Gau gu Waisraeeli haa Wabenyamiini
20
1 Waisraeeli goõ tlaatleesi yaamu gu Daanigo yaamu gu Beeri-seeba naqatloo haa hida gu hhapee da Gileyaadi, yaagii ca⁄iri heedi leẽ pahha, gii kurunkuridiri pandaa da Taataa Iliitleemuge yade Misipaage. 2 Giyaadimiisee goõ da kabiraa da Israeeli gi qadimidiri pandaa da hida gu Iliitleemuge, gwaay kurunkuridee. Gonkoinaa yaa sirikaarii elefu miyaa cigahha, goó khocee hari yeꞌeeroo, gu koomee khasima. 3 Qariqaaqari, kabiraa da Benyamiini gi akhasiri tuba, Waisraeeli danaee koina hiĩ ilakhiinaa⁄adiri yade Misipaage. Teꞌesii, Waisraeeli danaee koina gi maasiri Mulaawimokira tuba, “Sandi ilakeesidee gimbaki gu tlaku idoo giyaa iliica⁄i.”4 Teesaaqay, Mulaawimokee, heedi gu hadetira da afay daa gaasi gi kaay tuba, “Ana haa hadee doy da afay haa hhiyuudani, gi daani Gibeeyage, yaamu gu kabiraa da Benyamiini, ma guani teꞌesii. 5 Hari amasi hhakee, hhawatee gu yaamu gu Gibeeya yaagi khayri haa gi niini⁄idiri mara gaa iliiwaare, hini slaiyay gaasa ana. Inay gi paahhaniri hadee doy da afay yaati amoolaa gwaꞌati. 6 Teesaaqay, ana hagii oy tuuꞌuna da hadetee toy aya gooi naqatloo. Da hheꞌesi, hagagii tlaaqi ⁄aaraiĩ haa ⁄aaraiĩ. ⁄aaraiĩ hhakee hagigi leehhimisi daqeemoo gonge gu hhapee da Israeeli, sa gimba hiĩ yondiidiri slasla⁄iima da didiri haa gimba gu ilamuree Israeelige. 7 Inkoo, unkuray Waisraeeli goõ, gimbuusa haa kereꞌesa gimbaki.”
8 Teꞌesii, hida goõ gii tlayri sliimaa haa gi kaayri tuba, “Hhaku hhawata lensee tla⁄aã goraa gu ki⁄a hemaa dosii baku mara gosii. 9 Inkoo, hiĩ na gimba ga yondiidane sa hida gu Gibeeya. Dandiray hagi iliitlaꞌa kayna, idoo kuura sindoo ilii laqante gooay. 10 Dandiray hiileehhana hida mibi daqa hida miyaa lengo, kabiraa gongo da Israeeli, hida miyaa leẽ daqa hida elefu lengo, haa hida elefu leẽ daqa hida elefu mibigo. Hida hhakee yondu gooina ti leehhimisu ⁄agoo sa deneꞌee koina gu koomee yondu gu iliitlaꞌa kawa yaamu gu Gibeeya hhapee da Benyamiinige, sa tlakwaroo dooina giyaa yondiidiri Israeelige.” 11 Teesaaqay, hida hhakee goõ gu Israeeli gii kurunkuridiri sliimaa hari muuna leẽ, sa yaamu hhakee gu Gibeeya.
12 Kabiraa da Israeeli gi ya⁄abiri hida daqa kabiraa gonge da Benyamiini haa sigigi kaayri tuba, “Ti tlakwaroo mala haã da hiitlaꞌameedeesa dingii ca⁄adi tla⁄aã googunay? 13 Inkoo, ca⁄asankinay hida hhakee gwaa slasla⁄uumidee gu waaree tiꞌii Gibeeyage, magi cu⁄ani haa ma kwahhani sumuku tlakwaroo Israeeligo.”
Teesaaqay see, kabiraa da Benyamiini yaa itatiisiriiba hhiee koina Waisraeeli. 14 Teesaaqay, hhawatee gu kabiraa da Benyamiini yaagii ca⁄iri yaamu koinaa, gii kurunkuridiri Gibeeyage, ma gauusiri haa Waisraeeli. 15 Balotee, Wabenyamiini yaay kurunkuriri yaamu koinaa sirikaarii elefu mibeeri cada haa lahhoꞌo gu khuee qwatla hari pangaaee. Slime, yaamulooee da yaamu gu Gibeeya gii kurunkuridiri hhawatee miyaa fanqu daay leehhi. 16 Tla⁄aã gu sirikaariteesii yaa wanay hhawatee mibeeri mibi fanqu daay leehhi gu basaiĩ, kila heedi tla⁄aã gooinay yaay dahhasi hiilihha tlaa⁄u hari weela, gi sabina quubiya da saga dakusa see gubasli.
