Tigay sa Wabenyamiini gwaa meetee
21
1 Inkoo, Waisraeeli yaa seeliniri yade Misipaage tuba, “Wanaaba heedi lensee tla⁄aã goorii gumaa hadisa hotosi, dagama khabimi ha hhawata gu kabiraa da Benyamiini.”2 Teꞌesaa Misipaago, Waisraeeli gi waaudiri, gi dayri Beteelige, teꞌesii gi ibiidiri pandaa da Iliitleemuge khwayaiĩ naqatloo. Inay gi maahhiri hari afoo da didiri haa gi ⁄aa⁄iri hari slahhaaꞌamee. 3 Inay gi firiniri tuba, “Ye Taataa Iliitleemu, Iliitleemu gu Israeeli, gimbaki yaani soꞌoy gii ca⁄i hhapee doori? Letuti kabiraa leẽ da Israeeli sa soꞌoy hhaka tla⁄aã goorii?”
4 Heetlaalee dosii hari hheetlawaa, hida gi tleehhiri masabaahu haa hiraagi khayri sadaaka da da⁄araa haa sadaaka da qasaw.
5 Da hheꞌesi, Waisraeeli hingigi maamisiri tuba, “Ti kabiraa haloo tla⁄aã gu kabiraa da Israeeli, naani daadiiba hiikurunkuridatii da iliisataraa Taataa Iliitleemu?” Sa gimba, inay yaa seeliniri seeliru gu didiru sa heedi gooba khawaraa pandaa da Taataa Iliitleemuge yade Misipaage, hikee ti kwanda dugu gaasiye.
6 Inkoo, Waisraeeli gi aniri slahhaaꞌamee, sa hhiee koina gu kabiraa da Benyamiini, gi kaayri tuba, “Letuti kabiraa leẽ hingii hhancooidi tla⁄aã gu Israeeligo. 7 Inkoo, hati malee laqana, sigima slayni tigay hhawatee guũ meetee gu kabiraa da Benyamiini? Sa gimba, dandiray haa seelini daqa Taataa Iliitleemuge tuba, sigi hadisanaaba sagameeru goori, ma tigay koina tleehhidiri.” 8 Teesaaqay, hingigi maamisiri tuba, “Inkoo, ti raqa haloo tla⁄aã gu kabiraa da Israeelige niĩ daadiiba, pandaa da Taataa Iliitleemuge yade Misipaage?” Inay gi baraslayri tuba, hhaku heedi lensee gwaani khaw tiꞌii Misipaage, yadaa Yabeesi-Gileyaadigo, gwaani daw hiikurunkuridage. 9 Qatlay giyaa iliifaadiri, gi baraslayri tuba, wanaaba heedi lensee gu yaamu gu Yabeesi-Gileyaadi.
10 Teesaaqay, marimariya da Waisraeeli gi ya⁄abiri sirikaarii elefu mibi haa cada, gigi ilafahhiri ma hadakayri Yabeesi-Gileyaadige haa gi cu⁄iyay hari pangaa hida goõ goó ibidee yade, yade yaa wanay tigay haa daaqay. 11 Sigigi kaayri tuba, “Hiĩ na gimba ga yondu kaydee. Cu⁄a hhawatee goõ haa tigay goõ haã gu kikitatu gooba.” 12 Inay gi hadakayri yade Yabeesi-Gileyaadige haa gi cu⁄iri hida goõ. Teesaaqay see, ti kikitimaiĩ hhakira gu miyaa cigahha naa meetiri, hhaã gu kahhee guꞌudee haa hhawata lensee. Da hheꞌesi, gigi leehhisiri kambiige yade yaamu gu Siiloge hhapee da Kanaanige.
13 Da hheꞌesi, marimariya da Israeeli gi ya⁄abidi ya⁄aboo da kooma gimba gu qasaw sa Wabenyamiini, yade hhafida gu Rimoonige. 14 Da hheꞌesi, hhawatee hhakee gu kabiraa da Benyamiini giyaa ilii akhasiri gimbakee, yaagi ki⁄iri yaamu koinay haa sigigi hadisi sagameerukira gu Yabeesi-Gileyaadi daa ilameesi gaugo. Teesaaqay see, sagameerukee yaa buꞌudisiriiba hhawatee hhakee goõ.
