Saamsooni haa Deliila
16
1 Letu waka, Saamsooni yaa hadakay yaamu gu Gaasage, yade gi arimi slipalautoꞌoo waka, ina gii day mara gu slipalautoꞌoteesii haa girigi gui. 2 Hida gu Gaasa sigigi kaay tuba, “Saamsooni yaani khay wana tiꞌii!” Teesaaqay, inay gi niini⁄idiri daqatee haa gugi baqamidiri kaꞌafu gu yaamuge amasi piray. Inay gi qabiri diĩ amasi piray, kakaanay tuba, “Hagu baqamidane piseemaa naqatloo, hagoo asu gaasana.”3 Teesaaqay see, Saamsooni gi gui amasi diira naqatloo. Qatlay gu amasi diira gi waaudi, gi ooy afamaraaee gu kaꞌafu gu yaamu haa giidimaiĩ kosi cada, gigi tu⁄i sliimaa haa ilakhaslimaiĩ kosi haa gigi geregedi kwahhu kosii, gigi leehhisi cina da okira naqatloo gu ilacoomoo haa yaamu gu Heburooni.
4 Qariqaaqari, gimbakee giyaa iliicati, Saamsooni gi slai hadee waka uma gosi na Deliila, daa ibimaamida hiihuuꞌuma gu Soreekige. 5 Giyaadimiisee da Wafiliisiti yaagi khayri daqa Deliilage, sagagi kaayri tuba, “Laalaagi Saamsooni, ma caahhadi siiri da ⁄uuru gosi gu wa⁄a, haa idoo hagu iliidahhasane kaba⁄a, magu khiidini haa magu labaꞌasani. Kila heedi tla⁄aã goorii sigi hadisi igi kunduru⁄umay elefu leẽ haa miyaa leẽ gu feesa.”
6 Teesaaqay, Deliila gi kaadi sa Saamsooni tuba, “Hhooa, sini kaade siiri da ⁄uuru googu gu wa⁄a, haa idoo dugu iliidahhasiye khiidiru haa magu labaꞌasani.”
7 Saamsooni gigi ilaki⁄isi tuba, “Bere hini khiidinay hari ne⁄eebaaee fanqu gu naa⁄ee gu kahhee kawaraa, teꞌesii hoó koomaaba ⁄uuru, hooti hida wakinay tleehhida.”
8 Giyaadimiisee da Wafiliisiti yaagi leehhisiri sa Deliila, ne⁄eebaaee hhakee fanqu gu naa⁄ee. Deliila gi khiidinti Saamsooni hari ne⁄eebaaee hhakee fanqu gu naa⁄ee. 9 Deliila yaa yakwidi hhawatee wakinay sagayge, magu giidiri Saamsooni. Deliila sugugi kaadi hari afoo da didiri tuba, “Saamsooni, Wafiliisiti yaa khociyay, magu ooyiri ugu!” Saamsooni gi kereꞌesi hari dabaiĩ kosi ne⁄eebaaee hhakee ubee, putiĩ pahha duguniĩ ilii naahhaꞌadi ha aslaa. Teesaaqay, siiri da ⁄uuru gosi dugwaa caahhiiba.
10 Da hheꞌesi, Deliila gi kaadi sa Saamsooni tuba, “Yuꞌudiyaa, ugu haninti belendeqesidi haa sinigi kaadi afaꞌafuuma. Hhooa sini kaade, duguri idoo mala hiidahhasi khiidiru?”
11 Saamsooni, gigi ilaki⁄isi tuba, “Bere hini khiidinay naraꞌa hari hhagumeeraa gu ⁄abi, dari kahhiye yondu, teꞌesii hoo koomaaba ⁄uuru, hooti hida wakinay pahha tleehhida.”
12 Teesaaqay, Deliila gii oodi hhagumeeraa gu ⁄abi haa gugi khiidinti. Da hheꞌesi, sugugi kaadi tuba, “Saamsooni, Wafiliisiti yaa khociyay magu ooyiri!” Qatlaykee, hhawatee hhakira gwaa giidee yaa wanay sagayge. Teesaaqay see, Saamsooni gi kereꞌesi welaa hhakee daraa khiidimi dabaiĩ kosi, ubee putiĩ guniĩ kereꞌesi pahha.
