Waaudimoo gu Yoona Ninaawige
3
1 Teꞌesaa Yoona dugwaagi asu kara ilii khay ha gimba gu Taataa Iliitleemu tuba, 2 “Taa⁄a Ninaawige, yaamu hhakiray gu didirige, sigi kaawa kayde hida gu teꞌesa gimbaki ga giimaamise sa ugu.”3 Teꞌesii, Yoona gi ⁄imbi ya⁄aboo da Taataa Iliitleemu, gi waaudi yaamu hhakiray gu Ninaawige. Yaamu hhakee gu Ninaawi gwaa didiri hari khisla loi, hiitlakhwaruũ gooina yaa khocu gu balalu tami. 4 Qatlay Yoona giyaa ilii day yaamu hhakeesii, letutee yaa khoci sa tlupu, ginaa ilii tlaatleesi kakaaruu sa hida gu yaamu hhakee tuba, “Kahhiyay balalu mibeeri cigahha kilesi taqaaqay, yaamu hhanki gu Ninaawi digiti hhamisi goõ!” 5 Qatlay hida hhakee gu Ninaawi giyaa ilii akhasiri gimbakee, ginaa ilii ⁄imbiri gimba gu Iliitleemu. Teꞌesaa hingaa ila⁄imbidiri minsloo da mawaraa ⁄agoo haã kitahhuũ see. Gimbaki dugwaa ⁄imbi ha hida goõ, hida gu deni haã hida gu digiidakwi see, gi ila⁄utlidiri kanikakuu sa laqaru idoo giyaa ilii li⁄iri sa tlakwarotee tooina.
6 Qatlay mutemi gu yaamu goõ gu Ninaawi giyaa ilii akhasi gimbakee, daa giimaamisiye ha Yoona, ginaa ilii tlay, yaagii ⁄eeti kitiĩ gosaa gu tawaaloogo, gi faataqasi qayroo hhakee kosi gu tawaaloo, gi ila⁄utli kanikii, gi tosaa ibinaa kay hhapeege. 7 Da hheꞌesi, mutemikee haa hida hhakee kosi gu deni ginaa ilii ya⁄abiri hida, ma kakaaruu kayri minsloo da maawaraa ⁄agoo haa kitahhuu yaamu sliimaa gu Ninaawige tuba, “Hida sliimaa haã kuꞌunaanay see hhanti ⁄aginay, hhanti kitahhanay idoo lenseei. 8 Inkoo, hida sliimaa hiti ila⁄utlidiyeei kanikakuu, kuꞌunaanay see dugu ilacuuyimine hari kanikakuu. Hida goõ ⁄aa⁄iyeei daqa Iliitleemuge hari ⁄uuru goina goõ. Mayee amamu hhakee koina gu tlakwi haã caꞌabasluuma dooina see. 9 Miyaa na khui, dandiray cahhanaaba, angamalee Iliitleemu hindi ilamuriidi, tegeesaa gi may slahhaaꞌamee dosi, hindoo hhanti cu⁄i.”
10 Qatlay Iliitleemu giyaa ilii arimi hida hhakee, idoo giyaa laqiri haa giyaa ilii mayri amamu hhakee koina gu tlakwi, ginaa ilii ilamuriidi inay. Kara gi tosaa may hhamisaraa dooina, giyaa taarimi wakaꞌalee sa inay.