15 Waisraeeli hingaa hiiakhasiriiba hhoinay sa kabiraa da Benyamiini, sa gimba, Taataa Iliitleemu yaa qaasi tlintaa kabiraa da Israeelige. 16 Teesaaqay, gaduũ gu hiikurunkuridatee gi kaayri tuba, “Inkoo hati malee laqana, sa hhawatee guũ meetee, ma slayri tigay, sa gimba tigay goõ gu kabiraa da Benyamiini digiĩ cu⁄i? 17 Hhawatee guũ meetee gu kabiraa da Benyamiini, kwanda sigi slayne tigay, ma slayri aalimiisee. Hari amoti, kabiraa lensee Israeelige hhantaaba. 18 Dandiray sigi hadisanaaba sagameeru goori, ma tigay koina tleehhidiri, sa gimba dandiray Waisraeeli haa seelini tuba, heedi gumaa hadisa hotosi, dagama khabi ha hhawata gu kabiraa da Benyamiini, dugu ilawaasiye.” 19 Teꞌesii gi kaayri tuba, “Yuꞌudiyaa, losona gu Taataa Iliitleemu, gu kila kori yade Siiloge yaani daadaauusi. Yaamu gu Siilo hari bara da goraa gu yaamu gu Beteeli wanay haa hari bara da ilacindoo gu rawaa gu balabalatira daa Beteeli dahha da yaamu gu Sekeemu khuꞌusa, slime ti hari bara da wayee gu Lebanooni.”
20 Teesaaqay, gi kaayri sa hhawatee hhakiri gu Kabiraa da Benyamiini, gwaa afariislaꞌadee tigay tuba, “Taa⁄amida, nahhamida qaymamu gu misabiibuge. 21 Unkuray khuꞌuma naraꞌa. Qatlay sagameeru gu Siilo giyoo iliica⁄iyee khoorooge sa seehha, qatlay gu losona, ca⁄aaruu qaymamu hhakeesaa gu misabiibugo. Teꞌesii, kila heedi ooyiye sagameeriya leẽ tla⁄aã gooinaa, ma hadee dosi tleehhiti haa girigi waautay hhapee da Benyamiinige. 22 Bere ayiĩ koina baku hhiee koina hindoo iliiquru⁄iyay, sigooti kaawana tuba, ‘Dandiray hangu firina, ⁄awaarima sa kabiraa da Benyamiini, sigi maydee magiri waauꞌudiri tigay hhakee, sa gimba dandiray sigaa hadisaniiba inay tigay, gaa ilii qwaatlani haa inay yade Yabeesi-Gileyaadige. Teesaaqay, slime unkuray see, kontaaiiba dakoo, sa hadisa sagameeru googuna sa inay, ma tigay koina tleehhidiri.’ ”
23 Hhawatee gu kabiraa da Benyamiini gi teesaaqay laqiri, idoo sigaa iliikaay gooay. Kila hhawata gii leehhi sagameeriya tla⁄aã gu sagameeru gwaa hiica⁄u khoorooge sa seehha yade Siiloge haa girigi waaudi aya gosii, gi hadee dosi tleehhiti. Da hheꞌesi, gi ki⁄iri daqa aalimee dooinay, gii ⁄abeesiri tlehhinay yaamu koina haa gi ibiidiri teꞌesii.
24 Qatlaykeesii, Waisraeeli gi waaudiri daqateesaa, kila heedi gi ki⁄i daqa kabiraa dosii, daqa motoliya dosii haa daqa aalimee dosii ina loi.
25 Balalu hhakeesii, Waisraeeli yaa konaaiiba mutemi. Kila heedi yaati yondiidi, idoo giyaa iliiarimi gooay ti naraꞌa ilaa kosii ina loi.