Miika haa Kabiraa da Daani
18
1 Inkoo, balalu hhakeesii Waisraeeli yaa konaaiiba mutemi. Qatlaykee, kabiraa da Daani yaa damaamita daqa da iliiꞌibinaa, sa gimba, qatlaykee naqatloo sagaa kahhi deehha daqa dosi loi da aalimee, tla⁄aã gu kabiraa da Israeelige. 2 Teesaaqay, kabiraa da Daani, gii leehhedi khamaslaslaa kooani faadoo dooinaa goõ, yaamu gu Soorago haa yaamu gu Esitayooligo, gigi ya⁄abiri maa kwairi hhapetira. Hhawatee hhakee gi dayri hhapetiray daa kooma omeeri da Efurayiimu, gi dayri mara gu Miikage haa gi guiri teꞌesii amasi hhakee. 3 Qatlay inay giyaa iliidayri mara gu Miikage, gi baraslayri afoo da qaraimokira Mulaawimoo. Inay gii guniri marakeesii haa gugi maasiri tuba, “Ugu miyaa nuguraa khay tiꞌii? Hoó mala yondita tiꞌii? Sa soꞌoy tiꞌii wanta?”4 Ina sigigi ilakeesi gimba sugwaa yondiidi ha Miika, gi kaay tuba, “Miika sinaa qay yondu, ana ti hhapalooay gosi.”
5 Da hheꞌesi, sugugi kaayri tuba, “Hhooa sandi maamaaside daqa Iliitleemuge, bere dandi pihhi hhiyuuma doorii.”
6 Hhapalooaykira gigi ilaki⁄isi tuba, “Taa⁄amida hari qasaw, hhiyuuma dooguna konta ila⁄imba da Taataa Iliitleemu.”
7 Da hheꞌesi, hhawatee hhakee kooani gi waaudiri haa gi dayri yaamu gu Laysiige. Inay yaa aniri hida gu yaamu hhakee, idoo giyaa ilii ibimaamidiyee hari qasaw haa hari hhoinay, hida gu Sidooni pahha. Inay yaa hida gwaa kaanahhasee, gubasli lakalakaa haa yaa afariibukusiriiba idoo lensee khoorooge. Inay yaati ibiidiri segenge haa hida gu Sidooni, kara yaa yondiidiriiba gimba lensee daqa hida wakinayge.
8 Qatlay hhawatee hhakira gu kooani giyaa iliiki⁄iri, daqa hida koinay yade Soorage haa Esitayoolige, hida koina gigi maasiri inay tuba, “Sandiraani gimba mala khaydiri yadaa?”
9 Inay gi ilaki⁄isiri tuba, “Dandiray hagaani arini hhapetira, gu lou, hhapetira da hhoi hari khisla. Inkoo, tlawaw, paaree nigi iliitlaꞌa kayni hida goó ibiidee hhapetiray. Unkuray hati ibitay kilesii tiꞌii, yondu see yonditaaiiba? Hhantii kaaꞌana hii⁄utla kawa hhapetira. 10 Qatlay goo iliidaadee yade, unkuray hoo slayday hhapee dii tlaakhwi da poaa, da kooma idadu goõ dandiray gamaa slaꞌane. Hida gu hhapetira konaaiiba tlaꞌamee lensee da iliitlaꞌaraa ha hida wakinay. Gu lou Iliitleemu sandii hadisi hhapetira sa dandiray.”
11 Teesaaqay, hhawatee miyaa lahhoꞌo gu kabiraa da Daani, yaamu gu Soorago haa yaamu gu Esitayooligo, gii oyri khasima gooina gu gau haa gi waaudiri gauge. 12 Qatlay giyaa iliikhociicinee, gi tluhhusiri kambii yade daqa doó eteedine Kiriyaati-Yeyariimu hhapee da Yuudage. Haã na idoo bara da ilacindoo gu biraa gu Kiriyaati-Yeyariimu siginoó eteedina Mahaane-Daania letuti naqatloo. 13 Teꞌesaa, gi ilakoniri khocu pandaage hhapee da Efurayiimu naqatloo, da kooma omeeri, haa gi dayri mara gu Miikage.
14 Da hheꞌesi, hhawatee hhakira gu kooani gwaa kwaꞌaraa kawee hhapee da Laysii, gi kaayri sa hhiee koina tuba, “Unkuray khuꞌudaaii tuba, mara lenge tla⁄aã gu maraai hhankii da wana qayriya da ilakhupisa muunaiĩ, idadu gu khafinay, sanaamuu gu khafinay haa sanaamuu gu sikhima? Inkoo, ilahudeesa idoo ga laqadee.” 15 Teesaaqay, inay gii guuma kayri mara gu Miikage, haa gugi cehheemisiri qaraimokira gu Mulaawimoo. 16 Qatlaykee, hhawatee hhakira miyaa lahhoꞌo gu kabiraa da Daani, gi qadimidiri khoorooge kaꞌafu gu marage, tay hiĩ ooyiri khasima gooina gu gau. 17 Hhawatee hhakira gu kooani gwaa kwaꞌaraa kawee hhapee, yaay guniri waꞌay gu marage, yaagii oyri sanaamukira gu sikhima, qayriyatira da muunaiĩ, sanaamamuu gu aya gosi haa idadu gu khafinay. Qatlaykee, hhapalooaykira hiĩ qadidi kaꞌafuge sliimaa haa hida hhakira miyaa lahhoꞌo gwaa oowee khasima gu gau.