13 Da hheꞌesi, Deliila gi kaadi sa Saamsooni tuba, “Inkoo see, haninti belendeqesidi haa sininti kaadi gimba gu afaꞌafuuma. Sini kaade duguri idoo mala hiidahhasi khiidiru?”
Saamsooni sagagi kaay tuba, “Bere ha hhutlida ⁄ayraa hhanki koi fanqu gu quubu gu saga goy mutandiyooge haa gigi kufida naraꞌa kikiaage, teꞌesii hoo koomaaba ⁄uuru, hooti hida wakinay pahha tleehhida.” 14 Qatlay Saamsooni giyaa iliigui, Deliila gi tla⁄asinti daqa lenge ⁄ayraa fanqu gu quubu gu saga gu Saamsooni, gigi khiidinti hari mutandiyoo haa gigii karahhasidi kikiaage. Da hheꞌesi, gi kaadi sa Saamsooni tuba, “Saamsooni, Wafiliisiti yaa khociyay magu ooyiri!” Teesaaqay see, Saamsooni yaagii tlay guꞌudeego, gi tu⁄i kikiatira sliimaa haa mutandiyokira.
15 Deliila gi kaadi sa Saamsooni tuba, “Ugu malee hiidahhasida kaawa ubee, ‘hani slaꞌada,’ tay muuna googu wanaaba sliimaa haa ana? Ugu haniĩ belendeqesidi waati da tami, haa siniĩ kaadiiba siiri da ⁄uurukee koku gu wa⁄a.” 16 Baloo haa baloo, Deliila gi ilakonti ilahufidu Saamsooni hari gimba haa gugi ba⁄aaꞌaadisidi, muuna gosi gi ba⁄aa⁄aadi slai gwaaꞌaraa see.
17 Teesaaqay, Saamsooni gi kaay sa hadetee siiri dosi goõ, sagagi kaay tuba, “Etaa quubu goy dugu kahhi hhadinay, sa gimba, ana dinaati tlintiꞌisi sa Iliitleemu, guraꞌa gu iyoo dooaa. Bere dini hhaadi, ⁄uuru goy hini afiica⁄i, ana hooti koomaaba kara ⁄uuru, hooti hida wakinay pahha tleehhida.”
18 Deliila giyaa ilii baraslaydi tuba, Saamsooni sangaã idaruusi siiri dosi goõ, gi eteti giyaadimiisee da Wafiliisiti, sigigi kaadi tuba, “Khocaa waati leẽ kilesi, sa gimba, Saamsooni siniĩ idaruusi siiri dosi goõ.” Teesaaqay, giyaadimiisee da Wafiliisiti yaagi khayri daqa Deliilage, tay sagaa konay peesay giyaa hiifadidiri sa ina. 19 Deliila gi laalaagidi Saamsooni ha gi gui gurugendi kosii. Da hheꞌesi, gi eteti heedi haa gi hhaadi ⁄ayraa hhakira kosi fanqu gu quubu gu saga gosi. Deliila, gugi tlaatleesidi ilahufidu Saamsooni maa hiitlay, kaslenkoo ⁄uuru gosi hingii faaki.
20 Teꞌesii, Deliila gi eteti Saamsooni tuba, “Saamsooni! Tlayii Wafiliisiti yaa khociyay magu ooyiri!” Saamsooni yaagii tlay guꞌudeego, tay ilahudeemisi tuba, “Hiica⁄a khoorooge, haa hangigi ilabuꞌuma da wakaꞌalee gooay.” Teesaaqay see, ina yaa caahhiiba tuba, Taataa Iliitleemu guũ may.
