Mulaawimoo haa hadee dosi da afay
19
1 Qatlay gu balalu hhakeesii, Waisraeeli yaa konaaiiba Mutemi. Inkoo, Mulaawimoo waku gwaa ibimaamida daqa da segenge hhapee da koomage omeeri da Efurayiimu, gii oy hadee da afay yaamu gu Beteleheemugo gu hhapee da Yuuda. 2 Teesaaqay see, hadetee da afay gi yonditi slipalauumaa, gi ki⁄idi aya gu taataa gosii yade yaamu gu Beteleheemuge hhapee da Yuudage. Hadetee gi ibiti yade qoomay gu slehheeri cigahha. 3 Letu waka, hhawata gosi giyaa nanaaru kay hari muuna gu hhou, maa ki⁄idi mara gosii. Hhawatakee yaa waaudi sliimaa haa yondimiisay gosi haa daqwaai kosi cada. Qatlay giyaa iliidayri yade, hadetee gugi leehhisidi mara gu taataa gosii. Taataa gosi gwaa iliiarimi, gugi kwahhasuusi hari hhaꞌaloo. 4 Da hheꞌesi, kumbaꞌa gosi, taataa gu hadetee gugi kwahhasuusi, ina gi ibiidi teꞌesii mara gu kumbaꞌa gosii balalu tami. Mulaawimokee haa yondimiisay gosi gi ⁄aginiri, gi kitahhaniri haa gi guꞌuminiri yade balalu hhakee gu tami.5 Baloo da cigahhage, gii tlayri hari tumpaatumpu, hingigi ilakhuukhuꞌusiri sa waaudimoo. Teesaaqay see, taataa gu hadetee sugugi kaay tuba, “⁄agimi gesaa ⁄agoo coko⁄o, ma slaydi ⁄uuru, la asu waauta.” 6 Teesaaqay, hida hhakee gu cada gi meetiri, gi ⁄aginiri haa gi kitahhaniri sliimaa. Da hheꞌesi, taataa gu hadetee gi kaay sa kumbaꞌa gosi tuba, “Hhooa meeti tiꞌii amasi hhanki, mangi muunaboo⁄eesidi.” 7 Qatlay, heedikee giyaa iliislaiye waauda, kumbaꞌa gosi gugi tlaatlaqasi ma meeti, ina gi ⁄imbi, gi gui yade kara. 8 Baloo da kooanige gii tlayri hari tumpaatumpu, heedikee giyaa iliitlay ma waaudi, taataa gu hadetee sugugi kaay tuba, “Baqadi qatlay gu tleemaa naqatloo, ma gesaa ⁄aginti, ma slaydi ⁄uuru asu waautay.” Da hheꞌesi cada koinaa gi ⁄aginiri sliimaa.
9 Qatlay Mulaawimokee giyaa iliitlay ma waaudi haa hadetee tosi da afay haa yondimiisay gosi, kumbaꞌa gosi gi kaay sa Mulaawimokee tuba, “Yuꞌudiyaa inkoo dingii khwaayaauudi, amasi yaani dayri, gue tiꞌii, mangi muunaboo⁄eesidi. Heetlaalee hari heetlawaa hooy tlayda hari tumpaatumpu, ma tlaatleesidi hhiyuuma doogu da ki⁄araa aya googuu.” 10 Teesaaqay see, heedikee gi siꞌi guꞌudee kara amasi hhakee teꞌesii. Da hheꞌesi, gii tlay, gi waaudi haa giyaa iliidaadaauusiri yaamu gu Yebuusige, (uma gu caduu gu yaamu hhakee na Yerusaleemu). Ina kona daqwaai kosi cada daa iliihhafi qayroo dandaiĩ koinay, sliimaa haa hadee dosi da afay.
11 Qatlay giyaa ilii daadaauusiri yaamu gu Yebuusige amasi yaagi dayri, yondimiisay gi kaay sa looimoo gosi tuba, “Inkoo, ba⁄ay hiigunee yaamu hhankii gu Wayebuusige, ma guani tiꞌii.”
12 Teesaaqay see, looimoo gosi gugi ilaki⁄isi tuba, “Suti, hiigunaaba yaamu gu dahaage, hhaã hida kosi gu Waisraeeli gooba. Dandiray ha ilakona hari hhiyuuma yaamu gu Gibeeya naqatloo.” 13 Da hheꞌesi, gi kaay sa yondimiisay gosi tuba, “Paaree karahhanee, ma daani yaamu gu Gibeeyage baku Raamage ma guani teꞌesii.” 14 Teesaaqay, gi ilakoniri hari hhiyuuma dooina, letu gii huuꞌudi giyaa ilii daadaauusiri yaamu gu Gibeeyage, yaamu gu kabiraa da Benyamiini. 15 Inay gii guniri yaamu hhakeesii gu Gibeeyage, ma guiri teꞌesii. Qatlay giyaa iliiguniri yaamu hhakeesii, gi ibinaa kayri muleeliya da yaamuge, sa gimba wanaaba heedi gwaa kwahhasuusu inay ma guiri mara gosii.