18 Qatlay hhawatee hhakee giyaa iliiguniri mara gu Miikage, haa yaagii oyri sanaamukira gu khafinay, qayriyatira da muunaiĩ, haa sanaamamatira da digidakwi da waꞌay gu mara haa sanaamukira gu sapoo. Teꞌesii, hhapalooaykira gigi maasi inay tuba, “Hati mala lalaalaqaday tiꞌii?”
19 Inay gugi ilaki⁄isiri tuba, “Qabe diĩ! Hhanti gimbuusida gimba lensee! Ugu handi sirakonte dandiray, ugu taataa goori tleehhidi haa hhapalooay goori. Ti naraꞌaa daqa dooguu hhapalooay tleehhida sa heedi leẽ haa hida gu mara gosi, baku ti naraꞌa hhapalooay tleehhida sa motoliya haa kabiraa goõ da Israeeli?” 20 Teꞌesii, hhapalooaykira gi hhaꞌaluudi hari khisla, gii oy qayriyatira da muunaiĩ, sanamamuu wakinay gu digidakwi gu mara gosi haa sanaamukira gu khafinay, hingigi sirakomamidi haa inay. 21 Da hheꞌesi, inay goõ gi waaudiri haa gi giyaadisiri pandaage yaꞌay koina gu digidakwi, kuꞌunaanay gooina haa khooslay gooina goõ.
22 Qatlay giyaa iliidayri segenge coko⁄o mara gu Miikago, hida gwaa ibimaamidee ilaciyaa haa Miika digigi eteedi, yaagii kurunkuridiri sliimaa daqa lenge, inay gi siragusiniri kabiraa da Daani haa gigi ilaslayri. 23 Da hheꞌesi, inay gi iliimaahhiri kabiraa da Daani, kabiraa da Daani gigi iliifookidiri haa gi maasiri Miika tuba, “Ugu mala slaꞌada haa dandiray haa handaagi siragusinti haa raqa da didiri da hida, ma gauusidi haa dandiray?”
24 Miika gigi ilaki⁄isi tuba, “Unkuray haanii oodiri iliitleemamee koi goõ gaa boo⁄imisi, haagii oodiri hhapalooay goy, unkuray haagi waautiri. Inkoo, ana hariĩ mala meeti? Unkuray hani malee maasiday tuba, ‘Ugu ha mala slaꞌada?’ ”
25 Kabiraa da Daani gugi ilaki⁄isiri ina tuba, “Ugu hangi hhanti ilaki⁄imisida haa dandiray, bere malee hida gu koomee qupidaa gu dihhi gu iliitlaiyay ugu. Ugu haa hida gu mara googu, hagi hhamisiday ibinaa dooguna.” 26 Teesaaqay, Miika giyaa iliiarimi inay konay ⁄uuru ba⁄ay da ina, ina gii fookidi gi tosaa ki⁄i aya gosii. Da hheꞌesi, kabiraa da Daani gi ilakoniri hari hhiyuuma dooina.
27 Inay gii oyri idadu hhakira daa boo⁄imisi ha Miika, slime gii oyri hhapalooaykira kosi, gwaa yondimaamida sa ina, gi ilakoniri hhiyuuma yaamu gu Laysii naqatloo. Inay gigi iliitlairi hida gu yaamu hhakee goó ibiidee hari qasaw gubasli toodara, gigi tlaaqiri hari pangaaee haa gi da⁄iri yaamu koina hari aslaa. 28 Hida gu yaamu hhakee yaa konaaiiba heedi gu ilabuꞌuru inay, sa gimba inay yaa segenge wanay haa yaamu gu Sidooni, kara yaa konaaiiba ilagaasa haa hida wakinay. Yaamu hhakee gu Laysii yaa hiihuuꞌumage wanay, ilaciyaa haa Beeti-Rehoobi.
Kabiraa da Daani gii ⁄abeesiri tlehhinay yaamu hhakee haa gi ibiidiri teꞌesii. 29 Inay gigi eteediri yaamu hhakee na Daani, uma gu taataa gooina daa laqwali ha kookoo gooina Israeeli.b Uma gu yaamu hhakee wakaꞌalee digaati eteediidina na Laysii. 30 Da hheꞌesi, kabiraa da Daani gi qadidisiri sanaamukira gu khafinay. Yonataani nanku Gerisoomu, nanku Musaa haa yaꞌay kosi, gi hhapalooee tleehhidiri gu kabiraa da Daani, qatlaykaꞌa naqatloo hida gu hhapetee digiraa iliiwaaudi tongaiimaage. 31 Inay gi qadidisiri haa gi firiiriniri sanaamukira gu khafinay gu Miika giyaa boo⁄imisi. Inay yaa teesaaqay laqiri qatlay sliimaa, hemaa da Iliitleemuge giyaa ilii yade wanee Siiloge.