Taataa Iliitleemu kilesi noó ilabuꞌuna tlakwaroogo
2
1 Qatlay Yoona giyaa ilii guraꞌa gu samaakimokeesii wane, yaa ⁄aa⁄i pandaa da Taataa Iliitleemuge, Iliitleemu giyoó iliipaꞌane balalu sliimaa, 2 gi kaay tuba,“Ye Taataa Iliitleemu, qatlay gaa ilii tlakwarotiray waare, hagwaa firimi,
haagi akhasidi ⁄aa⁄imuu gooi, hanigi ilabuꞌunti.
Qatlay gaa ilii ilahudeesi, ambee, gwaaꞌaraa dooi yaani daadi, hagwaa ⁄oo⁄i ugu,
hagi iti, hanigi iliiaydi.
3 Qatlay hanaa ilii slakhadi ana tlawage,
gii hhami waꞌay gu slagwiyage loii,
kara maꞌay nagi ilawa⁄iri ana bareemoo sliimaa,
gondadee hhakee koku gu deni naa slaabiri ana hari ⁄uuru.
4 Ana haa ilahudeesi, ambeela, ana dinaa tlintiꞌisi pandaa doogwaa.
Inkoo, kahha kooma iliipaꞌaruu gu arimaa da mara googuu gaa tlintiꞌisidi sa ugu.
5 Qatlay dinaa ilii gwi⁄i ha maꞌay hhakee,
dinaa ilii niini⁄idi bareemoo sliimaa slagwiyateesii,
kara saga gooi dugwaa ilii ilaslaabi ha sluufakaꞌa gu tlawa,
gwaaꞌaraa dooi gaati khuꞌuuꞌuma tiꞌii coomokii.
6 Gaa ilii hhami tlawateesii, daqa kibeeri gu omeerige, hangaa ilahudeesi, ubee,
heedikaꞌa pahha gwaa khonsleebaage waara, gooba hiica⁄a.
Ye Taataa Iliitleemu, Iliitleemu goó iliipaꞌame,
ugu hanaa ilabuꞌunti ana gwaaꞌaraago, hanaagii ca⁄asidi bondakiraa.
7 Qatlay muuna goy giyaa aloo ilii slaiye kwihhida, ana hagwaayii slay ugu, Taataa Iliitleemu,
⁄aa⁄imuu gooi gi day pandaa dooguu, daqa mara googuu gaa tlintiꞌisidi sa ugu.
8 Ana khua, hhakee goó iliipaꞌamee iliitleemamee gu afaꞌafuumaa,
hhidinay slaꞌamuu haã hhoinay gu didiru goó slaꞌade hadisa sa inay.
9 Inkoo, ana hari raaꞌamee da daareesa, ha gaasa idoo sa hhaꞌaleesa doogu.
Kara gimbakira, gaa seelimi pandaa dooguu, hagooti yondida naraꞌa lou.
Taataa Iliitleemu kilesi noó ilabuꞌuna tlakwaroogo!”
10 Da hheꞌesi, Taataa Iliitleemu gi kaay sa samaakimokira, yaagi tosaa wa⁄a kay Yoona kenga gu tlawage.