16 Qatlay giyaa ilii muleeliyateesii wanee, gaduwaa leẽ yaagi khay, yaa qaymoo dosi dahhi yondugo. Gaduwakee yaa yaamu looay gu hhapee da kooma omeeri da Efurayiimu, ina yaati ibimaamidi dahaa pahha yade yaamu gu Gibeeyage. Yaamulooee da yaamu gu Gibeeya yaa kabiraa da Benyamiini. 17 Gaduwakee giyaa iliiarimi hhiyuumiisetee muleeliya da yaamuge, gigi maasi tuba, “Unkuray ha kaakaakayda? Kara haa kaadahhaday?”
18 Ina gugi ilaki⁄isi tuba, “Dandiray haa yaamu gu Beteleheemu dahhana hhapee da Yuudago. Inkoo, hhapee da omeeri kakaakayna da Efurayiimu, yade haganoó ilii ibiidana. Dandiray haati hhiyuudani Beteleheemu da Yuudage, inkoo hati kikaaki⁄ana hemaa da Taataa Iliitleemuge, yade Siiloge. Tiꞌii, wanaaba heedi lensee gundii kwahhasuusu mara gosii. 19 Teesaaqay see, dandiray tongee doogu ha kona sluufaa sa ⁄agimisu daqwaai koti, slime kona mukaatee haa difaay, ⁄agoti hindi buꞌudisida dandiray, ana, tongitoꞌoo doy haa yondimiisay goy. Afariislaꞌadisanaaba idoo lensee.”
20 Gaduwakee sigigi kaay tuba, “Qasaw wane sliimaa haa unkuray! Kwahhasa aya gooii. Ana sangu hadisa idadu goõ ga slaꞌadee, hhanti guꞌuday tiꞌii muleeliya da yaamuge.” 21 Teesaaqay, ina gigi leehhisi mara gosii haa gi ⁄agimisi daqwaai kosi. Qatlay giyaa ilii hheꞌesiri hhuncidaa yeꞌeeroo koina, gi ⁄aginiri haa gi kitahhaniri.
22 Qatlay giyaa iliikonee hhaꞌaloo sliimaa, hhawatee gu tlakwi gu yaamu hhakee, gi niini⁄idiri marakee. Inay gi qonqohhoniri afamaraa haa gi kaayri sa gaduwaa gu marakee tuba, “Ca⁄asaayuu khoorooge heedikee gungii daw mara googuu, dandiray maguri guani ina.”
23 Gaduwaa gu marakee yaagii ca⁄i khoorooge haa sigigi kaay tuba, “Suti, teesaaqay gooba hhiee koi, ana hangu tlaatlaqasa hhanti yonditay slasla⁄iimatee. Heediki ti dahaa goy, teesaaqay hhanti yonditay gimbaki gu ilamuree. 24 Yuꞌudaa, tiꞌii wanta hotoy kikitoꞌoo haa hadee da afay da heediki. Inkoo, ana hagiyaay ca⁄asa inay daqa doogunay, owakinay hari ⁄uuru haa laqakina idoo ga iliislaꞌadee gooay. Unkuray, hhanti laqaday teesaaqay, sa hhawataki gimba gu tlaku.”
25 Teesaaqay see, hhawatee hhakee gwaa itatiisiriiba ina. Teesaaqay, Mulaawimokee gii ca⁄asi hadetee tosi khoorooge daqa hhawatee hhakiray. Hhawatee hhakee gigi paahhaniri haa girigi guiri amasi piray heetlawaa naqatloo. Daa iliidaadaauusi pisaraa gigi geemayri ma waauti. 26 Hari tumpaatumpu hadetira yaagi ki⁄idi marakiray daa iliiwane looimoo gosi, gi huuꞌudi hhapeege teꞌesii afamaraage, gi qati pisaraa naqatloo.
27 Looimoo gu hadetee da afay giyaa iliitlay hari heetlawaa, gi afiiooymi afamaraa gu marakee, gii ca⁄i khoorooge ma waaudi hhiyuuma dosii. Yuꞌudiyaa, cirakiray gi arimi hadetee tosi hiĩ qati hhapeege afamaraage, dabaiĩ kosi hiĩ ooyiri giidimoo gu afamaraa gu marakee. 28 Ina gi kaay sa hadetee tosi tuba, “Tlayii, poo na waaudani.” Teesaaqay see, yaa ilaki⁄isidiiba. Teꞌesii, looimoo gosi gigii tlaysi, gigii daasi rawaa gu daqway gosii haa gi waaudiri aya gosii.
29 Qatlay giyaa iliiday aya gosii, ina gii oy catay, da hheꞌesi hadetee tosi gigii tlaaqi ⁄aaraiĩ mibi haa cada. Da hheꞌesi, ⁄aaraiĩ hhakee gigi leehhimisi bareemoo gonge gu hhapee da Israeeli. 30 Kila heedi gwaa arimu gimbaki gi kaay tuba, “Gimba da hinkaa gooay hiti kahhi hiica⁄araa haa haguti kahhana gimati arimaa see, tlaatleesoo da balotiraa Waisraeeli giyaa iliica⁄iri Misirigo haa letuti naqatloo. Inkoo, ha ilatahhanee gimbaki! Ha gimbuusanee hati malee laqana!”