiꞌii, na kuꞌumisani, ma sindi laqami hiĩ guraani khaw tlakwaroti.” Qatlay giyaa ilii hheꞌesiri kuꞌumisuu, ginaa ilii aniri Yoona kona dakoo. 8 Inay gi maasiri ina tuba, “Inkoo sandi kaade, miyaa naraani tlakwaroti sliimaa khay daqa doori? Ugu na miyaa? Kara ugu hoó yondu mala yondita? Haa hhapee haloo dahhada? Kara ugu heedi mala?”
9 Yoona gi ilaki⁄isi inay tuba, “Ana Eburaanimoo. Taataa Iliitleemu gunoó gwaa⁄a, Iliitleemu gu raw, gwaa tleehhu tlawoo haã hhapee see.” 10 Da hheꞌesi, ginaa ilii kaay sa inay tuba, ina Yoona yaati lakiikimidi pandaa da Taataa Iliitleemugo. Giyaa ilii akhasiri teesaaqay, yaa tlaꞌamuumuudiri hari khisla, gugi maasiri tuba, “Ugu haa soꞌoy taqay laqadi?”
11 Qatlaykee sliimaa tlawa gi asu tlakwakwaydi, ba⁄ay da tlaatleesoo dosi see. Teꞌesii ginaa ilii maasiri Yoona tuba, “Ugu haguti malee laqana dandiray, gondadee hhanki ma mayri ⁄uru⁄utlimiduu?”
12 Yoona yaa ilaki⁄isi sa inay tuba, “Hani geregeteei, hanii slakhadeei tlawage, tlawa ma tlakhati. Ana khua, hanti dakoo dooi, unkuray sangunaani ilii khay tlakwaroti da didiri.”
13 Hhawatee hhakee hingaa ila⁄imbidiriiba haa Yoona, gi tlaatleesiri yondu hari ⁄uuru gooina sliimaa, yaa koimisiri hiica⁄asa meelitee kenga gu tlawage. Digiri slanqadi hiica⁄asa, sa gimba tlawa yaa tlakwaakwaydi hari khisla loi, ba⁄ay da wakaꞌalee see. 14 Ginaa ilii tlahhasiri Taataa Iliitleemu tuba, “Ye Taataa Iliitleemu, handi hhanti fata dandiray kona dakoo, handi hhanti mayda ma kaka⁄ani, bere hagoo gaasana heediki, tegeesaa guba dakoo. Taataa Iliitleemu, goo ilatahhane, ugu naani ⁄isinti gimbaki sliimaa, idoo gaani ilii anti gooay ugu.”
15 Da hheꞌesi, ginaa ilii geregediri Yoona, gugii slakhiri tlawage, “Qubuũ!” Ciyakiray lenge tlawa gi tlakhati diĩ haã gondadee hhakira see gu deni gi tooinaa qabiri. 16 Qatlay hhawatee hhakee giyaa ilii aniri teesaaqay, yaa konay gwaa⁄amee hari khisla sa ⁄uuru gu didiru gu Taataa Iliitleemu, gi seeliniri pandaa dosii, ma gaasiri idoo sa hhaꞌaleesa da Taataa Iliitleemu. 17 Qatlay Yoona dugwaa ilii slakhi tlawage, Taataa Iliitleemu ginaa ilii ya⁄abi samaakimoo gu didiru loi daqa dosii, duguma gwi⁄i hari slafaruũ. Yoona ginaa ilii ibiidi guraꞌa gu samaakimokeesii balalu tami haa amasi tami.