21 Da hheꞌesi, Wafiliisiti gugi ooyiri haa gugi afatuꞌuniri ilaa kosi, gurigi waaudiri yaamu gu Gaasa naqatloo, tay guũ khiidiniri hari pingu gu ⁄aray, gugi ⁄uureesiri ma saadimi ganoo teꞌesii jeerage. 22 Qatlaykee, quubu gu saga gosi daa hhaadi yaagi tlaatleesi tiꞌida kara.
Gwaaꞌaraa da Saamsooni
23 Inkoo, giyaadimiisee da Wafiliisiti gii kurunkuridiri, ma hadisiri sadaaka sa iliitleemu gooina doó eteedine Dagooni. Inay gi ⁄isiniri losona haa gi raairi hari hhaꞌaloo kakaanay tuba, “Iliitleemu goori hingii lu⁄i dabaiĩ kotii fa⁄aymoo goori Saamsooni.”
24 Hida giyaa iliianiri Saamsooni, gi hhaꞌaleesiri iliitleemu gooina kakaanay tuba,
“Inkoo, iliitleemu goori hingii lu⁄i,
fa⁄aymoo goori dabaiĩ kotii,
hikira gwaa tlakweemisu hhapee doori,
haa gi cu⁄i hida wa⁄a tla⁄aã goorii.”
25 Qatlay inay giyaa ilii hhaꞌaluumidiri hari khisla muunaiĩ koinay, gi kaayri tuba, “Hari khawaa Saamsooni, ma sandi seehhuusi, dandiray ma hhaꞌaluumidani.” Da hheꞌesi, Saamsooni gwaagii ca⁄asiri jeerago haa guraagi khayri daqa dooinay. Teꞌesii, ina gi seehhuusi pandaa dooinay, inay gugi qadidisiri tla⁄aã gu unguruꞌu cadage. 26 Saamsooni gi kaay sa yondimiisay, gwaa oow daba gosi tuba, “Hani qaaside daqa ga iliidahhase slaapaꞌasa unguruꞌu gwaa oow maraki gu didiru, ma iladici teꞌesii.” 27 Inkoo, marakee gu didiru yaa haci hida wa⁄a, tigay haa hhawatee, giyaadimiisee goõ da deni da Wafiliisiti yaa wanay teꞌesii. Kara daqa da rawaage yaa wanay hida elefu tami hhawatee haa tigay, gwaa khuꞌuuꞌumee Saamsooni giyaa ilii seehhuuhhumisiye. 28 Da hheꞌesi, Saamsooni gi firimi Taataa Iliitleemu, gi kaay tuba, “Ye Looimoo Iliitleemu haguũ firimi hanii slayde. Ye Iliitleemu haguũ tlaatlaqasi, hani haciside ⁄uuru kara waati leẽ kilesi. Hari yonduki, ma hiidahhasi buaraa ⁄imbu daqa Wafiliisitige, sa ilaa koi cada giyaa tu⁄uniri.” 29 Da hheꞌesi, Saamsooni gi iliisati unguruꞌukira cada gu tla⁄aã gwaa oow marakee gu didiru. Ina gi ooy unguruꞌukee, leẽ hari daba gu ⁄uya leẽ hari daba gu basa. 30 Saamsooni gi kaay tuba, “Hagwaae sliimaa haa Wafiliisiti!” Teꞌesii, gi ila⁄upi unguruꞌukee hari ⁄uuru gosi goõ, marakee gu didiru gi iliihuui giyaadimiisee da Wafiliisiti haa hida goõ gwaa waaree teꞌesii waꞌay kosii. Teesaaqay, ina gi cu⁄i hida wa⁄a hari khisla qatlay gu gwaaꞌaraa dosii, ba⁄ay da balalu gu slafimaa kosi see.
31 Da hheꞌesi, hhiee kosi haa hiidayuuma goõ da taataa gosi, gugi ayri haa guraagi waaudiri. Gugi qaasiri tla⁄antla⁄a gu yaamu gu Soorage haa yaamu gu Esitayoolige, daqa aysa da taataa gosii Manoowa. Saamsooni yaa ilabuꞌumiisay gu Israeeli qoomay gu koraraa mibeeri cada.