Yoona slahhamee dosi sa muree da Taataa Iliitleemu
4
1 Yoona dugwaa muuna tlakweesi sa gimbakira, gi slahhaai hari khisla. 2 Teꞌesii ginaa ilii tlaatleesi quru⁄umoo daqa Taataa Iliitleemuge tuba, “Ye Taataa Iliitleemu, gimbaki pasliyaa ana gaa ilahudeesi, qatlay gaa ilii yade waare yaamukoii? Daqatee ana saganaa cira lakidi yade, yaamu hhakiray gu Tarisiisige, sa gimba haa caahhi, ambee, ugu na Iliitleemu gu muuna hhou, gu kooma hhoinay gu didiru. Ugu hoó cira slahhaaꞌadaaba, kara hoó konta slaꞌamuu hari khisla haa hida balalu sliimaa. Ugu na Iliitleemu goó cira hiifookida slahhaaꞌamee doogwaa, gi may hhamisaraa. 3 Inkoo, ye Taataa Iliitleemu, nati gaaside, ana goo ilatahhe, ambee, ba⁄ay da gwaaꞌaraa, ma may ibinaa tiꞌii khoorotii.” 4 Teꞌesii Taataa Iliitleemu yaa ilaki⁄isi sa Yoona tuba, “Ugwangeesii gati ilatahhade, hanti boo⁄isidii slahhaaꞌametee gaã slahhaaꞌadi?”5 Da hheꞌesi, Yoona ginaa ilii ca⁄i yadaa yaamu hhakeesaa, gi tosaa daqa waka kay daraa bara da ilacindoo gu rawaage waara. Daqateesii ginaa ilii boo⁄isi cuuru, gi tosaa ibiidi mahhatukeesii, ma asu baqamidi, ma arimi idoo daayii ca⁄a yaamu hhakeesii. 6 Teꞌesaa Taataa Iliitleemu ginaa ilii tiꞌidisi saimoo teꞌesii, daqateesii daa ilii wane Yoona, gugi tosaa cira diireesi, ina ma slay mahhatu gu ilii fiifisa sa ba⁄adaa hhakee kosi. Yoona yaa hhaꞌaluudi hari khisla sa saimokee.
7 Heetlaalee dosii daa ilii pisi, Iliitleemu ginaa ilii ya⁄abi khulukhumbimoo waku. Khulukhumbimokee gii slikidi saimokee, ma kay goõ. 8 Qatlay letu giyaa ilii ca⁄adi, Iliitleemu yaagi ya⁄abi caaqwa daa ilahameeriya da dihhi yadaa bara da ilacindoo gu rawaago. Kara tleemaa yaay da⁄adi hari khisla daqa Yoonage, yaati naahhi aloo kwihhidi. Ina yaati amoolaa firimi gwaaꞌaraa dosi, ina beei, “Inkoo ana goo ilatahhe, ambee, ba⁄ay da gwaaꞌaraa, na may ibinaa tiꞌii khoorotii.” 9 Teꞌesaa Iliitleemu ginaa ilii kaay sa Yoona tuba, “Inkoo, ugu slahhaaꞌamee mala konta sa saimoki guũ kaw?” Yoona yaa ilaki⁄isi tuba, “Gu lou, ana haã slahhaai hari khisla, slaꞌa gwaaꞌaraa see.”
10 Da hheꞌesi, Taataa Iliitleemu gi kaay sa ina tuba, “Yuꞌudiyaa, ugu haã slahhaaꞌadi sa saimoki, kara ugu idoo lensee hhaka gaa yonditi sa diireesa dosi. Saimoki yaa tiꞌidi, gi tosaa diiray hari amasi leẽ, kara gi kay heetlaalee dosii. 11 Inkoo, bere ugu ga ilatahhade, ana haã slahhaaiibaslii sa yaamu hhanki gu didiri gu Ninaawi? Hida kosi wa⁄a, yaay catiri elefu mibeeri mibi haa elefu mibeeri cada! Hida hhanki yoó baraslayaaiiba gimba gu tlaku haa gimba gu hhou. Kara yaamu hhanki konay kuꞌunaanay see wa⁄a.”