17 Waisraeeli, may hhakee gu kabiraa da Benyamiini, inay yaay kurunkuridiri hhawatee elefu miyaa cigahha gu khuee qwatla hari pangaaee, hhakee goõ yaati khamaslaslaa gu gau.
18 Waisraeeli gi ilakhiinaaꞌadiri Beteelige, haa gi maasiri Iliitleemu tuba, “Ti kabiraa haloo tla⁄aã goorii na giyata pandaa doorii, ma gauusiri haa Wabenyamiini?”
Taataa Iliitleemu gi kaay tuba, “Kabiraa da Yuuda na giyate gesaa.”
19 Heetlaalee dosii hari heetlawaa, Waisraeeli gi waaudiri, gi tluhhusiri kambii gooina ilaciyaa haa yaamu gu Gibeeya. 20 Waisraeeli yaagii ca⁄iri, ma qwaatliri haa Wabenyamiini, Waisraeeli gi qadimidiri daqeemoo koinay gu gau yade ilaciyaa haa Gibeeya. 21 Wabenyamiini yaagii ca⁄iri Gibeeyago, gi gauusiri haa Waisraeeli, letutee Wabenyamiini gi cu⁄iri Waisraeeli elefu mibeeri cada haa cada. 22 Teesaaqay see, Waisraeeli hingigii ⁄atlisiri, kila heedi haa danaꞌa gosi. Inay, hingigi ilakhuukhuꞌusiri kara sa gau waa da cada, namati daqatiray higaa ilii ilakhuukhuꞌusiri da pandaa. 23 Da hheꞌesi, Waisraeeli gii kurunkuridiri kara pandaa da Taataa Iliitleemuge, gi ⁄aa⁄iri pandaa dosii khwayaiĩ naqatloo, inay gi maasiri Taataa Iliitleemu tuba, “Inkoo, hadakaynaa, ma qwatla kayni kara haa hhiee koti gu kabiraa da Benyamiini?”
Taataa Iliitleemu sigigi kaay tuba, “Taa⁄amida qwaatla haa inay.”
24 Teesaaqay, baloo da cadage, Waisraeeli gii satiri ma qwaatliri haa Wabenyamiini. 25 Baloteesii da cadage, kabiraa da Benyamiini yaagii ca⁄iri Gibeeyago, gi qwaatliri haa Waisraeeli, inay gi cu⁄iri Waisraeeli elefu mibi haa dagati, gonkoinaa yaati sirikaarii gu khuee qwatla hari pangaaee.
26 Da hheꞌesi, Waisraeeli goõ gi hadakayri Beteelige, haa gi ⁄aa⁄iri pandaa da Taataa Iliitleemuge haa gi mayri ⁄agoo khwayaiĩ naqatloo. Teꞌesii, gi hadisiri sa Taataa Iliitleemu sadaaka da da⁄araa haa sadaaka da qasaw. 27 Waisraeeli gi maasiri Taataa Iliitleemu sigima kaay idoo gi laqiyee. (Balalu hhakeesii sandikoo da ila⁄imbidu da Taataa Iliitleemu yaa Beteelige wanta. 28 Qatlaykee, Finehaasi nanku Eleyasaari, okookoo gu Haruuni, yaa yondimaamidi pandaa da sandikoteesii.) Waisraeeli gi maasiri kara Taataa Iliitleemu tuba, “Inkoo, hadakaynaa kara, ma qwatla kayni haa hhiee koti kabiraa da Benyamiini, baku hati mayna?”
Taataa Iliitleemu sigigi kaay tuba, “Taa⁄amida. Heetlaalee inay hagiilu⁄a dabaiĩ kokunay.”
29 Teesaaqay, heetlaalee dosii, Waisraeeli gi nahhadimisiri hida tla⁄aã gooinaa gu hiicaqwidu, niini⁄ida da yaamu goõ gu Gibeeya. 30 Baloo da tamiige, Waisraeeli gi waaudiri, ma qwaatla kayri haa kabiraa da Benyamiini. Hingigi siikhidisiri, ma qwaatliri haa hida gu Gibeeya, idoo giyaa iliilaqiri gooay qatlaai wakinay. 31 Wabenyamiini yaagii ca⁄iri, ma qwaatliri haa Waisraeeli. Waisraeeli gii dafidiri Wabenyamiini ma waaudiri segenge haa yaamu hhakee. Inay gi tlaatleesiri qwatla haa gi cu⁄iri hida mibeeri tami gu Israeeli, idoo giyaa ilii laqiri gooay qatlaai hhakira gu pandaa, amamu gu denige, leẽ doó yaamu gu Beteeli khuꞌusa, waka yaamu gu Gibeeya khuꞌusa.
32 Kabiraa da Benyamiini gi ilahudeesiri tuba, “Hagiĩ cu⁄ani da qatlaykira gooay gu pandaa.” Waisraeeli gi kaayri tuba, “Dandiray dudukane alunge magii dafidani segenge haa yaamu amoo da didiri naqatloo.”
