Miika haa Sanaamamaa dosi
17
1 Qatlaykee, yaa wana heedi leẽ uma gosi na Miika, gu hhapee da omeeri da Efurayiimu. 2 Letu waka gi kaay sa iyoo dosi tuba, “Ana haã akhasi, igi haã ilawaasidi heedi guũ fiisu kunduruu⁄umay elefu leẽ haa miyaa leẽ gu feesa mara googaa, ana nugungii oy, nahiĩ tiꞌii, inkoo sigi ki⁄isa.” Teꞌesii, iyoo dosi sugugi kaadi tuba, “Nankoy, Taataa Iliitleemu ⁄aafiye ugu.”3 Miika gi ki⁄isi sa iyoo dosi kunduruu⁄umaykee gu feesa elefu leẽ ha miyaa leẽ. Iyoo dosi gi kaadi tuba, “Inkoo, kunduruu⁄umayki gu feesa ana hagu tlintiꞌisa sa Taataa Iliitleemu, sa nankoy maguri boo⁄imisi sanaamuu gu khafinay haa sanaamuu gu sikhima. Inkoo, ana sugu ki⁄isa ugu kunduru⁄umayki gu feesa.”
4 Teesaaqay, Miika gi ki⁄isi sa iyoo dosi feesakee, iyoo dosi gii oodi kunduruu⁄umay miiyaa cada gu feesa haa gigi hadisidi sa heedi goó sapa feesa. Heedikee gi boo⁄imisi sanaamuu gu khafinay haa sanaamuu gu sapoo. Sanaamamatee dagagi qaasi waꞌay gu mara gu Miikage.
5 Inkoo, heediki Miika yaa kona daqa da iliitleemamee mara gosii. Ina gi boo⁄imisi qayriya da hhapalooaisoo da ilakhupisa muunaiĩ, gi boo⁄imisi idadu gu khafinay haa gii leehhi naw leẽ tla⁄aã gu yaꞌay kosaa, gi hhapalooay gosi tleehhidi. 6 Balalu hhakeesii, Waisraeeli yaa konaaiiba mutemi. Kila heedi yaati yondiidi, idoo giyaa iliiarimi gooay ti naraꞌa ilaa kosii ina loi.
7 Qatlaykeesii, yaa wana qaraimoo leẽ gu kabiraa da Laawi, gwaa ibimaamida yaamu gu Beteleheemuge hhapee da Yuudage. 8 Qaraimokee gi waaudi yaamu hhakeesaa gu Beteleheemugo gu hhapee da kabiraa da Yuuda, gi dabiidu kay daqa waka da ilii ibinaa. Qatlay giyaa ilii hhiyumaamidiye, gi day mara gu Miikage, hhapee da omeerige da Efurayiimu.
9 Miika gugi maasi ina tuba, “Ugu haa kaadahhada?” Ina gugi ilaki⁄isi tuba, “Ana ti Mulaawimoo, haa yaamu gu Beteleheemu dahha hhapee da Yuudago, hati damaamida daqa da iliiꞌibinaa.”
10 Da hheꞌesi, Miika gi kaay sa qaraimokee tuba, “Ibiidi tiꞌii sliimaa haa ana, ugu taataa goy tleehhidi haa hhapalooay goy. Ana sugu hadimisa ugu kunduru⁄umay mibi gu feesa kila kori, qayroo haa ⁄agoo doogu” 11 Teesaaqay, Mulaawimokee gi ⁄imbi ibinaa sliimaa haa Miika, ina gi ibiidi teꞌesii gi leẽ gu yaꞌay gu hhawatee tleehhidi gu Miika. 12 Teesaaqay, Miika gugi tlintiꞌisi qaraimokee gu Mulaawimoo, ina gi hhapalooay gosi tleehhidi haa gi ibiidi mara gosii. 13 Teꞌesii, Miika gi kaay tuba, “Inkoo ha khua, Taataa Iliitleemu sini yondiidi hhoinay, sa gimba Mulaawimoki hiĩ hhapalooay goy tleehhidi.”