33 Teesaaqay, hida goõ gu Israeeli yaagii ca⁄iri daqeemoo koinaa haa hingigi siikhidisiri yade Baali-Tamaarige. Slime, danaee koina gwaa nahhamidee sa hiicagwidu, yaagii ca⁄iri ciraai daqeemoo koinaa bara da ilacindoo gu biraago gu yaamu gu Gibeeya. 34 Da hheꞌesi, hida hhakee elefu mibi daay leehhi kabiraa gongo da Israeeli, yaagi khayri yaamu gu Gibeeyage. Gau gu letutee gwaa dihhu hari khisla. Teesaaqay see, kabiraa da Benyamiini yaa baraslayriiba tuba, hhamisaraa dooina yaani daadi ciyoomooge. 35 Taataa Iliitleemu gi kaba⁄i Wabenyamiini pandaa da Waisraeelige, letutee Waisraeeli gi cu⁄iri hhawatee elefu mibeeri cada haa kooani haa miyaa leẽ, hhakee daa cu⁄i yaati sirikaarii da gau, gwaa khuee gwatla hari khasima. 36 Teesaaqay, kabiraa da Benyamiini gi aniri tuba digiĩ kaba⁄i.
Waisraeeli haraa amotee kaba⁄iri, gi waaudiri pandaa da Wabenyamiinigo, sa gimba Waisraeeli yaati iliipaꞌaniri danaee koinay gwaa nahhamidee sa hiicagwidu yaamu gu Gibeeyage. 37 Hida hhakira gwaa nahhamidee sa hiicagwidu, gii slehheesiri hiiguuma yaamu gu Gibeeyage, gi pasidiri haa gi cu⁄iri hari pangaaee hida goõ gu yaamu hhakee. 38 Waisraeeli hingaa ila⁄imbidiri haa deneꞌee koina gwaa nahhamidee sa hiicagwidu tuba, giyoo iliiarinee eehha gu didiru cindarooisi rawge yaamu hhakeesaa, 39 teꞌesii iliitlaiyee yaamu hhakee. Qatlaykee kabiraa da Benyamiini yaa cu⁄iri Waisraeeli mibeeri tami, inay gi ilahudeesiri tuba, “Gu lou, hagi cu⁄ana, idoo hagiyaa iliikaba⁄ani gooay gaukiray gu pandaage.” 40 Teesaaqay see, qatlay tlongiyatira da eehha giyaa iliitlaatleesidi cindarooisa yaamu hhakeesaa, Wabenyamiini gii fookidiri haa gi aniri eehha gu ci⁄araa da yaamu goõ, cindarooisi rawge. 41 Teꞌesii, Waisraeeli gi iliifookidiri kabiraa da Benyamiini, kabiratee dagagi ooy ha dahhiya, sa gimba yaa aniri tuba hhamisaraa dooina yaani daadi. 42 Teesaaqay, Wabenyamiini gi lakidiri pandaa da Waisraeeligo, gi yade khuꞌusiri bara da kongoqomeege. Teesaaqay see, inay yaay dahhasiriiba hii⁄ipa gaukee. Slime, Waisraeeli yaagii ca⁄iri yaamu hhakeesaa, gi cu⁄iri kabiraa da Benyamiini. 43 Waisraeeli gi siragusiniri Wabenyamiini, gigi slayri hari bara da ilacindoo gu rawaa gu yaamu gu Gibeeya haa gigi ilagiidiri bareemoo goõ. 44 Balotee digaa cu⁄i hida elefu mibi haa dagati gu kabiraa da Benyamiini, gonkoinaa yaati sirikaarii da khamaslaslaa. 45 Kabiraa da Benyamiini gii fookidiri haa gi lakidiri yade khuꞌusa kongoqomee hhafida gu Rimooni naqatloo. Teꞌesii, Waisraeeli gi cu⁄iri Wabenyamiini elefu kooani, giyaa iliiamooge wanee. Kara, gigi siragusiniri hari ⁄uuru yaamu gu Gidoomu naqatloo, yade hida elefu cada gu Benyamiini digigi cu⁄i. 46 Balotee digigi cu⁄i Wabenyamiini elefu mibeeri cada haa kooani, khamaslaslaa gu khuee qwatla hari pangaaee. 47 Teesaaqay see, hhawatee miyaa lahhoꞌo yaa hiidahhasiri lakida, gi kongoqomee khuꞌusiri yade hhafida gu Rimoonige, gi ibiidiri yade slehheeri cigahha. 48 Waisraeeli yaagi ki⁄iri haa gi cu⁄iri hari pangaaee hida goõ gu kabiraa da Benyamiini gwaa meetee, sliimaa haa kuꞌunaanay haa kila idoo giyaa slayri. Yaamu goõ giyaa aniri giyaati daada⁄aniri.